МатӀай 24 - Пак Калам

Гележегдикай Исадин келимаяр

¹ Иса Аллагьдин КӀваляй экъечӀна хквезвайла, Адан патав тилмизар атана, Адаз Аллагьдин КӀвалин дараматриз килигун теклифна.

² – Куьн и дараматрал гьейран жезвани? – жаваб гана Ада. – За квез рикӀивай лугьузва: абур вири барбатӀ жеда, къван къванцел аламукьдач.

³ Иса Зейтун пелел ацукьнавайла, Адахъ галаз кьилди амукьай тилмизри Адан патав агатна лагьана: – Чаз лагь: Ам мус жедай кар я? Вун элкъвена хкведайвилин ишара вуч жеда? Эхирзаман хьанвай чӀал чаз гьикӀ чир жеда?

⁴ Исади жаваб яз лагьана: – Мукъаят хьухь, куьн алцурариз тахьурай!

⁵ Гзафбур, чеб Месигь я лугьуз, чеб Зи ТӀварцӀелай атанвайди я лугьуз, къведа, гьадалди абуру гзаф инсанар алцурарда.

⁶ Мукьваривай ва я яргъарай дяве физвай ванер къвез хьайитӀа, кичӀе жемир, абур жедай крар я, амма чир хьухь хьи, им гьеле эхир туш.

⁷ Халкь халкьдал къарагъда, пачагьлугъни – пачагьлугъдал; чка-чкайра залзалаяр жеда, каш гьатда.

⁸ Вири им азаб-азиятрин эвел я.

⁹ Гьа чӀавуз куьн маса гуда, хурук кутада ва ягъиз рекьида. Зи тилмизар хьуниз килигна, куьн вири халкьариз такӀан жеда.

¹⁰ Гзафбуру Захъ иман хъийидач, абуру сада сад маса гуда, садаз сад такӀан жеда.

¹¹ Тапан пайгъамбарар гзаф пайда жеда, абуру гзаф инсанар алцурарда.

¹² Писвал артух хьуникди, гзафбурун муьгьуьббат рекьида.

¹³ Эхирдалди эхайди хилас жеда.

¹⁴ Цаварин Пачагьлугъдикай тир Шад Хабар дуьнья тирвал вири халкьарин арада чукӀурда, ахпа эхир алукьда.

¹⁵ Гьа икӀ, Даниял пайгъамбарди лагьайвал, пак чкада гьатнавай чкӀайвилин чиркинвал акурла (кӀелзавайда кьатӀунни авурай),

¹⁶ Ягьудатда авай кьванбур вири катна фена дагълара чуьнуьх хьурай.

¹⁷ Вуж къавал алаз хьайитӀа, ам герек шей къачуз кӀвализ гьахь тавурай!

¹⁸ Вуж чуьлда аваз хьайитӀа, ам винелай алукӀдай вичин пекер къахчуз кӀвализ хъфин тавурай.

¹⁹ Гьа чӀавуз кӀвачел заланбурузни хурудихъ аялар галайбуруз гуж жеда!

²⁰ Куьн катдай йикъар хъуьтӀуьз ва я Киш юкъуз тахьурай лагьана дуьаяр ая.

²¹ Аллагьди дуьнья халкьай йикъалай къенин йикъалди тахьай хьтин ва хьайидалай кьулухъ тежедай хьтин мусибат гьа йикъара инсанрин кьилел къведа.

²² Аллагьди виликамаз гьа мусибатдин йикъар тӀимил авуначиртӀа, чан алай са затӀни хилас жедачир. Амма Вичин хкянавайбурун, вичин рикӀ алайбурун хатурдай Ада а мусибатдин вахт куьруь авунва.

²³ Гьа арада квез сада «Ингье, им Месигь я», я тахьайтӀа «Ангье, Ам Месигь я» лагьайтӀа, куьн чӀалахъ жемир,

²⁴ Тапан месигьарни тапан пайгъамбарар гзаф акъатда. Абуру чӀехи аламатар ва керемат-ишараяр къалурда, алакьайтӀа, гьатта Аллагьди хкянавайбурни кваз алцурариз алахъда.

²⁵ Килиг гьа, За квез вири виликамаз лагьанва.

