МатӀай 6 - Пак Калам

Садакьадикай

¹ Килиг гьа, инсанар алай чкадал жува жув къалурун патал, хъсанвилер ийимир, тахьайтӀа цавараллай куь Бубадин патай квез суваб къведач.

² Гьа икӀ, садакьа инсанриз акурай лагьана гумир. ИкӀ, инсанрин арада чпин тӀвар-ван гьатрай лугьуз, синагуграни куьчейра кьве чин алайбуру ийизва. За квез рикӀивай лугьузва хьи, гьахьтинбурувни чпин эвез агакьнава.

^3-4 Садакьа гудайла, вуна ийизвай хъсанвал акьван сир кваз хьурай хьи, гьатта ви эрчӀи гъили ийизвайди чапла гъилиз чир тахьурай. Вуна сир хвена ийизвай хъсанвал аквазвай Бубади ваз суваб гуда.

Дуьадикай

⁵ Дуьа ийидайла, кьве чин алайбуру хьиз ийимир. Абуруз синагуграни куьчейрин пипӀерал инсанриз аквадай чкайрал акъвазна дуьаяр ийиз пара кӀанда. За квез рикӀивай лугьузва: гьахьтинбурувни чпин эвез агакьнава.

⁶ Дуьа ийидайла, жуван кӀвализ гьахьна, рак агална жуван таквазвай Бубадиз дуьа ая. Чинебанди аквазвай ви Бубади ваз суваб гуда.

⁷ Дуьа ийидайла, мажусийри хьиз, куьне артухан гафар лугьумир. Абуру, чеб гзаф рахайла, чпин ван Аллагьдиз къведа лагьана фикирзава.

⁸ Абуруз ухшар жемир, квехъ вуч игьтияж аватӀа, куьне ам тӀалаб ийидалди виликамаз Бубадиз адакай хабар ава.

⁹ Дуьа икӀ ая: Цавараллай чи Буба, пак хьурай Ви ТӀвар!

¹⁰ На пачагьвал ийидай алукьрай чӀавар. Цаварал хьиз, чилелни къадим хьуй Ви къаст.

¹¹ Чи гьар йикъан са кап фу къемаз це На чаз.

¹² Чпел буржар алайбурлай къахчунвайтӀа гъил чна гьикӀ, ГьакӀ Вунани чал аламай буржарилай гъил къахчу.

¹³ Темягьрикай яргъаз ая, шийирдикай хуьх На чун. Куьз лагьайтӀа Вуна чаз ийидай а чӀехивал – гьам къуват, гьам даиман баркалла я асирра. Амин.

¹⁴ Куьне квек тахсир кутазвайбурулай гъил къахчуз хьайитӀа, цавараллай куь Бубадини квелай гъил къахчуда.

¹⁵ Куьне квез писвалзавай инсанрилай гъил къахчун тийиз хьайитӀа, куь Бубадини куь тахсиррилай гъил къахчудач.

Сив хуьникай

¹⁶ Сив хуьдайлани, кьве чин алайбур хьиз, пашмандаказ акъвазмир. Чпи сив хуьзвайди инсанриз акурай лугьуз, абуру чпин чинар чӀурда. За квез рикӀивай лугьузва хьи, гьахьтинбурални чпин эвез агакьнава.

¹⁷ Вуна, сив хуьдайла, жуван кьиливай чӀем гуьцӀна, чин-гъил чуьхуьх.

¹⁸ АкӀ авуртӀа, вуна сив хуьзвайди садазни чир жедач. Вуна сив хуьзвайди ваз таквазвай ви Бубадиз аквада. Чинебанди аквазвай ви Бубади ваз суваб гуда.

Девлетдикай

¹⁹ И дуьньяда девлет кӀватӀмир; и дуьньяда ам гъуьчӀрени муьрхъуь тергда, угърийри атана, ви девлет чуьнуьхда.

²⁰ Девлет жуваз цаварал кӀватӀа, ана ам я гъуьчӀре, я муьрхъуь тергдач, я угърийри атана чуьнуьхдач.

²¹ Ви девлет гьина аватӀа, ви рикӀни гьана жеда.

²² Бедендин чирагъ вилер я, вилер михьи ятӀа, инсан экуьнай ацӀана жеда.

²³ Вилер чӀуру ятӀа, инсан мичӀивиле гьатда. Ви къене авай экв мичӀиди ятӀа, а мичӀивал виле эцягъай тӀуб акван тийидайди жеда.

²⁴ Гьич садавайни кьве агъадиз къуллугъ ийиз жедач: абурукай сад кӀан хьайитӀа, муькуьди такӀан жеда; садаз вафавал хвейитӀа, муькуьдаз – жедач. Аллагьдизни пулуниз квевай сад хьиз къуллугъ ийиз жедач.

Къайгъуйрикай

²⁵ ГьакӀ хьайила За квез лугьузва: вуч недатӀа ва я вуч хъвадатӀа лугьуз, жуван чан патал ва вуч алукӀдатӀа лугьуз жуван беден патал къайгъуйрик жемир. Чан тӀуьнилайни, беден пекерилайни артух тушни?

²⁶ Къушариз килиг: абуру я цазвач, я гуьзвач, я бегьер хуьдай чкайра кӀватӀзавач, амма цавараллай Бубади абуруз тӀуьн гузва. Куьн къушарилай артух тушни мегер? Квезни Аллагьди гуда!

²⁷ Кат-галтуг авуналди квевай нивай жуван уьмуьр са сятдин хьайитӀани артухариз жеда?

²⁸ Пекерин къайгъудани куьн гьатмир. Бубуяр гьикӀ экъечӀзаватӀа килиг: абуру я зегьмет чӀугвазвач, я са затӀ хразвач.

²⁹ Амма За квез лугьузва хьи, гьихьтин иер пекер алай Сулейман пачагьни и цуькверикай садав гекъигиз хьун мумкин туш.

³⁰ Къе никӀяй экъечӀна пака къулаз вегьидай векь Аллагьди гьикӀ чӀагурзаватӀа килиг! Ада а векь квелай артух чӀагурзавани, эй иманда зайифбур!

³¹ Гьа икӀ, куьн вуч неда, я вуч хъвада, я тахьайтӀа вуч алукӀда лугьуз къайгъуйрик жемир.

³² Мажусияр тӀуьн-хъунихъ галтугзавайбур я, цавараллай куь Бубадиз ибур вири квез герек тирди чизва.

³³ Гьавиляй сифте куьне Аллагьдин Пачагьлугъ ва Адан гьахъ-михьивал жагъура. Амайди Ада квез кӀукӀни алаз гуда.

³⁴ Гьа икӀ, пакагьан йикъан къайгъу чӀугвамир, адан къайгъуда пака хьухь. Къенин юкъуз къенин къайгъуярни бес я.