ТӀитӀаз 3 - Пак Калам

Хъсанвал ая

¹ Инсанар чпин чӀехибуруз ва гьукумдиз табий хьун ва гьар са хъсан кӀвалах кьилиз акъудиз гьазур хьун лазим тирди иманийрин рикӀел хкиз хьухь.

² Абур садакайни чӀуру ихтилатар тийиз, къал-къил тийиз, амма вири инсанрихъ галаз хуш рафтарвал хуьз ва къенивал къалуриз вердишарна кӀанда.

³ Са чӀавара чунни ахмакьбур, муьтӀуьгъ туширбур, рекьяй акъатнавайбур, гьар жуьре къизмиш гьевесри ва лезетри алцурарнавайбур ва лукӀвилик кутунвайбур тир. Чи уьмуьр хъилевни пехилвилив ацӀанвай, чун садаз сад акунани такӀанзавай алчахбур тир.

⁴ Амма ахпа Аллагьди, чи Хиласкарди, чаз регьим авуна ва инсан кӀан хьунухъ къалурна.

⁵ Ада чна авур гьахъ-михьивилин крарай ваъ, Вичин регьим тирвал, цӀийи кьилелай дуьньядал хкидай цяй яна гьахъ-михьивилиз акъудуналди ва Пак Руьгьдив цӀийи хъувуналди, чун хиласна.

⁶ Аллагьди Вичин Руьгь чак чи Хиласкар Иса Месигьдин куьмекдалди кутуна.

⁷ Адан берекатдалди гьахъ-михьивилиз акъуднавай чакай вичик умуд кутунвай эбеди уьмуьрдин ирссагьибар хьун патал Ада икӀ авуна.

⁸ И гафар гьахъбур я, ва заз вуна, Аллагьдихъ иман авурбуру хъсан крарихъ гьерекатун патал, и гафарин метлеб кьетӀендиз кьатӀана кӀанзава. Им хъсан ва инсанар патал хийир авай кар я.

Пайи-паяр жемир

⁹ Ахмакь рахунрикай, тухумрикай ийизвай кьуру ихтилатрикай, гьуьжетрикай ва Къанундикай ийизвай къал-къилрикай кьил къакъуда: ибуру хийир гузвач ва абурухъ са метлебни авач.

¹⁰ Пайи-паяр хьунал гъизвайдаз садра-кьведра тагьким ая, амма кьил кьамир.

¹¹ Ахьтин кас михьиз рекьелай алатнава, ада гунагьар ийизва ва идалди ада вичи вичиз кар кьунва.

ТӀалабунар ва саламар

¹² За ви патав я Артамас, я Туьхик ракъурай чӀавуз, зи патав Никапулдиз тади ая, за гьана кьуьд акъудун кьетӀнава.

¹³ Къанундар Зеназ ва АпӀаласаз абурун сиягьатда куьмек це, абурухъ лазим тир вири затӀар хьун патал къайгъу чӀугу.

¹⁴ Къуй чибурни масадбурун игьтияжар таъминарунин рекье хъсанвилер ийиз вердиш хьурай, абурун уьмуьр бегьер галачирди тахьун патал.

¹⁵ Исятда захъ галай вирибуру ваз саламар лугьузва. Чун кӀани вири иманийриз салам. Къуй квехъ виридахъ галаз Аллагьдин берекат хьурай.