²⁶ Квез «Килиг, кьурумда Месигь ава!» лагьайтӀа, куьн аниз фимир, я тахьайтӀа «И кӀвалерикай сада Ам чуьнуьх хьанва» лагьайтӀа, куьн абурун чӀалахъ жемир.

²⁷ РагъэкъечӀдай патай ягъай цӀайлапан рагъ акӀидай пата гьикӀ аквадатӀа, Инсандин Хвани гьакӀ атана акъатда.

²⁸ Леш гьинал хьайитӀа, къузгъунарни гьанал кӀватӀ жеда.

²⁹ Ахпа а йикъара авай къада-балаяр акатайдалай кьулухъ рагъ мичӀи жеда, вацрани экв хгудач, гъетер аватда, цавун къуватар юзада.

³⁰ Гьа чӀавуз цавал Инсандин Хва хкведайвилин ишара акьалтда. Инсандин Хва къудратда ва зурба баркалла алаз цавун циферал алаз хквез акур инсанар, чеб чпивай квахьна, шехьиз жеда.

³¹ Ада и дуьньядиз Вичин малаикар ракъурда. Абуру чӀехи къаргъуяр ягъиз, дуьньядин кьуд пипӀяй, яни цавун и кьиляй а кьилел къведалди авай кьван чкайрай Ада хкянавайбур кӀватӀда.

³² Инжилдин тар квез чешне хьурай: адан хилери тӀурар гъана пеш ахъайиз хьайитӀа, квез мукьвара гад алукьдайди чир жеда.

³³ За лугьузвайди кьилел къвезвайди акурла, Инсандин Хвани куь ракӀарив агакьнавайди квез чир хьухь.

³⁴ За квез рикӀивай лугьузва: гилан несил алатна фидалди и крар вири кьилиз акъатда.

³⁵ Цавни чил дегиш жеда, амма Зи Гафар дегиш жедач.

³⁶ Ам къведай я югъ, я сят садазни чидач, я цавараллай малаикриз, я Хциз. Ам анжах Бубадиз чида.

³⁷ Нуьгьан девирда гьикӀ хьанатӀа, Инсандин Хва элкъвена хтай девирдани гьакӀ жеда.

^38-39 Нуьгьан девирда яд акьалт тавунмаз ва ам гимидиз гьахь тавунмаз вирибуру незвай, хъвазвай, папар гъизвай, гъуьлуьз физвай, амма дуьньядал яд акьалтна – вири терг хьана. Акьван чӀавалди садазни са затӀни чизвачир. Инсандин Хвани гьа саягъда элкъвена хкведа.

⁴⁰ Гьа чӀавуз кьве кас чуьлда кӀвалахиз жеда, абурукай сад къахчуда, сад тада.

⁴¹ Кьве папа са регъве техил регъведа: абурукай сад къахчуда, сад тада.

⁴² ГьакӀ хьайила уях хьухь, квез куь Ребби хкведай югъ чизвач.

⁴³ Квез чидани, кӀвалин иесидиз угъри къведай чӀав чир хьанайтӀа, ам уях жедай ва вичин кӀвал атӀуз тадачир.

⁴⁴ ГьакӀ хьайила куьнни гьазур яз хьухь: гьич квез хабарни авачиз Инсандин Хва хтана акъатда.

⁴⁵ Лугьун хьи, агъади вичин кӀвалихъ гелкъвезвайбурун кьилел, абуруз вахтунда фу-яд гун патал, са кас эцигна. А кас вафа гвайди ва кьил авайди хьайитӀа, ада вуч ийида?

⁴⁶ Агъа кӀвализ хтайла, ам вичин хиве авай крарал машгъул яз жеда. Ахьтин кас бахтавар я.

⁴⁷ За квез рикӀивай лугьузва хьи, адан агъади вичин вири мал-мулкунин кьиле а кас акъвазарда.

^48-51 А касди намус авачиз вичи вичик «Зи агъа мукьвара ахкъатдач» лагьана, кӀвалел алай вич хьтинбур гатаз, вични хъвадайбурухъ галаз нез-хъваз хьайитӀа, а касдин агъади гьич виливни техуьзвай са юкъуз, гьич фикирдизни гъиз тежедай чӀавуз хтана, адаз лашунин хура туна векъи жаза гуда ва гьадазни, кьве чин алайбуруз хьиз, кар кьада. Ана лагьайтӀа, шел-хвал ва сарар регъуьн амукьда.