МатӀай 25 - Пак Калам

ЦӀуд рушакай кьиса

¹ Цаварин Пачагьлугъ гъиле чирагъар аваз чам кьабулиз фейи цӀуд рушав гекъигиз жеда.

² Абурукай вад акьул авайбур тир, вадни – акьул авачирбур.

³ Акьул авачирбуру чпин чирагъар къачунатӀани, абура цадай чӀем къачунач.

⁴ Акьул авайбуру чпин чирагърихъ галаз чӀем авай къапарни къачуна.

⁵ Чам геж жезвай, рушарихъ ахвар агалтна, абур ксана.

⁶ Кьуланфериз гьарай акъатна: «Ингье, чам хквезва! Адан вилик экъечӀ!»

⁷ Гьасятда рушар къарагъна, абуру чпин кузвай чирагъар къайдадик кухтуна.

⁸ Акьул авачирбуру акьул авайбуруз лагьана: «Чи чӀем куьтягь хьана, чирагъар хкахьзава, чаз куь чӀемедикай са тӀимил це».

⁹ «Чавай квез гуз жедач, ам я квезни бес жедач, я чазни, – лагьана акьул авайбуру. – Куьне фена куь чирагъриз цадай чӀем маса къачу».

¹⁰ Абур чӀем гъиз фена хкведалди чамни хтана акъатна, гьазур хьанвайбур чамрахъ галаз мехъерин деминиз гьахьна. Ракни агал хьана.

¹¹ Ахпа амай рушарни аниз атана акъатна. «Я агъа! Я агъа! – лагьана абуру. – Чаз рак ахъая!»

¹² Амма ада жаваб яз лагьана: «За квез рикӀивай лугьузва: заз куьн чидайбур туш».

¹³ ГьакӀ хьайила, уях хьухь, За лугьузвай я югъ, я сят садазни чизвач.

Пул хуьз вугуникай кьиса

¹⁴ Гьа икӀ, са касди дуьньяда къекъуьн кьетӀна. Рекьиз фидалди а касди вичин вач-хъшаяр кӀватӀна, вичихъ авай эменни абурун хиве вугана.

¹⁵ Садав ада вад тӀалантӀ вугана, муькуьдав – кьве тӀалантӀ, пуд лагьайдавни – са тӀалантӀ. Ада абурув гьардав чпин гьар садан алакьунриз килигна вуганай ва вич экъечӀна фенай.

¹⁶ Вад тӀалантӀ къачурда гьа пулар кардик кутуна, абурун кьилел мад вад тӀалантӀ хкана.

¹⁷ Гьа и саягъда кьве тӀалантӀ гвайдани вичив гвай тӀалантӀар кардик кутуна, мад кьве тӀалантӀ хкана.

¹⁸ Са тӀалантӀ гвайда тухвана вичин иесидин пул чилик кутуна, чуьнуьхна туна.

¹⁹ Са кьадар йикъар алатайла, а вач-хъшайрин агъа хтана, абурувай ада гьахъ-гьисаб авун тӀалабна.

²⁰ Вад тӀалантӀ къачурда муькуь вад тӀалантӀни хкана лагьана: «Агъа, вуна зав вад тӀалантӀ вуганай, ингье, гьабурун кьилел за мад вад тӀалантӀ хкана».

²¹ «Хъсан хьана, регьим ва вафа авай зи вач-хъша! – лагьана агъади. – ГъвечӀи карда вуна заз вафа къалурна. Гила за ви хиве еке крар твада. Захъ галаз вунани шадвал ая».

²² Кьве тӀалантӀ къачурдини атана, лагьана: «Агъа, вуна зав кьве тӀалантӀ вуганай, ингье, гьабурун кьилел за мад кьве тӀалантӀ хкана».

²³ «Хъсан хьана, регьим ва вафа авай зи вачхъша! – лагьана агъади. – ГъвечӀи карда вуна заз вафа авай къалурна. Гила за ви хиве чӀехи крар твада. Захъ галаз жувани шадвал ая».

²⁴ Ахпа адан патав са тӀалантӀ къачурди атана. «Агъа, заз вун инсаф авачир кас тирди чида, – лагьана ада; – вуна цун тавур ник гуьда, вуна тум чукӀур тавур чкадай бегьер кӀватӀда.

