Ягья 18 - Пак Калам

Иса маса гун ва кьун

¹ И гафар лагьана куьтягь хьайила, Иса Вичин тилмизарни галаз Кедрун вацӀалай элячӀна багъ авай патаз фена.

² А чка Исадиз хаинвал авур Ягьудазни чизвай, вучиз лагьайтӀа Иса мукьвал-мукьвал Вичин тилмизарни галаз аниз къведай.

³ Римдин аскерар ва гьакӀни чӀехи хахамрини фарисейри ракъурнавай нуькерар Ягьуд галаз багъдиз атана. Абурув виридав яракьар, чирагъар ва шемгьалар гвай.

⁴ Вичин кьилел къведай вири крар виликамаз чизвай Исади, абурун вилик экъечӀна, лагьана: – Куьн нихъ къекъвезва?

⁵ – Назаретви Исадихъ, – жаваб гана абуру. – Ам Зун я, – лагьана Исади. Абурухъ галаз Иса маса гудай Ягьудни акъвазнавай.

⁶ Ада «Ам Зун я» лагьайла, абур садлагьана кьулухъ хьана, ахпа ярх хьана.

⁷ – Куьн нихъ къекъвезва? – мад хабар кьуна Исади. – Назаретви Исадихъ, – лагьана абуру.

⁸ – За квез лугьузва: Ам Зун я, – жаваб гана Исади. – Куьн Захъ къекъвезватӀа, амайбурув хъфиз тур.

⁹ Ада икӀ Вичи садра лагьай ихьтин гафар кьилиз акъатун патал лагьайди тир: «Вуна Заз гайибурукай За садни квадарнач».

¹⁰ Тур гвай Симун-Петруди тур акъудна, кьилин хахамдин лукӀ яна адан эрчӀи яб галудна; лукӀран тӀвар Малх тир.

¹¹ Амма Исади Петрудиз лагьана: – Тур къакъара хтур! Бубади Зав вуганвай гъам-пияла хъун тавуна жедани?

¹² Гьа чӀавуз аскерри, абурун чӀехида ва чувудрин кьиле авайбуру ракъурнавай гъилибанри Иса кьуна кутӀунна.

¹³ Сифте Ам абуру Гьайнасан патав тухвана; ам Каяфан яран буба тир. Каяф а йисуз кьилин хахам тир.

¹⁴ Халкь патал сад кьейитӀа хъсан жеда лугьуз, чувудриз меслят къалурай Каяф гьам тир.

Петруди Исадикай кьил къакъудун

¹⁵ Симун-Петру ва маса тилмиз Исадин гуьгъуьна аваз фена. А тилмиз кьилин хахамдиз чизвай ва гьавиляй ам Исадихъ галаз кьилин хахамдин гьаятдиз гьахьна.

¹⁶ Петру къецелай варарихъ галамукьна. Са герендилай кьилин хахамдиз таниш тилмиз экъечӀна, варар хуьзвай къаравушдихъ галаз рахана, Петруни галаз гьаятдиз гьахьна.

¹⁷ Инал варар ахъаяй гьа къаравушди Петрудиз лагьана: – Вунни а Касдин тилмизрикай тушни? Петруди «Ваъ» лагьана.

¹⁸ Мекьи тир, лукӀарини нуькерри цӀай хъувуна, цӀун патав акъвазна чпиз чим акъудзавай. Абурун арада, вичиз чим акъудиз, Петруни акъвазнавай.

Кьилин хахамдин силис

¹⁹ Кьилин хахамди Исадивай Адан тилмизрикай ва Ада абуруз гайи чирвилерикай хабарар кьуна.

²⁰ Исади жаваб гана: – Зун вири дуьньядихъ галаз датӀана ачухдиз раханай. Чинеба лагьай гафар Захъ хьайиди туш. Вири чувудар кӀватӀ хьанвай Аллагьдин КӀвалени синагугра За Жуван чирвилер гузвай.

²¹ Вуна Завай вучиз силис кьазва? За лагьайдакай Заз яб гайибурувай хабар яхъ. За вуч лугьузвайтӀа, гьабуруз чида.

