Римвийриз 16 - Пак Калам

Эхиримжи меслятар ва саламар

¹ За иманда чи вах, Кинхерейда авай иманийрин кӀватӀалдин шемас Фуьба куь кӀватӀалда кьабулун патал квез меслят къалурзава.

² Ам Ребби патал, Аллагьдиз талукьбуруз кутугайвал, кьабул ая, адаз вуч лазим хьайитӀани, вири жигьетрай куьмек це. Ада вичини гзафбуруз, гьабурукай яз зазни, куьмекар гайиди я.

³ Иса Месигьдиз ийизвай къуллугъда зи амадагар язвай ПрискӀадизни Акуьлаз саламар лагь.

⁴ Зи гьуьрметдай абуру чпин уьмуьр хатадик кутаз хьанай, абуруз неинки са за, гьакӀни муькуь халкьарикай тир иманийрин вири кӀватӀалрини сагърай лугьузва.

⁵ Абурун кӀвале кӀватӀ жезвай иманийрин кӀватӀалдизни саламар. Асия вилаятда Месигьдихъ сифтегьанди яз иман авур зи играми дуст ЭпенетӀаз саламар.

⁶ Куьн паталди гьакъисагъвилелди зегьмет чӀугур Майрамаз саламар.

⁷ Захъ галаз санал къазаматда хьайи, чеб зи халкьдикай язвай АндраникӀазни Юниядиз саламар. Абур илчийрин арада машгьур я ва абуру гьеле залай вилик Месигьдихъ иман авуна.

⁸ Реббидалди заз кӀани Ампулатаз саламар.

⁹ Месигьдиз ийизвай къуллугъда чи амадаг Урбаназ саламар ва зи играми дуст Истехуьзаз саламар.

¹⁰ Вичи Месигьдиз вафа хуьзвай ва синагърай акъатнавай АпӀелесаз саламар. АристӀапалан кӀвалевай виридаз саламар.

¹¹ Вич зи халкьдикай язвай Гьиридуназ саламар. Наркисан кӀвалевайбурукай чеб Реббидиз талукьбуруз саламар.

¹² Ребби патал зегьмет чӀугвазвай папар язвай ТӀуьрифеназни ТӀуьрифасаз саламар. Ребби патал гьакъисагъдиз зегьмет чӀугвазвай играми Перисазни саламар.

¹³ Реббиди хкянавайди язвай Руф стхадиз ва вичикай зазни диде хьанвай адан дидедиз саламар.

¹⁴ АсинкӀиритӀаз, Ифлеганаз, Гьермадиз, ПӀатӀраваз, Гьермесаз ва абурухъ галай стхайриз саламар.

¹⁵ Филалаз ва Юлиятдиз, Ниреяз ва адан вахаз, гьакӀни АлуьмпӀаз ва абурухъ галайбуруз, Месигьдиз талукь вирибуруз саламар.

¹⁶ Пак темендалди сада садаз салам це. Месигьдиз талукьбурун вири кӀватӀалри квез саламар лугьузва.

¹⁷ За квевай, стхаяр-вахар, тӀалабзава: чаравилер твазвайбурукай ва, квез ганвай чирвилериз акси яз экъечӀиз, инсанрихъ авай иман чӀурзавайбурукай мукъаят хьухь. Абурукай яргъа хьухь.

¹⁸ Ахьтин инсанри чи Ребби Месигьдиз ваъ, чпин руфуниз къуллугъзава. Абуру ширин ва ялтах гафаралди къени́ инсанар алцурарзава.

¹⁹ Куьн чӀалаз килигзавайвиликай виридаз чир хьанва, гьавиляй зун куь гьакъиндай гзаф шад я, амма заз куьн вири хъсан крара камал авайбур ва писвилихъ галаз алакъада авай крара тахсир квачирбур хьана кӀанзава.

²⁰ ГьакӀ хьайитӀа, саламатвал гузвай Аллагьди иблис фад-фад куь кӀвачерик вегьида! Къуй чи Ребби Иса Месигьдин берекат квехъ галаз хьурай.

²¹ Зи амадаг ТӀиматӀея ва зи халкьдикай язвай ЛукӀисди, Ясана ва Саспатара саламар лугьузва.

²² Павела лугьуз и чар кхьизвай за, Тертасани, квез стхавилин саламар лугьузва.

^23-24 Вичин мугьманпересвиликай за ва иманийрин вири кӀватӀалди менфят къачузвай Гаяни квез саламар лугьузва. Шегьердин хазинадар ЭрастӀан ва иманда чи стха язвай Квартан патайни саламар.

²⁵ За муштулух гузвай Иса Месигьдикай Шад Хабарди лугьузвайвал куьн мягькемариз жери Аллагьдиз шукур хьурай. И хабарди асирар алатна фидалди чуьнуьх хьайи сир ачухнава.

²⁶ Исятда а сир, вири халкьар имандиз муьтӀуьгъ хьун патал, эбеди Аллагьдин тагькимдалди, пайгъамбаррин Каламар куьмек яз, ачух хьанва.

²⁷ Камал авай Сад Аллагьдиз эбеди яз Иса Месигь себеб яз шукур хьурай! Амин.