Римвийриз 11 - Пак Калам

Аллагьди Вичин халкь инкар тавун

¹ Гьавиляй за хабар кьазва: Аллагьди Вичин халкь инкарнани кьван? Гьелбетда, ваъ! Зун жув исраилви, Бунъяминан тайифадай тир Ибрагьиман эвлед я эхир.

² Аллагьди лап фадлай хкягъай Вичин халкь инкарнач. ГьикӀ лагьайтӀа Ильяса, Каламдай мисалар гъиз, Аллагьдин вилик гьикӀ Исраилдик тахсирар кутунатӀа квез чизва:

³ «Ребби, Ви пайгъамбарарни яна кьена, Ви къурбанганар чукӀурна. Тек са зун амукьна, ва абур зун кьин патал алахънава».

⁴ Амма Аллагьди адаз вуч жаваб гана? «За Жуваз Багьалан вилик метӀер чилиз ягъ тавур ирид агъзур кас хвена!»

⁵ Аллагьдин берекатдив кьурвал хкянавайбур са кьадар исятдани ава.

⁶ Берекатдив кьурвал хкянавайбур ятӀа, абур крариз килигна хкянавайбур туш, тахьайтӀа берекатдикай берекат жедачир.

⁷ АкӀ ятӀа, вуч хьана бес? Исраилди куьхъди гьерекат авунатӀа, адаз гьам гьатнач, анжах хкягъайбуруз гьатна, амайбур, лагьайтӀа, терс хьана.

⁸ Кхьенвайвал хьана: «Гьисс тийирбур авуна абурукай Аллагьди, абуруз такун патал, Ада абурун вилер агална, абуруз ван татун патал, япар агална та къенин йикъал къведалди» .

⁹ Давуда лугьузва: «Къуй абурун суфрадикай абуруз кемен ва желе хьурай, кӀвач галкӀидай къван хьурай, кьисас хьурай.

¹⁰ Абуруз такун патал, вилер буьркьуь хьурай, абурун кӀулар какур хьурай» .

Маса халкьар хилас авун

¹¹ Гьа икӀ за хабар кьазва: Эбеди яз агъуз хьун патал, чувудар татаб хьана жеди? Гьелбетда, ваъ! Амма абур чпин тахсирда агъуз аватуни маса халкьариз исраилвийрик чпикни гъайра гзафардай хиласвал гъана.

¹² Абур агъуз аватуни дуьньядиз девлет гъанатӀа ва абуруз хьайи зиянри муькуьбуруз девлет гъанатӀа, абур имандал атуни гьихьтин чӀехи девлет гъида!

¹³ За квез лугьузва, чувудар туширбур. Куь илчи яз, за зи къуллугъдиз чӀехи къимет гузва.

¹⁴ За са гьикӀ ятӀани абурун гъайра туьнт ийида ва идалди зи халкьдикай са бязибур хьайитӀани хилас ийида лагьана умудзава.

¹⁵ ГьикӀ лагьайтӀа, Аллагьди инкар авуни дуьньядиз туькӀуьн хъувун гъанатӀа, Ада абур мад гъилера кьабулуникай вуч жеда, им кьейидалай кьулухъ чан хтай хьтин кар жедачни?

¹⁶ Тинидин са пай Аллагьдиз талукьарнавайди ятӀа, вири тини Гьадаз талукьарнавайди я; дувул Аллагьдиз талукьарнаватӀа, хилерни Гьадаз талукьарнавайди я.

¹⁷ Къени зейтундин кьилди хилер ханваз, вун, чӀуру зейтун, абурун чкадал кӀалам яз илигнаватӀа ва вуна зейтун тарцин мижедикай хъвазватӀа,

¹⁸ вун абурулай хъсан я лугьуз дамахармир. Вуна вун вине кьазватӀа, дувул вуна ваъ, дувулди вун кьазвайдакай фикир ая.

¹⁹ Белки, вуна лугьуда: «Хилер, зун кӀалам яз илигун патал, хайиди я».

²⁰ Эхь. Абур чпихъ иман авачирвилиз килигна хайиди я, амма вун иман себеб яз кӀевиз акъвазнава. Гьавиляй дамах къачумир, амма кичӀе хьухь.

²¹ ГьикӀ лагьайтӀа Аллагьди тӀебии хилериз инсаф авуначтӀа, Ада вазни инсаф ийидач.

²² Аллагьдин дугъривиликай ва кӀевивал авуникай фикир ая: къакъатайбурухъ галаз кӀевивал авуникай ва вахъ галаз дугъри хьуникай, вични ахьтин шартӀуналди хьи, вуна Адан дугъривилик умуд кутазвай кьван гагьда уьмуьр тухун давамарзава, тахьайтӀа вунни атӀуда.

²³ Чувудар иман гвачиз амукь тавуртӀа, абур мадни кӀалам яз илигда, вучиз лагьайтӀа Аллагьдихъ абур мад илигдай къуват ава.

²⁴ Вун тӀебиатда чӀуру зейтун тарцелай атӀанатӀа ва тӀебиатдиз акси яз къени тарцел кӀалам яз илигнаватӀа, генани хъсандиз тӀебии хилери чпиз мукьва тарцел чка кьада!

Исраилдиз жедай хиласвал

²⁵ Стхаяр-вахар, куьне куьн квез авайдалай артух акьул авайбур яз гьисаб тавун патал, заз куьн ихьтин сирдикай са хабарни авачиз таз кӀанзавач: муькуь халкьарикай тирбур вири тамамдиз Аллагьдин рекьел къведалди, Исраилда авайбурун са кьадар терс жеда.

²⁶ И саягъда, кхьенвайвал, вири Исраил хилас жеда: «Сигьандилай Хиласдайди къведа. Якьубан эвледривай чалкечирвал Ада яргъа ийида.

²⁷ Абурухъ галаз им я Зи Икьрар абурулай гунагьар алудай чӀавуз» .

²⁸ Шад Хабардикай рахун хьайитӀа, и Хабар квев агакьун патал, абурукай куь хатурдай душманар хьана, амма хкягъуникай рахайтӀа, абур Аллагьдиз бан-бубайрин хатурдай кӀан я.

²⁹ Аллагьдин паяр Ада Вичи къуватдай вегьин тийидайбур я, ва Ада Вичи эвер гайибур гадарзавач.

³⁰ Куьн виликдай Аллагьдиз муьтӀуьгъбур тушир, амма гила абур муьтӀуьгъ тахьуниз килигна Аллагьди квез регьим авуна.

³¹ Гила исраилвиярни гьа саягъда муьтӀуьгъ тахьана ава, ва гьа икӀ абурузни регьим авун патал Аллагьди квез регьим авунва.

³² Аллагьди, вири халкьариз регьим авун патал, абур, садни хкуд тавуна, муьтӀуьгъ тежервилин рекьяй тухвана.

Чун аламатдин рекьерай тухузвай Аллагьдиз шукур

³³ Аллагьдин девлетдин, камалдин ва чирвилин деринвал вуч я! Кьиле гьакь тийирбур я Адан къарарар, чириз тежербур я Адан рекьер!

³⁴ «Ни кьатӀана Реббидин акьул ва я вуж я Адаз меслятар гузвайди?»

³⁵ «Ни Адав са чӀавуз бурж вугана, адав Ада бурж вахгана кӀандайвал?»

³⁶ Вири крар Гьадалай, Гьадалди, Гьам паталди я. Шукур хьурай Адаз даим! Амин.