Ягья 7 - Пак Калам

Исадин стхайри иман тавун

¹ Адалай кьулухъ Иса Галилейдиз фена. Адаз Ягьудатда къекъвез кӀанзавачир: чувудриз Ам рекьиз кӀанзавай.

² Чувудрин Кумайрин сувар мукьва жезвай.

³ Гьа вахтунда Исадин стхайри Адаз лагьана: – Вуна ийизвай керемат-ишараяр Ви тилмизризни аквадайвал, Вун инай Ягьудатдиз алад;

⁴ гьардаз вич машгьур хьана кӀанда, гьавиляй садани чинебан кар ийидач; Вуна гьахьтин керемат-ишараяр арадал гъизватӀа, Жувакай дуьньядиз хабар жедайвал ая.

⁵ Адан стхайрини Адахъ иман ийизвачир.

⁶ Гьавиляй Исади абуруз лагьана: – Зи вахт гьеле атанвач, амма квехъ галаз гьар са вахт кьунва.

⁷ Дуьньядиз куьн такӀан хьун жедай кар туш. За, лагьайтӀа, дуьньядин чӀуру крар винел акъудзава, гьавиляй адаз Зун акунани кӀан туш.

⁸ Куьн суварик алад, Зун фидач, Зи вахт гьеле атанвач.

⁹ Ам, стхайрихъ галаз тефена, Галилейда амукьна.

Иса Ярусалимда суварик

¹⁰ Стхаяр суварик фейила, Исани Вич садазни таквадайвал, чинеба суварик фена.

¹¹ Суварик чувудрин кьиле авайбуру, Адахъ къекъвез, «Ам гьинава?» лугьуз, хабарар кьазвай.

¹² Адакай халкьдин арада гзаф рахунар авай: садбуру Ам хъсан инсан я, муькуьбуру – ваъ, Ада халкьар рекьяй акъудзава лугьузвай.

¹³ Амма чувудрин кьиле авайбурукай кичӀела садни Адакай ачухдиз рахазвачир.

¹⁴ Суварин йикъарин са пай алатайла, Исади Аллагьдин КӀвализ атана ва чирвилер гуз эгечӀна.

¹⁵ Чувудрин кьиле авайбуру мягьтел хьана лугьузвай: – КӀел тавуна, Калам икьван хъсандиз чир хьун гьикӀ жезвай кар я?

¹⁶ Абуруз жаваб яз Исади лагьана: – За гудай чирвилер зибур туш, абур Зун Ракъурнавайданбур я.

¹⁷ Адан къаст кьилиз акъудиз кӀанзавай касдиз За гузвай чирвилер Аллагьдинбур ва я Зибур ятӀа чир жеда.

¹⁸ Са вичин гафар лугьузвайда са вич машгьурда, амма вич Ракъурнавайди машгьурзавайда таб ийидач. Адан чӀалахъ хьайитӀа жеда.

¹⁹ Мусади квез Къанун ганачни мегер? Квекай гьич садани вич Къанунда лагьанвайвал кьиле тухузвач. Квез Зун вучиз рекьиз кӀанзава?

²⁰ – Вак жинерар акатнавани? – жаваб гана халкьди. – Вун низ рекьиз кӀанзава?

²¹ Исади Вичин рахунар давамарна: – За тек са кӀвалах авуна, куьн вири тажуб хьана.

²² Куьне куь гадаяр, Мусадилай атанвай адет я лугьуз, Киш юкъузни суьннет ийизва (авайвал лагьайтӀа, суьннет авун Мусадилай ваъ, чувудрин лап чӀехи бубайрилай амай адет я).

²³ Мусадин Къанун чӀур тавун патал Киш юкъузни аялар суьннет ийиз хьайила, бес За Киш юкъуз инсан сагъар хъувуна лугьуз, вучиз квез Закай хъел къвезва?

²⁴ Винелай килигна ваъ, гьахъ-михьи къимет це.

Иса – Месигь яни-тушни?

²⁵ Инал ярусалимвийрикай садбуру лугьуз хьана: – Чи гьакимриз рекьиз кӀанзавай Инсан гьа им тушни?

²⁶ Килиг, Ам инсанрихъ галаз ачухдаказ рахазва, абуруни Адаз куьтӀни ийизвач. Ам Месигь тирдахъ гьакимар гьакъикъатда чӀалахъ хьанвани?

²⁷ Ам гьинай ятӀа, чаз чида, амма халисан Месигь атайла, Ам гьинай атанатӀа садазни чир жедач.