²² Исади и гафар лагьайла, Адан патав гвай нуькеррикай сада Адан хъвехъ кутуна яна, Адаз лагьана: – Кьилин хахамдиз гьакӀ жаваб гудани?

²³ Исади жаваб гана: – За чӀуру вуч лагьанатӀа, вуна Заз лагь: За дуьз жаваб ганатӀа, вуна зун вучиз язава?

²⁴ КутӀуннавай Иса Гьайнаса кьилин хахам Каяфан патав ракъурна.

Петруди Исадикай мад кьил къакъудун

²⁵ Симун-Петру цӀун патав вичиз чими ийиз акъвазнавай. Инал адаз абуру лагьана: – Вунни Гьадан тилмизрикай тушни? Ада кьил къакъудна ва «ваъ» лагьана.

²⁶ Кьилин хахамдин лукӀарикай сада, Петруди туруналди яб галудайдан мукьвада, лагьана: – Заз вун Гьадахъ галаз багъда акур хьиз я.

²⁷ Петруди мад Исадикай кьил къакъудна, гьа и арада кӀекре гьарайна.

Иса ПилатӀан вилик

²⁸ Экуьн яралай Иса Каяфан патавай Римдин сердердин дараматдиз тухвана. Чувудар Песагь суварин суфрадихъ ацукьиз гьазур хьанвай, гьавиляй абуруз, чеб чиркин тахьурай лугьуз, утагъдиз гьахьиз кӀанзавачир.

²⁹ ГьакӀ хьайила ПилатӀ вич абурун вилик экъечӀна лагьана: – И Касдик куьне вуч тахсир кутазва?

³⁰ – И Касди са чӀуру кар авунвачиртӀа, чна Ам ви патав гъидачир, – жаваб гана абуру.

³¹ – Ам хутахна Адан дуван куьне куь Къанундалди ая, – лагьана ПилатӀа. – Чаз са касни кьиникьиз акъуддай ихтияр авач, – лагьана чувудрин кьиле авайбуру.

³² Исади Вич гьихьтин ажалдик рекьидатӀа виликамаз лагьайвал, гьам кьилиз акъатдайвал хьана.

³³ Гьа чӀавуз ПилатӀа мад дараматдиз гьахьна, эверна Исадивай хабар кьуна: – Вун Чувудрин Пачагь яни?

³⁴ – Им жува кьатӀанани, я тахьайтӀа ваз масадбуру лагьанани? – жаваб гана Исади.

³⁵ – Зун чувуд яни кьван? – жаваб гана ПилатӀа. – Ви халкьди ва чӀехи хахамри Вун гъана зи гъиле тунва. Вуна вуч авунва?

³⁶ – Зи Пачагьлугъ и дуьньяда авач, – жаваб гана Исади. – Зи Пачагьлугъ и дуьньяда авайтӀа, Зи къуллугъдал алайбуру, Зун чувудрин гъиле тун тавун патал, женг чӀугвадай. Амма гила Зи Пачагьлугъ и дуьньядикай туш.

³⁷ – АкӀ хьайила Вун Пачагь я ман? – лагьана ПилатӀа. – Вуна жува Зун Пачагь я лугьузва, – жаваб гана Исади. – Зун дидедиз хьунни, и дуьньядиз ракъурунни гьакъикъатдикай хабар гун патал я. Гьар вуж гьакъикъатдин пата аватӀа, гьада Зи гафуниз яб гузва.

³⁸ – Гьакъикъат вуч затӀ я? – хабар кьуна ПилатӀа. ИкӀ суал гана, ам чувудрин патав хъфена, лагьана: – Заз адак са тахсирни кваз аквазвач.

Иса кьиникьин къарар

³⁹ Амма квехъ Песагь суварин юкъуз къазаматдай са кас ахъаюн тӀалабдай адет ава. Квез кӀандатӀа, Чувудрин Пачагь ахъайдани?

⁴⁰ Адаз жаваб яз вирида гьарайна: – Ам ваъ, Бараб ахъая. Бараб, лагьайтӀа, къачагъ тир.