МатӀай 7 - Пак Калам

Масадан дуван авуникай

¹ Куьне масадан дуван аквамир, Аллагьди куь дуванни аквадач.

² Куьне гьихьтин дуван ийизватӀа, Аллагьди куь дуванни гьакӀ ийида. Куьне гьихьтин уьлчмедалди алцумайтӀа, квезни гьахьтин уьлчмедалди алцумда.

³ Жуван виле авай чукьван такваз, вучиз ваз ви стхадин виле авай кьал аквада?

⁴ Я тахьайтӀа, вавай, жуван виле авай чукьван такваз, ви стхадиз, къала за ви виле авай кьал акъудда лугьуз жедани?

⁵ Кьве чин алайди! Сифте жуван виле авай чукьван акъуд, ахпа ваз жуван стхадин виле авай кьал акъуддайвал аквада.

⁶ КицӀерин вилик пак затӀар вегьимир, абуру, вал вегьена, вун кӀус-кӀус ийида. ВакӀарин вилик жуван гевгьерар гадармир. Абуру адаз кӀур гуда.

Мад гъилера дуьадикай

⁷ ТӀалаба – квез гуда; къекъуьгъ – квез жагъида, рак гатут – квез ахъайда.

⁸ Гьар ни тӀалабайтӀа, гьада къачуда, вуж къекъвейтӀа, гьадаз жагъида, ни рак гатайтӀа, гьадаз рак ахъайда.

⁹ Хци фу це лагьайла, квекай гьич са бубадини фан чкадал адав къван вугудач.

¹⁰ Хци гьуьлуьн гъед тӀалабайла, адан чкадал гъуьлягъ гудач.

¹¹ Куьн хьтин писбуру чпин аялриз хъсан савкьватар гуз хьайила, цавараллай Бубадивайни Вичивай тӀалабайдаз хъсан савкьватар гуз жедачни мегер?

¹² Гьа икӀ, инсанри куьн патал вуч авуна кӀанзаватӀа, куьнени гьабуруз гьахьтин крар ая. Къанундини пайгъамбарри гьа икӀ лугьузва.

МуьтӀуьгъ хьуникай

¹³ Фидайла гуьтӀуь варарай алад, гьяркьуь варарини гегьенш рекьи жегьеннемдиз тухуда. Гзафбур гьахьтин рекьяй физва.

¹⁴ ГуьтӀуь варарини четин рекьи уьмуьрдихъ тухуда, а рехъ тӀимилбуруз жагъида.

¹⁵ Куь патав хипер хьиз къвезвай тапан пайгъамбаррикай мукъаят хьухь, къеняй абур вагьши жанавурар я.

¹⁶ Квез абур майвайрилай чир жеда. Мегер къвакъвадин вала ципицӀ гъидани? Къалгъандилай инжил атӀуз женни?

¹⁷ Хъсан тарци хъсан майваяр гъида, чӀуру тарци – чӀуру майваяр.

¹⁸ Хъсан тарцивай чӀуру майваяр гъиз жедач, пис тарцивайни – хъсан майваяр.

¹⁹ Хъсан майваяр тегъизвай гьар гьи тар хьайитӀани атӀана цӀуз гадарда.

²⁰ ГьакӀ хьайила квез абур чпин майвайрилай чир жеда.

²¹ Заз «Агъа, Ребби» лугьузвай кьванбур вири Цаварин Пачагьлугъдиз акъатдач, Аниз акъатдайди анжах Зи Бубадин къаст кьилиз акъудзавайди я.

²² Къияматдин юкъуз гзафбуру Заз лугьуда: «Я Агъа, я Ребби, Аллагьдин гафар Ви ТӀварцӀелай инсанрал агакьарайди чун туширни? Ви ТӀварцӀелай жинерар хкудзавайбурни чун туширни? Гзаф аламатарни чна Ви ТӀварцӀелай авуначирни бес?»

²³ Ахпа За абуруз лугьуда: «Заз куьн гьич чидайбур туш. Алат Залай, куьне чӀуру крар гзаф авуна».

Мягькем ва гъуьргъуь хандакӀрикай

²⁴ Зи Гафариз яб гуз, абур кьилиз акъудзавайди, акьул авай, кӀвал эцигдайла, кӀвалин бине къванцел эцигай инсандиз ухшар я.

²⁵ Марф къвана, вацӀар алахьна, гарар акъатна. Вири гьа кӀвалихъ элкъвена, амма, бинеда чархунин къван ава лугьуз кӀвал чкӀанач.

²⁶ Амма зи гафариз яб гуз, абур кьилиз акъуд тийизвайди кӀвал хандакӀ авачиз, къумадал эцигнавай ахмакьдиз ухшар я.

²⁷ Марф къвана, вацӀар алахьна, гарар акъатна гьа кӀвалел ацалтна. КӀвал ацахьна, зурбадаказ чкӀана.

²⁸ Исади Вичин гафар лагьана куьтягьайла, Адан чирвилери вири мягьтеларнай,

²⁹ вучиз лагьайтӀа Исади Вичин чирвилер абурун тавратдарри хьиз гузвачир. Ада Вичин чирвилер гъиле вири гьукум авайда хьиз инсанрал агакьарзавай.