Римвийриз 13 - Пак Калам

Гьукумдикай

¹ Гьар са кас кьилевай гьукумдиз табий хьун лазим я, вучиз лагьайтӀа Аллагьди эциг тавунвай гьукум авач. Авай кьван вири гьукумар Аллагьди эцигнавайбур я.

² Гьавиляй гьукумдиз акси яз къарагъзавайди Аллагьди эцигнавайдаз акси яз къарагъзава. ИкӀ ийизвайда вичин дуван ийидайвал ийизва.

³ Гьакимрикай хъсанвал ийизвайбуруз ваъ, писвал ийизвайбуруз кичӀе я. Гьукумдин вилик кичӀевал авачиз уьмуьр тухуз кӀанзаватӀа, хъсанвал ая, ва ваз адан патай аферин къведа.

⁴ Гьукумдин векил Аллагьдин лукӀ я, ам ви хийирдиз я. Вуна писвал ийизватӀа, кӀевиз акъваз, адав тур гьавая гвайди туш гьа. Ам Аллагьдин лукӀ я; ада писвал ийизвайбуруз Аллагьди атӀанвай кар кьазва.

⁵ ГьакӀ хьайила гьукумдиз неинки жазадихъай кичӀевиляй, гьакӀни виждандив кьурвал табий хьана кӀанда.

⁶ Гьавиляй куьне харжар гузва, вучиз лагьайтӀа гьукумдин кьилевайбур Аллагьдин, чеб чпин кардиз бахшзавай лукӀар я.

⁷ ГьакӀ хьайила виридаз низ вуч гун лазим ятӀа це: садаз – харж, муькуьдаз – эхцигай къимет, низ гьуьрмет герек ятӀа, гьадаз – гьуьрмет, нихъай кичӀе ятӀа, гьадахъай кичӀе хьухь.

Муьгьуьббат – Къанун кьилиз акъудун

⁸ Тек са муьгьуьббатда сад садан буржуник хьунилай гъейри, мад са куьналдини саданни буржуник жемир, вучиз лагьайтӀа масад кӀанзавайда Къанун кьилиз акъуднава.

⁹ Ингье гьа им я «зинавал ийимир», «яна рекьимир», «чуьнуьхмир», «темягьда гьатмир» лагьай весийрин мана, ва амай маса тагькимрин манани сад я – «жув хьиз жуван мукьув гвайдини кӀан хьухь».

¹⁰ Муьгьуьббатди мукьув гвайдаз писвал ийизвач, гьавиляй муьгьуьббат вич – Къанун кьилиз акъудун я.

Эхир мукьва хьун

¹¹ Гьа икӀ, куьн ахварикай кватдай вахт атанвайди квез чизва, вучиз лагьайтӀа чи хиласвал чун имандал атай чӀавалай исятда хейлин мукьва хьанва.

¹² Йиф эхирдив агакьзава, ва югъ мукьва жезва. ГьакӀ хьайила ша чна мичӀивилин крар тан ва экуьнин кьеркьер алукӀин.

¹³ Лайихдаказ, чиркин тӀуьнрик-хъунрик, сархушвилик, явавилик, туьнтвилик, къалмакъалдик ва пехилвилик экечӀ тавуна, уьмуьр тухун.

¹⁴ Ребби Иса Месигьдин къамат алукӀа ва жуван гунагькар тӀебиатдиз ва адан гьевесриз кӀандайвал авуникай фикирмир.