МатӀай 8 - Пак Калам

Жузам азар квайди сагъар хъувун

¹ Иса пелелай агъуз эвичӀдайла, Адан гуьгъуьна гзаф халкь гьатна.

² Адан патав жузам азарди кьунвай са касди, атана, икрам авуна: – Я Агъа! – лагьана ада. – Ваз кӀан хьайитӀа, Вавай Зун сагъар хъийиз жеда!

³ Исади гъилер яргъи авуна, адак гъил кяна, лагьана: – КӀанзава Заз, сагъ хъхьухь! Гьа гафунилай кьулухъ, садлагьана, жузам хкатна, ам сагъ хъхьана.

⁴ – Килиг гьа, гьич садазни чуькьмир, амма, хахамдин патав фена, жув гьадаз къалура, – лагьана Исади. – Вун азар хкатунин сагълугъдай Мусадин Къанундив кьадайвал къурбандни це. Гьа идалди вун дири хъхьанвайди чир хьурай.

Вач-хъша сагъар хъувун

^5-6 Иса Кефернагьум шегьердиз гьахьайла, Адан патав Римдин аскеррин кьиле авайди атана: – Я Агъа! – минетдалди лагьана ада. – Зи вач-хъша фалужди яна кӀвале къатканва, адаз тади гузва.

⁷ – За атана ам сагъар хъийида, – лагьана Исади.

⁸ – Я Агъа! – лагьана аскеррин кьиле авайда. – Вун зи кӀвачел зи кӀвализ атуниз зун лайих туш. ЯтӀани, зи вач-хъша сагъ хъийидай са гаф лагь.

⁹ Зун масадан гъилик квай инсан ятӀани, захъ жуваз табий аскерарни ава. Абурукай садаз за «Алад» лагьайтӀа, ам фида. Муькуьдаз «Инал ша» лагьайтӀа, ам къведа. Зи вач-хъшадиз «и кар ая» лагьайтӀа, ада ам гьасятда ийида.

¹⁰ И гафарин ван хьайи Иса мягьтел хьана, Ада Вичихъ галаз къвезвай инсанриз лагьана: – За квез рикӀивай лугьузва: Исраилдани заз икьван Захъ иман ийизвай са касни акунач.

¹¹ За квез лугьузва хьи, гзафбуру, рагъэкъечӀдай ва рагъакӀидай патарай атана, Цаварин Пачагьлугъда жедай межлисда Ибрагьиман, Исакьан ва Якьубан патарив чпин чкаяр кьада.

¹² Амма чеб гьа Пачагьлугъдин векилар яз гьисабзавайбур а межлисдиз ахъайдач, абур мичӀи къецел гадарда. Ана абуру сасни регъведа, шел-хвални ийида.

¹³ Исади аскеррин кьиле авайдаз лагьана: – Алад, вуна Захъ икьван иман ийизватӀа, ви рикӀе авай гьар са кар За кьилиз акъудда. Адан вач-хъша гьасятда сагъ хъхьана.

Гзафбур сагъар хъувун

¹⁴ Петрудин кӀвализ атайла, Исадиз адан яран диде ифин алаз къатканваз акуна.

¹⁵ Исади адак кянамазни, ифин алатна. Ам къарагъна абурун кьилел-кӀвачел элкъвез эгечӀна.

¹⁶ Няни хьайила, Исадин патав жинерар квай гзафбур гъана. Ада Вичин гафуналди абурукай жинерар хкудна, азарар квайбур сагъар хъувуна.

¹⁷ Гьа икӀ Яшай пайгъамбарди лагьай ихьтин гафар кьилиз акъатна: «Ам, чи азарар Вичел къачуна, гваз хъфена».

Исадин гуьгъуьнаваз физ кӀанзавайбур

¹⁸ Исадиз Вичин патав гзаф халкь гваз акурла, Ада Вичин тилмизриз вирин муькуь патаз экъечӀун эмир авуна.

¹⁹ Гьа чӀавуз са тавратдарди атана Адаз лагьана: – Муаллим! Вун гьиниз фейитӀани, зунни Ви гуьгъуьна аваз къведа.

²⁰ – СикӀерихъ магъараяр жеда, цавун къушарихъни – мукар, амма Инсандин Хцихъ кьил эцигдай са чка авач, – жаваб гана Исади.

²¹ Ахпа масада, Адан тилмизрикай сада, Адаз лагьана: – Я Агъа! Вуна заз фена эвел зи буба кучукдай ихтияр це.

²² Амма Исади лагьана: – Вун Зи гуьгъуьна аваз ша, кьейибур къуй чан алай мейитри кучукрай.

ТӀурфан секинарун

²³ Иса луьткведа акьахайла, Адан гуьгъуьна аваз Адан тилмизарни акьахна.

²⁴ Вирел ахьтин тӀурфан акьалтна хьи, луьткве лепейрик акатиз хьана; амма Иса ксанвай.

²⁵ Гьа чӀавуз тилмизар Адан патав атана, Ам ахварай авудна, лагьана: – Я Агъа! Чун цин кӀаниз язава, чун хилас ая.

²⁶ – Квез вучиз икьван кичӀе я, иманда зайифбур? – лагьана абуруз Исади. Ам къарагъна, гарузни вириз «Кис хьухь» лагьана эмир гана, вирин кьуд пата лал кьена.

²⁷ Тилмизар мягьтел хьана: – И Вичиз гарарни вир муьтӀуьгъарзавайди вуж хьуй? – лагьана абуру.

Гадарейда жинерар хкудун

²⁸ Иса муькуь къерехда авай Гадарей уьлкведиз фейила, Адал жинерар квай кьве кас гьалтнай. Абур кьейибур твадай кьветӀерай-сурарай экъечӀнавайбур тир. Абур акьван хата квайбур тир хьи, кьветӀерин патав гвай гьа рекьяй гьич садавайни физ жедачир.

²⁹ Абуру гьарайна лагьана: – Ваз чавай вуч кӀанзава, Аллагьдин Хва? Вун иниз чун азабрик кутадай вахтунилай вилик атанва.

³⁰ Абурукай яргъал хьиз вакӀарин са чӀехи суьруьди векь незвай.

³¹ Жинерри Исадиз минетиз хьана: – Вуна чун и инсанрикай хкудиз хьайитӀа, чун Вуна атӀа вакӀарик кухтур.

³² – ХкечӀ, – лагьана Исади. Абурни инсанрикай хкечӀна, фена а вакӀарик акахьна. ВакӀарни, гьасятда са чархалай хкадарна, вирин кӀаниз яна.

³³ ВакӀарбанарни чукурна шегьердиз хтана. Ана абуру жинерар квайбурун кьилел атайдакай ва вакӀариз хьайидакай ахъайна.

³⁴ Инлай шегьерда авай кьван вири инсанар Исадиз килигиз Адан вилик экъечӀна. Ам акурла, халкьди Адавай чпин чилерилай хъфин тӀалабнай.