²⁵ Вахъай кичӀе хьана, тухвана за ви тӀалантӀ чилик кутуна. Ингье ви тӀалантӀ, къахчу».

²⁶ «Темпел ва кьеркьеш лукӀ! – жаваб гана агъади. – За цун тавур никӀяй гуьдайди ва за тум чукӀур тавур чкадай кӀватӀдайди ваз чир хьайила,

²⁷ вучиз вуна зи пул кирида вуганачир? За хтайла, къведай жуван хийир кьил алаз къахчудай».

²⁸ Вичин вач-хъшайриз агъади лагьана: «Къахчу адав гвай тӀалантӀ, ам цӀуд тӀалантӀ авайдаз це.

²⁹ Гьар нихъ аватӀа, адаз мадни кӀукӀ алаз гуда, авачирдавай авайдини къакъудда.

³⁰ И виже текъведай вач-хъша мичӀи къецел гадара, ана жедайди шел-хвал ва сарар регъуьнар я».

Дуьньядин дуван

³¹ Инсандин Хва баркалла алаз Вичин малаикрин арада аваз атана акъатайла, Ам баркалла алай пачагь яз тахтуна ацукьда.

³² Адан вилик вири халкьар кӀватӀ жеда. Ада абур, чубанди хипер кьунарикай чара ийидайвал, сад садавай чара ийида.

³³ Хипер Ада вичин эрчӀи патавай акъвазарда, кьунарни – чапла патавай.

³⁴ Пачагьди Вичин эрчӀи патавай акъвазнавайбуруз лугьуда: «Зи Бубади хийир-дуьа ийизвайбур, куьн иниз ша, дуьнья халкьнавайдалай инихъ квез гьазурнавай Пачагьлугъ кьабула.

³⁵ Заз гишин хьайила, куьне Заз фу ганай; Зун цихъ къаних хьайила, куьне Заз яд ганай; Закай къураба хьайила, куьне Зун кьабулнай.

³⁶ Зун кьецӀил хьайила, куьне Заз пекер ганай; Зун азарди кьурла, куьне Зал кьил чӀугунай; Зун къазаматда гьатайла, куьн Зи патав атанай».

³⁷ Гьа чӀавуз гьахъ-михьи ксари лугьуда: «Я Ребби! Вун гишила аваз акуна чна Ваз фу мус ганай? Вун цихъ къанихзаваз чна Ваз яд мус ганай?

³⁸ Вун къураба яз чна Вун мус кьабулнай? Я тахьайтӀа Вун кьецӀила аваз акуна, чна Вал пекер мус алукӀнай?

³⁹ Вун азарди кьунваз я тахьайтӀа къазаматда аваз чаз мус акунай? Чна мус Вал кьил чӀугунай?»

⁴⁰ Пачагьдини жаваб гуда: «За квез рикӀивай лугьузва: ахьтин крар куьне Зи стхайрикай садаз авунватӀа, куьне а хъсанвилер Заз авунва».

⁴¹ Ахпа Ада Вичин чапла патавай акъвазнавайбуруз лугьуда: «Квахь Зи виликай, лянет хьайибур, иблисдизни адан малаикриз гьазурнавай жегьеннемдин цӀуз алад.

⁴² Заз гишинзавайла, куьне Заз фу ганачир. Зун цихъ къаних хьайила, куьне Заз яд ганачир.

⁴³ Зун къураба тирла, куьне Зун кьабулначир. Зун кьецӀил авайла, куьне Зал алукӀначир. Зун азарди кьунвайла ва къазаматда гьатайла, куьне Зал кьил чӀугуначир».

⁴⁴ Ахпа абуруни жаваб яз лугьуда: «Я Агъа, чаз Вун я гишила аваз, я цихъ къанихзаваз, я къураба яз, я кьецӀил яз, я азарди кьунваз, я къазаматда аваз акунайни кьван? ГьакӀ хьайила, чун Вахъ гелкъуьн тавур бере мус хьана?»

⁴⁵ Гьанал Ада жаваб яз лугьуда: «За квез рикӀивай лугьузва: ахьтин куьмекар куьне и адетдин гъвечӀи инсанрикай садаз кьванни авунвачтӀа, куьне абур Зазни авунвач».

⁴⁶ ГьакӀ хьайила пис ксар даим жазадик акатда, гьахъ-михьи ксар – эбеди уьмуьрдиз аватда.