Ягья 16 - Пак Калам

¹ За квез ибур, куьне жуван иман квадар тавун патал, лагьайбур я.

² Синагугдай куьн чукурда; гьатта ахьтин вахт къведа хьи, куьн яна кьейи инсанри чпи Аллагьдиз хуш жедай кар авуна лагьана фикирда.

³ Я Зи Буба, я Зун чин тийидайвиляй абуру гьакӀ ийида.

⁴ Амма идакай За квез авиляй ахъайна хьи, а йикъар атайла, За лагьайбур куьне рикӀел хкун лазим жеда. Сифтедилай За квез и гафар лагьаначир, вучиз лагьайтӀа Зун Жув квехъ галай.

Пак Руьгьдин крар

⁵ Гила Зун Жув Ракъурайдан патав хъфизва. Квекай садани «Вун гьиниз хъфизва?» лагьана, Завай хабар кьазвач.

⁶ Вири и крарикай За квез ахъайна лугьуз куь рикӀер хажалатдив ацӀанва.

⁷ Амма За квез авайвал лугьузва: Зун хъфейтӀа, квез хъсан жеда, Зун хъфин тавуртӀа, Несигьатдар куь патав къведач. Зун хъфейла, За Ам куь патав ракъурда.

⁸ Ам атайла, дуьньяди гунагьдикай, гьахъ-михьивиликай ва дувандикай ийизвай дуьз тушир фикирар Ада винел акъудда.

⁹ Ада Захъ иман тавунин гунагьни инсанриз къалурда.

¹⁰ Зун Зи Бубадин патав хъфида ва квез Зун мад ахквадач. И карди инсанриз гьахъ-михьивал чирда.

¹¹ И дуьньядал агъавалзавай бегдин дуван авунва. И карди инсанриз дуван вуч ятӀа чирда.

¹² Захъ квез лугьудай гзаф гафар ама, амма куьн патал абур кьадардилай артух жеда.

¹³ Гьакъикъатдин Руьгь атайла, Ада куьн гьакъикъи рекьяй тухуда. Ада лугьудай гафар Вичи Вичикай туькӀуьрна лугьузвайбур жедач, Ада квез Вичиз ван жезвай гафар лугьуда, инлай кьулухъ жедай крарикайни Ада квез хабар ийида.

¹⁴ Ада квез гудай хабарар Завай къачурбур жеда. Гьа саягъда Ада Зи баркалла къалуриз жеда.

¹⁵ Бубадихъ вуч аватӀа, Захъ авайдини гьам я. Гьавиляй За квез лагьанай: Ада квез гудай хабарар Завай къачурбур жеда.

¹⁶ Са тӀимил чӀавалай квез Зун ахквадач, ахпа са куьруь вахтундилай квез Зун мад ахквада.

Пашманвал шадвилиз элкъуьн

¹⁷ Инал Исадин тилмизрикай са бязибуру чпи чпиз лагьана: – Ада лугьузва: «Са тӀимил вахтундилай квез Зун ахквадач, ахпа са куьруь вахтундилай квез Зун мад ахквада» ва «Зун Бубадин патав физва». Им вуч лагьай чӀал я?

¹⁸ Абуру мад лагьана: – «Са тӀимил вахт» вуч лагьай чӀал я? Ада лугьузвайдан гъавурда чун гьатзавач.

¹⁹ Тилмизриз суалар гуз кӀанзавайди Исади кьатӀана, Ада лагьана: – Куьне сада-садавай За лагьай «Са тӀимил вахтундилай квез Зун ахквадач, ахпа са куьруь вахтундилай квез Зун мад ахквада» лагьай гафарикай жузазвани?

²⁰ За квез лап рикӀивай лугьузва: куьне – шел-хвал, дуьньяди – шадвилер ийида. Куьне хажалатар чӀугвада, амма куь хажалатар шадвилериз элкъведа.

²¹ Папа аял хадай вахт атайла, тӀалри адаз азабар гуда. Аял хьайидалай кьулухъ адан рикӀелай вичиз тӀар хьайиди фида, ам дуьньядал инсан акьалтна лугьуз шад жеда.

²² Куьнни гьакӀ хажалатдик акатнава. Амма Заз куьн мад ахкурла, куь рикӀерни шадвиливди ацӀуда. Куь а шадвал гьич садавайни къакъудиз жедач.

²³ Гьа юкъуз куьне Завай са затӀуникайни хабар кьадач. За квез лап рикӀивай лугьузва: куьне Зи Бубадивай Зи ТӀварцӀелай вуч тӀалабайтӀани, гьам Ада квез гуда.

²⁴ Къедалди куьне Зи ТӀварцӀелай са затӀни тӀалабнач. ТӀалаб ая – квез гуда. Гьа чӀавуз куь шадвал ацӀайди жеда.

Дуьньядал гъалиб хьун

²⁵ Гилалди За куьн кьисаяр мисал гъиз гъавурда твазвай, амма Зун квехъ галаз кьисайралди рахан тийидай вахт къвезва. Гьа чӀавуз Зун квехъ галаз Бубадикай ачухдиз рахада.

²⁶ Гьа чӀавуз куьне Зи ТӀварцӀелай Бубадивай тӀалабда; За квез лугьузва хьи, Бубадивай куьн патал мад са карни За тӀалаб авун лазим хъжедач.

²⁷ Квез Зун кӀан хьана ва куьн Зун Аллагьдин патавай атайдахъ агъуна. Гьавиляй Бубадиз Вичизни куьн кӀанзава.

²⁸ И дуьньядиз Зун Бубадин патавай атана. Гила Зун, дуьнья туна, Бубадин патав хъфида.

²⁹ Исадин тилмизри Адаз лагьана: – Гила Вуна кьисайралди ваъ, ачухдиз лугьузва.

³⁰ Ваз виридакай хабар авайди гила чаз чир хьанва. Ваз Вавай сада хабар кьун герек туш. ГьакӀ хьайила Вун Аллагьдин патавай атанвайдахъ чун агъазва.

³¹ – Гила куьн имандал атанвани? – хабар кьуна Исади. –

³² Ингье, вахт атана мукьвал хьанва, Зун текдиз туна, куьн гьар сад санихъ чкӀида. Амма Зун тек туш, Захъ Зи Буба гала.

³³ И вири гафар За квез, куьн За аваз, Зи патай квез саламатвал гун патал, лагьайди я. И дуьньяда куьне азиятар чӀугвада, амма викӀегь хьухь: Зун дуьньядал гъалиб хьана.