²⁸ Аллагьдин КӀвале чирвилер гудайла, Исади ван алаз лагьана: – Квез Зун таниш я, Зун гьинай ятӀа квез чида. Зун Залай атанвайди туш, Зун Ракъурнавайди халисанди я. Ам квез чидач.

²⁹ Заз Ам хъсандиз чида. Зун Гьадан патавай атанвайди я. Зун Гьада Ракъурнавайди я.

³⁰ Гьа чӀавуз абуруз Ам кьаз кӀан хьана, амма садавайни Адак гъил кягъиз хьанач, вучиз лагьайтӀа Адан вахт атанвачир.

³¹ Халкьдин арада гзафбуру лугьузвай: – Месигь атайла, Адавай и касди къалурай керемат-ишарайрилай гзаф керемат-ишараяр ийиз жедани кьван? Гьа икӀ фикирзавай абуру Исадихъ иман авуна.

Иса кьаз алахъун

³² Исадикай халкьди ийизвай кушкушар фарисейризни ван хьана. ЧӀехи хахамрини фарисейри, Ам кьун патал, Аллагьдин КӀвалин къаравулар ракъурна.

³³ Исади лагьана: – Зун куь арада са тӀимил вахтунда амукьда, ахпа Зун Жув Ракъурайдан патав хъфида.

³⁴ Куьн Захъ къекъведа, амма квез Зун жагъидач, Зун жедай чкадиз квевай къвез жедач.

³⁵ Чувудри чпи чпиз лугьуз хьана: – Чаз Вич жагъин тийидайвал Адаз гьиниз физ кӀанзаватӀа? Адаз, маса халкьарин арада авай чувудрин патав фена, гьана чувудар туширбурузни чирвилер гуз кӀанзаватӀа?

³⁶ «Куьн Захъ къекъведа, амма квез Зун жагъидач, Зун жедай чкадизни квевай къвез жедач» лугьузвай гафаралди Адаз вуч лугьуз кӀанзаватӀа?

Эбеди уьмуьр гудай яд авай вацӀар

³⁷ Суварин эхиримжи ва лап чӀехи юкъуз Исади, къарагъна, ван алаз лагьана: – Вуж цихъ къаних ятӀа, Зи патав ша, хъухъ.

³⁸ Каламда кхьенвайвал, Захъ иман ийизвайдан рикӀяй уьмуьр гудай цин вацӀар авахьда.

³⁹ ИкӀ лугьудайла, Исадин фикирда Вичихъ иман авурбуруз гудай Руьгь авай. Иса гьеле Вичин вири баркалладив агакь тавуниз килигна, абуруз Руьгь ганвачир.

⁴⁰ И гафар ван хьайи халкьдикай садбуру лугьузвай: – Ам рикӀивайни гьа Пайгъамбар я.

⁴¹ – Ам Месигь я, – лугьузвай муькуьбуру. – Месигь Галилейдай акъатдани мегер? – лугьузвай са бязибуру. –

⁴² Месигь Давудан тухумдикай жедайди, Ам Давудан хайи Бетлегьем шегьерда пайда жедайди Каламдани лагьанвачни кьван?

⁴³ Гьа икӀ Адан гьакъиндай халкьдин арада чуьруькар гьатна.

⁴⁴ Абурукай са бязибуруз Ам кьаз кӀанзавай, амма садани Адак гъил кянач.

Чувудрин гьакимрихъ иман тахьун

⁴⁵ Гьа икӀ Аллагьдин КӀвалин къаравулар элкъвена чӀехи хахамринни фарисейрин патав хъфена. Хахамрини фарисейри абурувай хабар кьуна: – Куьне Ам кьуна вучиз хканач?

⁴⁶ – А инсанди лагьай хьтин гафар садани лагьайбур туш, – жаваб гана къаравулри.

⁴⁷ – Ада куьнни алцурарнавани? – лагьана фарисейри. –

⁴⁸ Мегер адахъ иман авурбурук са гьаким ва я са фарисей кьванни квани?

⁴⁹ Адахъ иман ийизвайди Аллагьди негьнавай халкь я, адаз Къанундикай са хабарни авач.

⁵⁰ Фарисейрин арада йифиз Исадин патав атай Никъадим авай.

⁵¹ – Инсандиз кар атӀудалди, адаз вичиз яб гана, адак тахсир кватӀа чирна кӀанда, – лагьана ада. – Къанундини чаз гьакӀ лугьузвачни кьван?

⁵² – Вунни Галилейдай яз тахьуй гьа? – жаваб гана абуру. – Калам кӀела, Галилейдай пайгъамбар акъатдач.

⁵³ Абур вири чпин кӀвалериз хъфена.