Ягья 3 - Пак Калам

Исани Никъадим

¹ Никъадим лугьудай са фарисей хьана, ам чувудрин вилик-кьилик квайбурукай сад тир.

² Ам йифиз Исадин патав атана. – Муаллим! – лагьана ада. – Чаз Вун Аллагьдин патавай атанвай Муаллим яз чида. Аллагьди гуз хьаначиртӀа, садавайни Вуна ийизвай хьтин керемат-ишараяр къалуриз жедачир.

³ – За ваз лап рикӀивай лугьузва, – жаваб гана Исади, – Аллагьдин Пачагьлугъ анжах цӀийи кьилелай дуьньядал хтайдаз аквада.

⁴ – Кьуьзуь хьанвай инсан цӀийи кьилелай дуьньядал гьикӀ хтурай? – жузуна Никъадима. – Дидедин руфуниз гьахь хъувуна анай экъечӀиз хъжедани?

⁵ Исади жаваб гана: – Лап рикӀивай лугьузва За ваз: анжах ци ва Руьгьди цӀийи кьилелай дуьньядиз хкайдавай Аллагьдин Пачагьлугъдиз гьахьиз жеда.

⁶ Инсандилай инсан жеда, Руьгьдилай – руьгь.

⁷ Гьавиляй За ваз «куьн дуьньядал цӀийи кьилелай хтун лазим я» лагьайла, вун мягьтел жемир.

⁸ Гар вичиз кӀандайвал къекъведа. Ваз адан ван къведа, амма ам гьинай гьиниз физватӀа, чир жедач. Руьгьдилай хьана дуьньядиз атайбурни гьа икӀ жеда.

⁹ – Ам гьикӀ жедай кар я? – лагьана хабар кьуна Никъадима.

¹⁰ – Исраилдиз тарсар гузватӀани, ваз ихьтин затӀар чизвачни? – жаваб гана Исади. –

¹¹ За ваз лап рикӀивай лугьузва: чун чаз чидайдакай рахада, шагьидвални чаз акурдакай ийида, ятӀани куьне чи шагьидвилер кьабулзавач.

¹² За квез чилин крарикай лугьузва – куьн чӀалахъ жезвач. Цаварин крарикай рахаз хьайитӀа, куьн чӀалахъ жедани кьван?

¹³ Гьич са касни цаварал хкаж хьайиди туш, ана хьайиди анжах цаварай эвичӀай Инсандин Хва я.

¹⁴ Мусади кьурумда чиле гул акӀурна анал буьруьнждин гъуьлягъ хкажайла, вири Исраилдиз и гъуьлягъ акваз хьанай. Гьа саягъда Инсандин Хвани хкаж жеда ва виридаз Ам аквада.

¹⁵ Адахъ иман ийизвай гьар садахъ эбеди уьмуьр жеда.

¹⁶ Аллагьдиз и дуьнья акьван кӀан хьана хьи, Вичин авайни-авачир са Хва къурбанд авуна, Адахъ иман ийизвайбур садни рекьин тийидайвал, абуруз эбеди уьмуьр жедайвал авуна.

¹⁷ Аллагьди Вичин Хва и дуьньядин гьахъ-дуван авун патал ваъ, Адан куьмекдалди и дуьнья хилас авун патал ракъурнавайди я.

¹⁸ Адахъ иман ийизвайдан дуван ийидач, амма Аллагьдин авай-авачир са Хцихъ иман тийизвайдан дуван, ада иман авунвач лугьуз, авуна алатнава.

¹⁹ Абурун дуван и саягъда кьиле фида: дуьньядиз Экв атанва, амма инсанри чӀуру крар ийизвайвиляй абуруз экуьнилай гзаф мичӀивал кӀандай.

²⁰ Гьар ни пис кар ийизватӀа, адаз экв акунани кӀан туш. Вичин алчах крар дуьздал акъат тавун патал, ам экуьнал экъечӀдач.

²¹ Амма дуьз крар ийизвайди, вичин крар виридаз акун патал, экуьнал экъечӀзава. Адаз а крар ийиз куьмек гузвайди Аллагь я эхир.

Исадини Ягьяди цик акахьун къачуз тун

²² Идалай кьулухъ Иса Вичин тилмизарни галаз Ягьудатдиз фена ва гьана, инсанрив цик акахьун къачуз таз са кьадар вахт хьана.

²³ Ягьядини, Салимдивай яргъа тушир Энунда, ана яд гзаф авайвиляй, инсанрив цик акахьун къачуз тазвай. Инсанри, къвез, цик акахьун къачузвай.

²⁴ Ягья а чӀавуз гьеле къазаматда тунвачир.

²⁵ Гьа чӀавуз Ягьядин тилмизринни са чувуддин арада михьивилиз акъудуникай гьуьжет гьатна;

²⁶ абуру, Ягьядин патав атана, лагьана: – Муаллим, ви рикӀел аламани, вун Ярдан вацӀун муькуь пата авайла, ана са Кас авай, вуна адан патахъай шагьидвални авунай. Гила а Касдин патав вири инсанар физва, Ада абурув цик акахьун къачуз тазва.

²⁷ – Инсандихъ авай гьар са затӀ Аллагьди ганвайди я, – жаваб яз лагьана Ягьяди. –

²⁸ Куьн чеб за лагьай гафарин шагьидар я. За квез лагьанай: зун Месигь туш, зун Адакай хабар гуз Аллагьди ракъурнавай чархачи я.

²⁹ Свас авайди чам я. Чамран дуст лагьайтӀа, чамран патав акъвазда ва адан ван къвез шад жеда. Зунни гьахьтин шадвилив ацӀанва.

³⁰ А Кас къвез-къвез виниз хьун, зун къвез-къвез агъуз хьун лазим я.

³¹ Виняй къведайди виридалайни вине жеда, дуьньяда авайди чилел жеда ва чилел алайди хьиз раханни ийида. Цаварилай Къведайди виридалайни вине жеда.

³² Цаварилай Къведайда Вичиз акурдакай ва ван хьайидакай шагьидвал ийизватӀани, садани Адан шагьидвал кьабулзавач.

³³ Ада ийизвай шагьидвал кьабулзавайда, Аллагьди авайвал лугьузвайди тестикьарзава.

³⁴ Аллагьди Вичи Ракъурайдаз кьадар авачир кьван Руьгь ганва, Ракъурайда лугьузвай гафарни Аллагьдин гафар я.

³⁵ Бубадиз Вичин Хва кӀан я, гьавиляй Бубади вири Хцин ихтиярда тунва.

³⁶ Аллагьдин Хцихъ иман ийизвайдаз эбеди уьмуьр жеда, амма Аллагьдин Хцихъ иман тийизвайдаз эбеди уьмуьр аквадач ва ам Аллагьдин хъилек кваз амукьда.