Ягьуд 1 - Пак Калам

Саламар

¹ Иса Месигьдин лукӀ ва Якьубан стха Ягьудан патай. Аллагь Бубади эвернавай, Адаз кӀани тир ва Иса Месигьди хуьзвай вирибуруз.

² Къуй регьим, саламатвал ва муьгьуьббат артух хьурай квез.

Вири тапан муаллимрин дуван авун

³ КӀанибур, заз чи уртах хиласвиликай квез кхьиз гзаф кӀан тир. Амма садра ва эбеди яз Аллагьдин пак халкьдал ихтибарнавай иман хуьн патал квек руьгь кутун за герек яз гьисабна.

⁴ Вучиз лагьайтӀа куь арадиз фадлай чпин дуван авун ганвай ксар чинеба гьахьнава. И чалкечир ксари чи Аллагьдин берекат явавилер давамардай гьалал багьнадиз элкъуьрнава. Абуру чи авай-авачир сад тир Вири Ихтияррин Иеси ва Ребби Иса Месигь инкар ийизва.

⁵ И вири крарикай квез чизватӀани, заз куь рикӀел хкиз кӀанзава хьи, Реббиди Мисридай халкь хиласна, амма ахпа Адахъ агъун тавурбур Ада тергна.

⁶ Чпин дережа техвей ва чпи уьмуьр тухузвай чка гадарай малаикарни Ада даиман зунжурда туна, мичӀивиле, Дувандин чӀехи югъ паталди кьунва.

⁷ Явавилизни тӀебии тушир чӀуру алакъайриз кьил ягъиз хьайи Садумдин, Гамурдин ва абурун патарив гвай шегьеррин агьалияр даиман цӀун жазадик акатун виридаз чешне я.

⁸ Гьа саягъда и хиялкаррини чпин беденар чиркинзава, Аллагьдин агъавал кьабулзавач ва баркалла алайбурукай пис рахазва.

⁹ Гьатта кьилин малаикрикай сад тир Мукаила иблисдихъ галаз Мусадин мейитдикай гьуьжет ийидайла, малаикди вичив иблисдик намусда эцядай жуьреда тахсир кутаз туначир. Ада анжах лагьанай: «Къуй ваз Реббиди жаза гурай».

¹⁰ И инсанри лагьайтӀа, чпиз чин тийидайдал буьгьтен вегьизва; амма чпиз тӀебиатдилай атанвай хесетралди, акьул авачир гьайванри хьиз, абуру чеб тергзава.

¹¹ Гуж я абуруз хьанвайди! Вучиз лагьайтӀа абур Къабилан рекьяй физва ва, регьят къазанжи гьатунихъ къаних яз, абуру Билъама рекьелай алатна авур хьтин крар мад хъийизва, абур чпин гъулгъула себеб яз, Къарагьан кӀеретӀ хьиз, рекьида.

¹² Ахьтин инсанар куь уртах суфрадал алай лекеяр я. Квехъ галаз нез-хъвазвай абур регъуьвал течидай суьруь ваъ, чеб хуьдай чубанар я. Абур гару тухузвай, марф галачир тунгъал цифер я, гьатта зулузни бегьер тегъидай, дувулни галаз акъудна кьве гъилера кьенвай тарар я.

¹³ Абур беябурвилин каф алай гьуьлуьн пехъи лепеяр я, чпиз даим яз са зеррени экв авачир мичӀивиле авай, рехъ алатна къекъвезвай гъетер я.

^14-15 Гьенуха, ирид лагьай несилда Адаман эвледди, гьабурукайни пайгъамбарди хьиз виликамаз икӀ лагьанай: «Ингье, Ребби гзаф агъзурралди Вичин пак малаикар галаз виридан дуван авун патал къведа, ва абурукай чалкечир гунагькарри ягь авачир авур кьван намус галачир вири крар ва Реббидиз акси яз лагьай кьван гафар винел акъудун патал къведа».

¹⁶ И ксари датӀана шикаят ийизва ва абур уьмуьрдикай къана рахазва. Абур чпин алчах ниятрин чӀалал алаз физва, абуру кьадар авачир кьван чӀагурнавай ихтилатар ва хийир паталди чинал ялтах тарифар ийида.

Несигьатдин гафар

¹⁷ Амма куьне, кӀанибур, чи Ребби Иса Месигьдин илчийри виликамаз лагьай гафар рикӀел хуьх.

¹⁸ Абуру квез лугьудай: «Эхиримжи вахтара чин кӀеви яз ягьанатардай, чпин чалкечир ниятрин чӀалал алаз фидай инсанар пайда жеда».

¹⁹ А инсанри чаравилер твазва; абур анжах чпи кьунвай къилихрин геле аваз физва, амма абуруз Аллагьдин Руьгь авач.

²⁰ Амма куьне, кӀанибур, Пак Руьгьда аваз дуьаяр ая, жуван уьмуьрдин хандакӀда пак иман эциг ва ам давамариз хьухь.

²¹ Регьим гваз чаз эбеди уьмуьр гузвай чи Ребби Иса Месигьдал вил алаз, Аллагьдин муьгьуьббатда амукь.

²² Шак ийизвайбурухъ галаз мергьемет гваз хьухь.

²³ Муькуьбур, цӀун юкьвай ахкъудиз, хилас ая; пуд лагьайбуруз регьим ая, амма, мукъаят яз, гунагькар беденди чиркиннавай гьатта партални такӀан хьухь.

Эхир

²⁴ Куьн имандилай алатуникай хуьдай ва куьн Вичин баркалладик шадбур ва рехне квачирбур яз кутадай къуват авайдаз,

²⁵ сад Аллагьдиз, чи Ребби Иса Месигьдин куьмекдалди чи Хиласкар тирдаз шукур, зурбавал, къуват ва гьукум хьурай – вахтарин эвел алукьдалдини, къенин юкъузни ва амай вири асиррани! Амин.