МатӀай 26 - Пак Калам

Иса рекьиз кӀан хьун

¹ Исади вири и гафар лагьана куьтягьайдалай кьулухъ Вичин тилмизриз лагьана:

² – Кьве йикъалай Песагь сувар жедай юкъуз, Инсандин Хва маса гана хашуниз ядайди квез чир хьухь.

³ Гьа чӀавуз Каяф тӀвар алай кьилин хахамдин кӀвалера чӀехи хахамар ва чувудрин агъсакъалар кӀватӀ хьана,

⁴ ана абуру Иса фендиналди кьуна, кьин меслятна.

⁵ Амма абуру лугьузвай: – Халкьдик гъулгъула акат тавун патал, Ам сувар юкъуз ваъ, гьакӀан юкъуз кьуна кӀанда.

Иса Бетан хуьре

⁶ Иса Бетанда, жузам азарди кьунвай Симунан кӀвале авайла,

⁷ Адан патав багьа атир авай хъенчӀин гичин гвай паб атана. Ада суфрадихъ ацукьнавай Исадин кьилел атир илична.

⁸ И кар акур Адан тилмизриз хъел атана. – А атирар вучиз гьакӀ серфна вара-зара ийизва? – лагьана абуру. –

⁹ Ам чӀехи пулунихъ маса гана, а пул кесибрин арада пайиз жедай.

¹⁰ Амма Исади, адан гъавурда гьатна, лагьана: – Квез и папакай вучиз хъел къвезва? Ада Заз хъсанвал авуна.

¹¹ Кесибар датӀана квехъ галаз амукьда, Зун квехъ датӀана галамукьдач.

¹² Зал атирар илична, ада Зун кьветӀе-сура динж авуниз гьазурна.

¹³ За квез рикӀивай лугьузва: Шад Хабардикай муштулухар гудай кьван чкайра и папа авур хъсан кар раиж жеда, ам инсанрин рикӀелай алатдач.

Ягьудда Иса маса гун

¹⁴ Гьанлай цӀикьвед илчидикай сад, Искарият Ягьуд тӀвар алайди, чӀехи хахамрин патав фена

¹⁵ ва абуруз лагьана: – За Иса куь гъиле туртӀа, куьне заз вуч гуда? Абуру адаз къанницӀуд гимишдин пул хиве кьуна.

¹⁶ Гьанлай, Иса гьикӀ маса гудатӀа лугьуз, Ягьуд са къулай вахтунихъ къекъвез хьана.

Песагь суварин тӀуьн-хъун

¹⁷ ТӀили фарин суварин сад лагьай юкъуз тилмизар Исадин патав атана. – Чна Ваз Песагь суварин суфра гьина гьазурин? – жузуна абуру.

¹⁸ – Шегьердиз флан касдин патав алад, – жаваб гана Исади, – ва адаз лагь: «Муаллимди лугьузва: „Зи вахт атанва. Жуван тилмизарни галаз Зун ви кӀвале Песагь суварин суфрадихъ ацукьда“».

¹⁹ Тилмизрини чпиз лагьайвал авуна. Абуру Песагьдин тӀуьн гьазурна.

²⁰ Няни хьайила, Иса Вичин цӀикьвед илчини галаз суфрадихъ ацукьна.

²¹ Абуру фу незвайла, Исади абуруз лагьана: – За квез рикӀивай лугьузва: квекай сада Зун хаинвилелди маса гуда.

²² Дерин хажалатдик акатай абуру са-сада Адаз лугьуз хьана: – Зун яз тахьуй гьа, Агъа?

²³ Адани абуруз жаваб яз лагьана: – Захъ галаз хуьрекдик кягъайда Зун маса гуда.

²⁴ Инсандин Хци Вичин уьмуьр Каламда кхьенвайвал тухузва, амма Инсандин Хва маса гудайдан кьилел къведайди ма́са гуж я! А касдиз дуьньядал атаначиртӀа, гена хъсан тир.

²⁵ Исади и гафар лагьайла, Ам маса гуз гьазур хьанвай Ягьудани лагьана: – Зун яз тахьуй, Муаллим? – Вуна гьакӀ я лугьузва, – жаваб гана Исади.

²⁶ Абур тӀуьник квайла, Исади фу къачуна, хийир-дуьа ийиз-ийиз, ам кӀус-кӀус авуна, тилмизриз пайна, лагьана: – Ма, къачу, неъ, им Зи Беден я!

²⁷ Ахпа Ада сукӀра къачуна, хийир-дуьа авуна, ам абурув вугана, лагьана: – Инай вирида хъухъ.

²⁸ Им Зи Икьрардин иви я. Ам гзафбурун гунагьрилай гъил къахчун патал авахьда.

