Римвийриз 3 - Пак Калам

Аллагьдин вилик инсаниятдин буржи

¹ АкӀ хьайила, чувуд хьунин артуханвал вуч я? Суьннетнавайбурук кваз хьуникай вуч хийир ава?

² Вири патарихъай чӀехи артуханвал ава. Эвелни-эвел чувудрал Аллагьдин Гаф ихтибарунин артуханвал.

³ Абурукай бязибур Аллагьдиз вафа хьаначтӀа, абурухъ вафа тахьунивай Аллагьдин вафавал чӀуриз жедани кьван?

⁴ Гьелбетда, ваъ! Гьар са инсандик таб кватӀани, Аллагь гьакъикъи я, идакай икӀ кхьинни авунва: «Ви гафар гьахъ-михьибур тирди раиж хьун патал, ва Жуван дуванда гъалиб хьун патал» .

⁵ Амма чи чиркинвили ачухдаказ Аллагьдин гьахъ-михьивал къалурзаватӀа, им Аллагьдихъ чакай авай Вичин хъиле гьахъ авач лагьай чӀал жезвани? (Зун инсандиз хас веревирдералди рахазва.)

⁶ Гьелбетда, ваъ! ТахьайтӀа Аллагьдивай дуьньядин дуван гьикӀ ийиз жедай?

⁷ Амма зи тапуни Аллагьдин гьакъикъат къати ийизватӀа ва и саягъда Адан баркалла артухарзаватӀа, вучиз зи дуван, гунагькардин дуван яз ийизва?

⁸ Хъсанвал арадал атун патал, белки, чун писвал ийиз эгечӀин? Фитнебазри чна гьакӀ ийиз чирзава лугьузва. Ахьтин инсанар чпин дуван авуниз лайих я.

Гьахъ-михьи садни авач

⁹ Бес вуч хьанва? Чун, чувудар, масабурулай хъсан гьалда авани? СтӀунни ваъ! Муькуьбур хьиз, чувударни гунагьдин таъсирдик акатнавайдакай чна винидихъ лагьанай.

¹⁰ Кхьенвайвал я: «Гьахъ-михьиди авач, гьич садни авач!

¹¹ Гъавурдик квай садни авач, садани Аллагь жагъурзавач.

¹² Вири рекьяй акъатнава, вири, сад хьиз, ява хьанва, хъсанвал ийирди авач, гьич садни авач» .

¹³ «Абурун кӀалхан ахъа сур я, табзава абуру чпин мецелди» . «Абурун сивел агъу ала гуьрзедин» .

¹⁴ «Абурун сивер къаргъишривни туькьуьлвилив ацӀанва» .

¹⁵ «Иви экъичун паталди абурун кӀвачер йигин я;

¹⁶ абурун рекье барбатӀвални бедбахтвал ава,

¹⁷ чидач абуруз ислягьвилихъ фидай рехъ» .

¹⁸ «Абурун вилера Аллагьдикай кичӀ авач» .

¹⁹ Чаз чизва хьи, винидихъ Къанунда лагьанвайди Къанундик квайбуруз лагьанва. Аллагьдин вилик гьич садазни сив ахъайдай ихтияр авач, вири дуьнья Адан вилик жавабдар я.

²⁰ Къанундал амал авуникди гьич садни Аллагьдин вилик гьахъ-михьивилиз акъуддач. Къанундин куьмекдалди чавай анжах гунагь кьатӀуз жеда.

Имандив кьур гьахъ-михьивал

²¹ Амма гила, Къанундилай аслу тушиз, Аллагьди инсанриз вичикай Къанундини пайгъамбарри шагьидвалзавай гьахъ-михьивал ачухзава.

²² Аллагьдилай къвезвай гьахъ-михьивал Иса Месигьдихъ иман ийизвай виридаз имандалди гузва. Са тафаватни авач:

²³ вирида гунагь авунва ва вири Аллагьдин баркалладикай магьрум хьанва,

²⁴ гьахъ-михьивилиз акъудун вирида гьавая, берекатдив кьурвал, Иса Месигьди гайи эвездин куьмекдалди къачузва.

²⁵ Аллагьди Ам имандал атай вирибур патал мергьемет авунин лишан яз къалурнава. Хашунал авахьай Адан Ивидалди тахсир алуднава. Идалди Аллагьдиз Вичин гьахъ-михьивал къалуриз кӀан хьана. Инсанри виликан асирра авур гунагьрай Аллагьди жаза ганач эхир.

²⁶ Ада яргъалди эхна. Гила, чи вахтунда, лагьайтӀа, Адаз Вичин гьахъ-михьивал къалуриз кӀанзава. Ам Вич гьахъ-михьи я ва Ада Исадихъ иман ийизвайди гьахъ-михьивилиз акъудзава.

²⁷ Гьа икӀ, чакай ийизвай тарифдиз вуч хьана? Ам арадай акъатна. Им гьи къайдадал амална хьайи кар я? Крар кӀанзавай Къанундал? Ваъ, иман кӀанзавай къайдадал.

²⁸ Чна тестикьарзава хьи, Къанундал амал авунилай аслу тушиз, инсандив имандалди гьахъ-михьивилиз акъудун агакьзава.

²⁹ Аллагь тек са чувудрин Аллагь жезвани кьван? Бес Ам муькуьбурун Аллагьни тушни? Гьелбетда, муькуьбурундини я,

³⁰ вучиз лагьайтӀа Ам, имандив кьурвал, суьннетнавайбур хьиз, чпин имандив кьурвал, суьннет тавунвайбурни гьахъ-михьивилиз акъудзавай тек са Аллагь я.

³¹ Им чна имандалди Къанун къуватдай вегьизва лагьай чӀал я жал? Гьелбетда, ваъ! Аксина, чна ам тестикьарзава.