Римвийриз 14 - Пак Калам

Имандал кӀевибурукай ва зайифбурукай

¹ Имандал зайиф инсан, адан фикиррикай гьуьжет тавуна, кьабул ая.

² Садан иманди адаз вири недай ихтияр гузва, амма имандал зайифда анжах салан майваяр незва.

³ Вири незвай кас акӀ тийизвайдаз виняй килигна кӀандач, ва са вуч ятӀани тинезвайда незвайдак тахсир кутуна кӀандач, вучиз лагьайтӀа а кас Аллагьди кьабулнава.

⁴ Чарадан лукӀрак тахсир кутаз вун вуж я кьван? Ам вичин иесидин патал кӀвачел акъвазнавани ва я ярх жезвани тафават авач, ам мад кӀвачел акъвазар хъийида, вучиз лагьайтӀа иесидивай ам кӀвачел акъвазариз жеда.

⁵ Са ни ятӀани йикъар важиб тирбур ва я тӀимил важиб тирбур яз чара ийизва, амма масад патал вири йикъар сад хьтинбур я. Къуй гьар сад вичин фикиррал кӀевиз акъвазрай.

⁶ Са югъ муькуьдалай важиб яз гьисабзавайда и кар Ребби патал ийизва. Са вуч ятӀани незвайда Ребби патал незва, вучиз лагьайтӀа и тӀуьнай ада Аллагьдиз шукур ийизва. И затӀ тинезвайдани Ребби патал незвач ва Аллагьдиз шукурзава.

⁷ Чакай садани жув паталди уьмуьр тухузвач ва садни жув паталди рекьизвач.

⁸ Чна уьмуьр тухузватӀа, Ребби патал уьмуьр тухузва. РекьизватӀа, мадни Аллагь патал рекьизва. Чна уьмуьр тухузвани ва я чун рекьизвани – Гьадаз талукь я.

⁹ ГьикӀ лагьайтӀа и кар патал Месигьни кьена ва чан хтана, Адакай чан алайбурунни, кьенвайбурунни Агъа хьана.

¹⁰ Бес вучиз вуна жуван стхадик тахсир кутазва ва я вучиз адаз винедай килигзава? Чун вири Аллагьдин дувандин вилик акъвазда эхир.

¹¹ Кхьенва кьван: «За жуван уьмуьрдал кьин кьазва, – лугьузва Реббиди, – турус я: зи вилик гьар са мет яда чилиз, гьар са меци шагьидвалда Аллагьдин» .

¹² Гьа икӀ чакай гьар сада жуван паталай Аллагьдин вилик жаваб гуда.

¹³ Гьавиляй мад сада садак тахсир кутун техъйин. Куь стхадин кӀвач галкӀидай ва ам гунагьдал гъидай хьтин мад са карни тахъвун патал, жув жувал мукъаят хьухь.

¹⁴ Вич вичелай чиркин са тӀуьнни авачирди заз, Ребби Исадихъ иман ийизвайдаз, чизва ва идахъ зун кӀевелай агъунва. Амма инсанди са вуч ятӀани чиркин яз гьисабзаватӀа, ам гьа кас патал чиркин я.

¹⁵ Вуна незвай тӀуьн себеб яз ви стхадин-вахан намусдик хкӀазватӀа, вун муьгьуьббатдив кьурвал эгечӀзавач. Вич патал Месигь кьейи стха жуван тӀуьналди барбатӀмир.

¹⁶ Куьне хъсанди яз гьисабзавайдаз себ гудай багьна инсанриз гумир.

¹⁷ Аллагьдин Пачагьлугъ тӀуьникайни хъуникай ваъ, Пак Руьгьди гузвай гьахъ-михьивиликай, ислягьвиликай ва шадвиликай ибарат я.

¹⁸ А саягъда Месигьдиз къуллугъзавайда Аллагьдиз шадвал гузва ва инсанрин патай разивал къачузва.

¹⁹ Гьа икӀ ислягьвилихъ ва сада садаз несигьат гунихъ тухузвай крар авун патал, ша чна вири къуватар эцигин.

²⁰ ТӀуьн себеб яз Аллагьдин крар чӀурмир. Вири тӀуьн михьиди я, амма жуван мукьув гвайди тӀуьнин куьмекдалди гунагьдал гъизвайда пис кар ийизва.

²¹ Як туьтӀуьн, чехир тахъун ва ви стха татабарзавай са карни тавун хъсан я.

²² И гьакъиндай ви фикир Аллагьдин вилик кьилдин ви фикир яз хьурай. Жува хкянавайдай жувак тахсир кутун тийизвайди бахтавар я.

²³ Нез ва гьа са вахтунда вичи кьетӀнавай кар дуьзди тирдал шак гъизвайдак гьакӀни тахсир кутунва, вучиз лагьайтӀа ада вичин имандив кьадайвал ийизвач. Имандив кьан тийизвай вири лагьайтӀа, гунагь я.