²⁹ За квез лугьузва хьи, къенин йикъалай эгечӀна За мад чехир – ципицӀрин миже, – хъвадач. ЦӀийи чехир За анжах Зи Бубадин Пачагьлугъда квехъ галаз хъвада.

Петруди кьил къакъудуникай

³⁰ Шукурдин манияр яна, Исани тилмизар Зейтун пелел экъечӀна.

³¹ Ана Исади тилмизриз лагьана: – Къе йифиз куьн садни Захъ иман ийиз амукьдач. Каламда кхьенвай «За чубан яна кьейила, суьруьда авай лапагар гьар сад санихъ чкӀида» лугьудай гафар Зи кьилел къведа.

³² Зал чан хтайла, Зун квелайни вилик Галилейдиз атана акъатда.

³³ Амма Петруди жаваб яз лагьана: – Амайбуру вахъ иман ийиз тамукьайтӀани, зун Вахъ иман ийиз амукьда.

³⁴ – За ваз рикӀивай лугьузва: къе йифиз кӀекре гьарайдалди вуна Закай пудра кьил къакъудда, – лагьана Исади.

³⁵ – Вахъ галаз санал рекьидай чкадал атайтӀани, Вакай за са чӀавузни кьил къакъуддач, – лагьана Петруди. Ихьтин гафар амай тилмизрини лагьанай.

Гетсеман багъда Исади дуьа авун

³⁶ Ахпа Иса абурухъ галаз Гетсеман лугьудай чкадиз атана: – За дуьаяр ийидалди куьн инал хьухь, – лагьана Ада тилмизриз.

³⁷ Вичихъ галаз Петруни Зебедеян кьве хвани къачуна, Ам фена. Гьана Адак гъамни дарихвал акатна.

³⁸ Исади абуруз лагьана: – Зи рикӀ ажалдин тӀалди незва, куьн, инал ксун тавуна, Захъ галаз акъваз.

³⁹ Са тӀимил анихъ фена, Исади, чинихъди ярх хьана, дуьаяр авуна: – Зи Буба! Мумкин кар ятӀа, и гъам пияла Зав хъваз тамир; ятӀани, Заз кӀандайвал ваъ, Ваз кӀандайвал хьурай.

⁴⁰ Элкъвена хтайла, Адаз тилмизар ахварал фенваз акуна. – Квевай са сятда кьванни уяхдиз Захъ галаз акъвазиз хьаначни? – лагьана Ада Петрудиз. –

⁴¹ Уях хьухь, куьн темягьра гьат тавурай лугьуз, дуьа ая, руьгьдиз кӀан хьайитӀани, беден зайиф яз амукьда.

⁴² Кьвед лагьай гъилера мад къерех хьана, Ада дуьа авуна: – Зи Буба, Ваз За и азаб чӀугуна кӀанзавани? Маса рехъ авачтӀа, къуй гьа Ваз кӀандайвал хьурай.

⁴³ Ам хтайла, Адаз абур мад ксанваз жагъана. Абурун вилер чеб-чпелай ахвариз физвай.

⁴⁴ Абур анал туна, Ам мад пуд лагьай гъилера къерех хьана, гьа лагьай гафар тикрариз, Ада дуьаяр авуна.

⁴⁵ Ахпа тилмизрин патав хтана, Ада абуруз лагьана: – Куьн мад ксана амани? – лагьана Ада. – Ял язавани? Вахт атана агакьнава, ингье гьа и декьикьадилай Инсандин Хва гунагькаррин гъиле гьатзава.

⁴⁶ Къарагъ, ша: ангье, Зун маса гудайди мукьва хьанва.

Иса маса гун ва кьун

⁴⁷ Гаф мецел аламаз, Адан цӀикьвед илчидикай сад тир Ягьуд атана акъатна. Адахъ чӀехи хахамрини агъсакъалри ракъурнавай гзаф инсанар галай. Абурув турарни вагьрамар гвай.

⁴⁸ Хаинди вичихъ галайбур Иса маса гунин ишарадин гъавурда туна: – Низ за темен гайитӀа, Ам Гьам жеда. Вегьена Ам яхъ.

⁴⁹ Атанмазни Ягьуда, Исадиз мукьва хьана, «Хийирар хьуй, Муаллим» лагьана, Адаз темен гана.

⁵⁰ – Дуст кас, вун гьа и кар патал атанвани? – лагьана Исади. Атайбуру гьа инал вегьена Иса кьуна.

⁵¹ Исадихъ галайбурукай сада вичин тур акъудна, кьилин хахамдин са лукӀ яна, адан яб галудна.

