МатӀай 9 - Пак Калам

Фалужди янавайди сагъар хъувун

¹ Гьа чӀавуз Иса луьткведа аваз вирелай элячӀна Вичин шегьердиз хтана.

² Адан патав месел алаз фалужди янавайди гъана. Исади, абурун иман акурла, фалужди янавайдаз лагьана: – ВикӀегь хьухь, чан хва! Ви гунагьрилай гъил къахчунва.

³ Гьа и арада тавратдаррикай са бязибуру чпи чпик лагьана: – Ада Аллагьдиз асивал ийизва.

⁴ – Куьне вучиз куь рикӀера чӀуру фикирар твазва? – абурун фикирар акурла, лагьана Исади. –

⁵ Вуч лугьун регьят я: «Ви гунагьрилай гъил къахчунва» лугьун регьят яни, я тахьайтӀа «Къарагъ, ахлад» лугьун?

⁶ Амма Инсандин Хцихъ гунагьрилай гъил къахчудай ихтияр и дуьньядал авайди квез чир хьун патал, За фалужди янавайдаз лугьузва: «Къарагъ, жуван месни къахчуна кӀвализ ахлад».

⁷ Ам къарагъна, вичин кӀвализ хъфена.

⁸ Халкьдиз и кар акурла, кичӀе хьана ва инсанриз ихьтин алакьун ганвай Аллагьдиз шукурар авуна.

МатӀаякай Исадин тилмиз хьун

⁹ Анай хъфидайла, Исадиз харж кӀватӀдай чкадал ацукьнавай МатӀай лугьудай са кас акуна. – Зи гуьгъуьна аваз ша, – лагьана Исади. МатӀай, къарагъна, Адан гуьгъуьна аваз фена.

¹⁰ МатӀаян кӀвале Ада фу недайла, аниз харж кӀватӀдайбурни муькуь гунагькарар атана, Исадихъни Адан тилмизрихъ галаз ацукьна фу нез эгечӀна.

¹¹ Фарисейриз и кар акурла, абуру Адан тилмизривай хабар кьуна: – Куь Муаллимди харж кӀватӀзавайбурухъни гунагькаррихъ галаз вучиз фу незва?

¹² И гафар ван хьайила, Исади абуруз лагьана: – Жерягь сагъбуруз ваъ, начагъбуруз герек я.

¹³ Алад, фена Каламда авай гафарин мана вуч ятӀа, гьадакай фикира: «Заз квевай кӀанзавайди къурбанд ваъ, регьим я». Зун гьахъ-михьи инсанриз ваъ, гунагькарриз зи патав эвериз атанвайди я.

Сив хуьникай

¹⁴ Гьа чӀавуз Исадин патав Ягьядин тилмизар атана лагьана: – Чнани фарисейрин тилмизри сивер гзаф хуьзва, бес Ви тилмизри вучиз хуьзвач?

¹⁵ – Чам чпихъ галамай кьван гагьда мехъерин мугьманривай перишан яз акъвазиз жедани? – лагьана Исади. – Амма са чӀав атана, чпивай чам къакъудайла, абуру сив хуьда.

¹⁶ Гьич садани цӀуру пекериз цӀийи парчадикай пине ядач, ягъайтӀа, цӀийида цӀуруди акъажна, тӀеквен авайдалайни чӀехи ийида.

¹⁷ Гьич садани цӀийи чехир куьгьне целериз цадач. ЦайитӀа, чехирди цӀуру цел хъиткьинарда – вун чехирдикайни жеда, целерикайни. ЦӀийи чехир цӀийи целера цада. Гьа чӀавуз цӀийи чехирни сагъ амукьда, цӀуру целерни.

Гьакимдин рушал чан хкун

¹⁸ И гафар Исади Ягьядин тилмизриз лугьудайла, Адан патав са гьаким атана. – Зи руш гьа исятда кьенва, тавакъуйда, атана адал гъилер эциг, ам чандал хкведа, – Адаз икрам авуна, лагьана гьакимди.

¹⁹ Исани тилмизар гьа касдин гуьгъуьна аваз фена.

²⁰ Ингье, цӀикьвед йисуз къеняй иви физ азиятдик квай папа, кьулухъай атана, Исадин парталдин ценек гъил кяна.

²¹ А папа вичи вичик виликамаз кьетӀнавай: – За Адан парталдик гъил кягъайтӀа, зун сагъ хъжеда.

²² Элкъвена ам акур Исади лагьана: – КӀевиз акъваз, чан руш! Ви иманди вун хиласна. Гьа сятдилай а паб сагъ хъхьана.

^23-24 Исади, гьакимдин кӀвализ атана, кфилдал ясдин макьамар язавайбурни лугьунарзавайбур акурла, абуруз лагьана: – ЭкъечӀ инай, руш кьенвач, ам ксанва. Амма анал алай инсанар адал хъуьрена.

²⁵ КӀваляй инсанар акъудайла, Ада атана рушан гъил кьуна, рушни къарагъна.

²⁶ И кардикай ван гьанин вири чилерал чкӀана.

Кьве буьркьуьди сагъар хъувун

²⁷ Иса анай хкведайла, Адан гуьгъуьна кьве буьркьуьди гьатна. – Давуд пачагьдин Хва! – гьарайзавай абуру. – Чаз регьим ая!

²⁸ Ам кӀвализ хтайла, буьркьуьбур Адал алкӀана. Исади абуруз лагьана: – Залай куьн сагъар хъийиз алакьдайдахъ куьн агъунвани? – Эхь, Агъа! – лагьана абуру.

²⁹ Гьанал Ада абурун вилерик гъил кяна, лагьана: – Куьне Захъ иман ийизватӀа, куь рикӀе авай гьар са кар За кьилиз акъудда.

³⁰ Абурун вилер ахъа хьана. – Килиг гьа, Зун вуж ятӀа, садазни чир тахьурай, – кӀевелай лагьана Исади.

³¹ Амма абуру, анай экъечӀна, гьа чил тирвал Исадикай ван-сес туна.

Лал кас сагъарун

³² Буьркьуьбур экъечӀдайла, Исадин патав жинерар квай са лал кас гъана.

³³ Адакай жинерар хкудайла, лалдай чӀал акъатна. Мягьтел хьайи халкьди лугьуз хьана: – Ихьтин кар Исраилда садазни акурди туш.

³⁴ Амма фарисейри Исадикай лагьана: – Жинерар хкуддай къуват Ада жинеррин кьилевайдавай къачузва.

Гвен гзаф я, гуьдайбур – тӀимил

³⁵ Гьа икӀ шегьеррани хуьрера къекъвез, Исади синагугра, чирвилер гуз, Цаварин Пачагьлугъдин вахт атанвайдакай Шад Хабар гуз, инсанрин тӀалар ва азарар сагъар хъийиз хьана.

³⁶ Гзаф халкь акурла, Адаз абурун язух атана. Абур, чубан авачиз, аман атӀанвай, кичӀ акатай хипер хьиз авай.

³⁷ Гьа чӀавуз Ада Вичин тилмизриз лагьана: – Гвен бул я, гвен гуьдайбур – тӀимил.

³⁸ ГьакӀ хьайила, гвенин Иесидивай гвен гуьдайбур мад ракъурун тӀалаб ая!