Римвийриз 6 - Пак Калам

Гунагь патал кьенва, Аллагь патал чан ала

¹ Бес гила вучда? Берекат гзаф хьун патал, гунагьар авун давамардани?

² Гьелбетда ваъ! Гунагь патал чун кьенва. Гунагьда чавай уьмуьр гьикӀ давамариз хьурай?

³ Чун, Иса Месигьдин ТӀварцӀелай цик акахьун къачунвайбур яз, Адан кьиникьа Адахъ галаз сад хьанвайбур тирди квез чизвачни бес?

⁴ Гьа икӀ Бубадин баркалла алай къудратдалди Месигьдал кьейидалай кьулухъ чан хкайвал, цӀийи жуьреда уьмуьр тухун патал чна цик акахьун къачудай чӀавуз Адахъ галаз кьенвайбур яз кучукнай.

⁵ Чун Адахъ галаз Адан кьиникьа сад хьанатӀа, чун Адахъ галаз Адал чан хтунани сад жеда.

⁶ Чун мад гунагьдин лукӀар тежедайвал, чи уьмуьр гунагьдин гьукумдикай азад авун патал, чи виликан гунагькар тӀебиат Адахъ галаз санал хашуниз ягъайди чаз чизва,

⁷ гьикӀ лагьайтӀа, кьейиди гунагьдикай азад хьанва.

⁸ Чун Месигьдихъ галаз кьенатӀа, Адахъ галаз уьмуьр тухуз жедайдахъни чун агъунва.

⁹ Месигьдал кьена чан хтайдалай кьулухъ Ам мад рекьин тийидайди чаз чизва: ажалдиз Адан винел мад гьукум амач.

¹⁰ Кьейи чӀавуз Ам гунагь патал садра ва эбеди яз кьена, амма, чан алаз, Ада Аллагь патал уьмуьр тухузва.

¹¹ Гьа саягъда Иса Месигьда авай куьнни гунагь патал кьенвайбур яз, амма Аллагь патал чан алайбур яз гьисабзава.

¹² Гьавиляй ажал галай куь беденда гунагьдив агъавал ийиз тамир ва адан гьашер гьевесрин таъсирдик кваз жемир.

¹³ Куь бедендин паяр гунагьдив вугумир, абур гьахъ-михьи туширвилин алатриз элкъуьрмир. Куьне куьн, кьена чан хтайбур хьиз, Аллагьдиз це, куь бедендин паярни Адаз гьахъ-михьивилин алатар яз це.

¹⁴ Гунагьди квел агъавална кӀандач, вучиз лагьайтӀа куьн Къанундин ихтиярда ваъ, берекатдин ихтиярда ава.

Гунагьдин лукӀвиликай азад хьун

¹⁵ Вучда, чун Къанундин ваъ, берекатдин ихтиярда ава лугьуз гунагьар ийидани? Гьелбетда, ваъ!

¹⁶ Квез чизвачни кьван – куьне куьн са низ ятӀани муьтӀуьгъ хьун патал лукӀвиле твазватӀа, квекай адан табий лукӀар жезва: ажалдихъ тухузвай гунагьдин лукӀар ва я гьахъ-михьивилихъ тухузвай чӀалаз килигунин лукӀар.

¹⁷ Аллагьдиз шукур хьурай, куьн гунагьдин лукӀар тир, амма гила куьне квев агакьай тербетдин рехъ кьун рикӀин сидкьидай къетӀ авунва.

¹⁸ Куьн, гунагьдикай хкатна, гьахъ-михьивилин лукӀар хьана.

¹⁹ За идакай, куьн гъавурда такьун мумкин тирди гьисабда кьуна, адетдин чӀалалди лугьузва. Куьне виликдай куь бедендин паяр чиркинвилин ва къанунсузвилин лукӀвиле турвал ва идалди чӀуру кар авурвал, гилани абур паквилихъ тухудай гьахъ-михьивилин лукӀвиле тур.

²⁰ Куьн гунагьдин лукӀар тирла, куьн гьахъ-михьивиликай азад тир.

²¹ А чӀавуз авур ва чпикай гила квез регъуь тир крарикай квез вуч хийир жезвай? Абурун эхир ажал я!

²² Гила лагьайтӀа, куьн гунагьдикай азад хьанва ва квекай Аллагьдин лукӀар хьанва, и кардин майва – паквал, адан эхирни эбеди уьмуьр жеда.

²³ ГьикӀ лагьайтӀа гунагьди гузвай гьакъи ажал я, амма Аллагьдин пай чун Ребби Иса Месигьда хьунай гузвай эбеди уьмуьр я.