Ягья 8 - Пак Калам

Гунагькар паб

¹ Иса Зейтун пелел фена.

² Экуьнахъ Ам мад Аллагьдин КӀвализ хтана; Адан патав вири халкь къвезвай. Ада, ана ацукьна, чирвилер гузвай.

³ И арада тавратдаррини фарисейри Адан патав зинавал ийизвайла кьур паб гъана, ам юкьвал акъвазарна.

⁴ – Муаллим, – лагьана абуру, – и паб зинавал ийизвайла кьунвайди я.

⁵ Мусади вичин Къанунда ихьтинбуруз къван гана кӀанда лагьанва. Вуна вуч лугьуда?

⁶ Абуру и гафар, Ам кӀеве тваз кӀанз, ахпани Адак тахсирар кутун патал, лугьузвай. Амма Исади агъуз хьана, тупӀув чилел кхьинар ийизвай.

⁷ Адавай мадни хабар кьаз хьайила, Ада, хкаж хьана, абуруз лагьана: – Квекай ник гунагь квачтӀа, сифте къван гьада гьалчрай.

⁸ Агъуз хьана, Ада мад чилел кхьинар авун давамна.

⁹ И гафарин ван хьайила, вири хъфиз эгечӀна, сифте агъсакъалар хъфена. Тек Исани адан вилик акъвазнавай паб амукьна.

¹⁰ Къарагъна, Исади адаз лагьана: – Я вах, вал гунагьар илитӀзавайбур гьинва? Ваз кар атӀуз кӀан хьайи кас хьанани?

¹¹ – Гьич садни, я Агъа! – жаваб гана ада. – Зани ваз кар атӀузвач, – лагьана Исади. – Ахлад, мад гунагь крар хъийимир.

Иса – дуьньядин экв

¹² Исади халкьдиз мад лагьана: – Зун дуьньядин экв я. Зи гуьгъуьнаваз атайди са чӀавузни мичӀе гьатдач, уьмуьр гузвай экв адахъ галаз жеда.

¹³ И чӀавуз фарисейри Адаз лагьана: – Ибур вири Вуна Жува Жувакай ийизвай шагьидвилер я, гьакӀ хьайила Ви гафар дуьзбур туш.

¹⁴ – Гьатта За лугьузвай гафар Жува Жувакай ийизвай шагьидвилер ятӀани, абур дуьзбур я, – жаваб яз лагьана Исади. – Зун гьинай атанатӀа ва гьиниз хъфидатӀа Заз чизва; амма квез Зун гьинай атанатӀа ва гьиниз хъфидатӀа чизвач.

¹⁵ Куьне вири инсанри ийидай хьтин дуван ийизва. За саданни дуван ийизвач.

¹⁶ За са нин ятӀани дуван ийизвай чӀавуз, За кьилди са Жува ваъ, Зун ракъурай Бубадихъ галаз дуван ийизва, гьавиляй За ийизвай дуван халисанди я.

¹⁷ Куь Къанундани кьве инсандин шагьидвал дуьзди я лугьузва.

¹⁸ Закай Зани шагьидвал ийизва, Зун ракъурай Зи Бубадини.

¹⁹ Инал абуру Исадивай хабар кьуна: – Бес Ви Буба гьина ава? – Квез Зунни чидач, Зи Бубани, – жаваб гана Исади. – Квез Зун чидайтӀа, квез Зи Бубани чир жедай.

²⁰ И гафар Исади Аллагьдин КӀвале, садакьадин пул вегьидай кьватидин патав гвайла, лагьайбур тир. Ада ана чирвилер гузвай. Ам садани кьунач, вучиз лагьайтӀа Адан вахт алукьнавачир.

Чувудрихъ галаз ихтилатар

²¹ Исади абуруз мад лагьана: – Зун хъфизва, амма Зун хъфизвай чкадиз квевай къвез жедач, куьн Захъ къекъвез жеда, амма квез жагъидач, гьа икӀ куьн гунагьар кумаз рекьида.

²² Инал чувудри чпи чпиз лагьана: – «Зун физвай чкадиз квевай къвез жедач» гафаралди адаз вуч лугьуз кӀанзава? Вичиз Вич рекьиз кӀанзава жал?

²³ Исадини абуруз лагьана: – Куьн агъанай, Зун вининай я. Куьн и дуьньядай я; Зун и дуьньядай туш.

²⁴ Гьавиляй За квез лагьанай, куьн куь гунагьарни кумаз рекьида. Зун Гьам Вич Тирдан чӀалахъ куьн тахьайтӀа, куьн гунагьарни кумаз рекьида эхир.

²⁵ Анал алайбуру Адаз лагьана: – Бес Вун вуж я? – Зун Вуж ятӀа, За квез сифтедилай лугьузва, – жаваб гана Исади. –

²⁶ Завай квекай гзаф ихтилатарни ийиз жеда, квек кутаз жедай тахсирарни гзаф я. Амма За Зун Ракъурайдавай ван хьайи гафар лугьузва. Зун Ракъурайди гьакъикъи я.

²⁷ Ада Бубадикай лугьузвайдан гъавурда абур гьатнач.

²⁸ Исади абуруз мад лагьана: – Инсандин Хва виниз хкаж хьайила, квез Ам Зун Тирди чир жеда. За Жува Жувалай са карни лугьузвайди туш, За ийизвайди анжах Зи Бубади Заз чирнавайди я.

²⁹ Зун Ракъурнавайди Захъ гала; За датӀана Адаз кӀандайвал ийизва. Гьавиляй Ада Зун текдиз тазвач.

³⁰ Ада и ихтилатар ийидайла, Адахъ гзафбуру иман авуна.