⁵² – Жуван тур къакъара хтур, – лагьана Исади, – ни тур хкажайтӀа, гьам турунив рекьида.

⁵³ Заз кӀан хьайитӀа, Зи Бубадивай, малаикрин цӀикьвед кьушун Завай къачуз жедай; абур Ада Заз гудачир лагьана фикирзавани вуна?

⁵⁴ За тӀалабнайтӀа, и жезвай крар Каламда кхьенвайвал кьилиз акъатдайни кьван?

⁵⁵ И чӀавуз Исади атанвайбуруз лагьана: – Зун кьун патал, куьн къачагъ кьаз фидайвал, турарни вагьрамар гваз атанва хьи? Зун гьар юкъуз чирвилер гуз Аллагьдин КӀвале жедай, амма ана куьне Зак кязавачир.

⁵⁶ Ибур, пайгъамбарри кхьенвай гафар кьилиз акъатун патал, жезвай крар я. Гьа вахтунда вири тилмизар, Ам гьанал туна, катна.

Исадик тахсирар кутун

⁵⁷ Иса кьурбуру Ам кьилин хахам Каяфан патав тухвана. Ана тавратдарарни агъсакъалар кӀватӀ хьанвай.

⁵⁸ Петру яргъалай хьиз Адан гуьгъуьна аваз, кьилин хахамдин гьаятдиз кьван атана. Ам гьаятдиз гьахьна, кар квелди куьтягь жедатӀа лугьуз, нуькеррин арада ацукьна.

^59-60 ЧӀехи хахамрини Меслягьатди Иса кьиникьиз акъудун патал, Адаз акси тапан шагьидар жагъурзавай, ахьтинбур гзаф хьунни авунай, амма садан шагьидвални кардик кутаз жедайди хьаначир. Эхирни кьве кас атана.

⁶¹ Абуру лагьана: – И инсанди лугьузвай: «Завай Аллагьдин КӀвал чӀурна, пуд йикъалай эхцигиз хъжеда».

⁶² Къарагъна кьилин хахамди Исадиз лагьана: – Вун чуькьни тавуна вучиз акъвазнава? Ваз лугьудай гаф авачни? Абур Ваз акси яз экъечӀзава эхир!

⁶³ Амма Ада сивяй са гафни акъуднач. Кьилин хахамди мад Исадивай хабар кьуна: – За чан алай Аллагьдин вилик Вун Аллагьдин Хва Месигь яни лагьана хабар кьазва.

⁶⁴ – Вуна гьа икӀ я лугьузва, – лагьана Исади, – Инсандин Хва цавал алай циферилай физваз ва шукур хьайи Къудрат Авайдан эрчӀи патавай ацукьнаваз квез аквада.

⁶⁵ Инал кьилин хахамди вичел алай пекер къазунна: – Ада аси ихтилатар ийизва! – лагьана ада. – Мад чаз шагьидвилер герек яни кьван? Адан аси ихтилатар квез ван хьана!

⁶⁶ Куь фикир гьихьтинди я? Абуру Ам кьиникьиз акъуддай чкадал атанва лагьана.

⁶⁷ Гьанлай Адан чиниз тфуяр вегьиз, гъутар эцягъиз хьана, бязибуру Адан чинин патар ягъиз,

⁶⁸ лугьузвай: – Вун ни янатӀа, лагь кван чаз, Месигь?

Петруди Исадикай кьил къакъудун

⁶⁹ Петру лагьайтӀа, къецел, гьаятда ацукьнамай. Адан патав са къаравуш атана, лагьана: – Галилейви Исадихъ галаз вунни авай.

⁷⁰ Амма Петруди вири алай чкадал Исадикай кьил къакъудна лагьана: – Вун куькай рахазватӀа заз чидач.

⁷¹ Ам варарив агатдайла, муькуь къаравушдиз акуна ва анал алайбуруз ада лагьана: – Имни Назаретви Исадихъ галаз санал авайди тир.

⁷² Петруди мад кьил къакъудна кьин кьуна: – Ам заз чидай Кас туш.

⁷³ Са герендилай анал алай инсанар Петрудив агатна, лагьана: – Якъин вунни гьабурукай я, ви рахунрин жуьреди вун гьабурукай тирди къалурзава.

⁷⁴ Гьанлай Петруди кьинер кьаз, Аллагьдиз дад ийиз хьана: – Ам заз чидай Кас туш. Гьа рахунрик кваз садлагьана кӀекре гьарайна.

⁷⁵ Петрудин рикӀел Исади лагьай гафар хтана: «КӀекре гьарайдалди вуна Закай пудра кьил къакъудда». Варарай экъечӀна, ам къагьардалди шехьна.