³¹ Имандал атанвай чувудриз Исади лагьана: – Куьн Зи Гафариз вафа яз амукьайтӀа, квекай Зи гьакъикъи тилмизар жеда.

³² Квез гьакъикъат чир хьайитӀа, ада куьн азад ийида.

³³ – Чун Ибрагьиман веледар я, – лагьана абуру, – чун са чӀавузни садазни лукӀ хьайибур туш. Вучиз вуна «Куьн азад жеда» лугьузва?

³⁴ – За квез лап рикӀивай лугьузва, – жаваб гана Исади, – гьар ни гунагь кар ийизватӀа, гьадакай гунагьдин лукӀ жезва.

³⁵ ЛукӀ хизанда амукьдач, амма хва уьмуьрлух хизанда амукьда.

³⁶ Хци куьн лукӀвиляй азад авуртӀа, куьн рикӀивайни азад жеда.

³⁷ Куьн Ибрагьиман тухумдикай тирди Заз чизва. Амма, гьакӀ ятӀани, куьне За лугьузвай гафар кваз кьазвач. Гьавиляй квез Зун рекьиз кӀанзава.

³⁸ За лугьузвайди Заз Зи Бубадивай ван хьайиди я. Куьнени вирида куь бубайри лагьайвал ийизва.

³⁹ – Чи буба – Ибрагьим я, – жаваб яз лагьана абуру. – Куьн Ибрагьиман веледар тиртӀа, куьне Ибрагьиман крар кьиле тухудай, – лагьана Исади.

⁴⁰ – Исятда За квез Заз Аллагьдивай ван хьайи гьакъикъат лугьузва, амма квез Зун рекьиз кӀанзава. Ибрагьима акӀ ийидачир.

⁴¹ Куьне куь бубади ийидай хьтин крар ийизва. Инал абуру лагьана: – Чун пажар туш. Чахъ са Буба ава, Амни Аллагь я.

⁴² – Аллагь куь Буба тиртӀа, квез Зун кӀан жедай, – лагьана Исади, – Зунни Аллагьдин патавай атана ина авайди я эхир. Зун Жув-Жувалай атанвайди туш, Зун Гьада ракъурнавайди я.

⁴³ Вучиз квевай За лугьузвай гафарин гъавурда гьатиз жезвач? Вучиз лагьайтӀа квевай Зи гафариз яб гуз жезвач.

⁴⁴ Куь буба иблис я, квез куь бубадиз вуч кӀанзаватӀа гьам ийиз кӀанзава. Ам лап сифтедилай инсанар рекьизвайди я. Иблис дуьзвилин патал алайди туш, вучиз лагьайтӀа адахъ са дуьзвални авач. Таб авун адаз вичин дидед чӀалал рахай мисал я. Ам тапархъан ва тапаррин буба я.

⁴⁵ За авайвал лугьун себеб яз, куьн Зи чӀалахъ жезвач.

⁴⁶ Квевай нивай Зак гунагьар ква лагьана Зак тахсир квайди субутиз жеда? Квевай Зун гунагькар тирди субутиз жезвачтӀа, вучиз куьн За авайвал лугьуз хьайила, Зи чӀалахъ жезвач?

⁴⁷ Ни вич Аллагьдинди яз кьазватӀа, гьада Аллагьдин гафариз ябни гуда. Куьн Аллагьдинбур тахьуниз килигна, куьне Зи гафариз ябни гудач.

Иса ва Ибрагьим

⁴⁸ Чувудри Исадиз жаваб яз лагьана: – Чна Вун самариятви я, вични жинерар квайди я лугьузвайла, чун гьахъ тушни бес?

⁴⁹ – Зак жинерар квач, – жаваб гана Исади. – За Зи Бубадин гьуьрмет хуьзва, амма куьне Зи гьуьрмет агъузарзава.

⁵⁰ Зун Жуван баркалладихъ галтугзавач, амма Аллагьдиз Зал баркалла атана кӀанзава. Къуй Ада Вичи дуван авурай.

⁵¹ За квез лап рикӀивай лугьузва, ни За лагьай гафар кьилиз акъудайтӀа, ам са чӀавузни рекьидач.

⁵² – Вак жин квайди гила чаз чир хьана, – лагьана чувудри. – Ибрагьимни кьена, пайгъамбарарни кьена, амма Вуна лугьузва хьи, Вуна лагьай гафар кьилиз акъудайди са чӀавузни рекьидач.

⁵³ Вун чи буба Ибрагьималай артухди яни? Ам кьенва, вири пайгъамбарарни кьенва. Вуна Жув няй кьазва?

⁵⁴ – За Жува Жувал баркалла гъизвайтӀа, Зи баркалладихъ са къиметни жедачир, – жаваб гана Исади. – Зал баркалла гъизвайди Зи Буба я. Куьне Ам куь Аллагь я лугьузва.

⁵⁵ Квез Ам чидач, амма Заз чида. За Жуваз Ам чидач лагьанайтӀа, Закай куьн хьтин тапрукь жедай; амма Заз Ам чида ва Адан Гафни За кьилиз акъудзава.

⁵⁶ Куь буба Ибрагьим Зун къведай йикъахъ эрзиман тир: адаз Зун дуьньядиз атайди акунни авуна ва ам а кардал гзаф шадни хьана.

⁵⁷ Инал чувудри Адаз лагьана: – Ви яхцӀурни цӀуд йисни хьанвач, Ваз Ибрагьим акунани кьван?

⁵⁸ – За квез лап рикӀивай лугьузва: Ибрагьим жедалдини Зун Авайди я, – жаваб гана Исади.

⁵⁹ Исадиз къван гун патал, абуру гъиле къванер кьуна. Амма Иса Аллагьдин КӀваляй экъечӀна, инсанрин вилерикай хкатна.