МатӀай 23 - Пак Калам

Фарисейринни тавратдаррин чӀуру крар

¹ Ахпа Исади халкьдихъ ва Вичин тилмизрихъ галаз ихтилатар ийиз хьана.

² Ада лагьана: – Тавратдаррини фарисейри Мусадин Къанундиз баянар гудай ихтияр чпин гъиле кьунва.

³ Абуру квез вуч лагьайтӀа, гьам кьилиз акъуд, амма абуру ийизвай крар куьне ийимир, абуру гафаралди лугьузва, краралди ийизвач.

⁴ Абуру инсанрал ялиз тежедай пар эцигзава, амма чпи а пар кьун патал, абуру гьич тӀуб тупӀухъ гелядач.

⁵ Абуру чпин крар анжах халкьдиз чпи са вуч ятӀани ийизвайди акурай лугьуз ийизва. Абуру пелер кутӀуннавай затӀариз килиг, абурун пекерал алай яргъи курквачӀриз килиг!

⁶ Синагугра абур вилик чкаяр кьаз алахъда.

⁷ Абуруз базардин майдандал инсанри чпиз гьуьрметдалди икрам авун, чпихъ галаз «Муаллим» лугьуз рахун кӀанда.

⁸ Амма жуваз муаллим лугьуз тамир, квехъ авайди анжах са Муаллим я, куьнни вири сад садан стхаяр-вахар я.

⁹ Куьне квекай садазни чилел буба лугьумир, квехъ авайди цавараллай анжах са Буба я.

¹⁰ Гьич садазни квез регьбер лугьудай ихтияр гумир, квехъ авайди анжах са Регьбер я – Гьамни Месигь я.

¹¹ Куь арада авай виридалайни чӀехиди куь кьилел-кӀвачел элкъуьрай.

¹² Ни вичи вич вине кьуртӀа, гьам агъада жеда, ни вичи вич агъада кьуртӀа, гьам вине жеда.

^13-14 Гуж я квез хьанвайди, тавратдарарни фарисеяр, кьве чин алайбур! Куьне инсанриз Цаварин Пачагьлугъдиз фидай рак агална. Я куьн аниз гьахьзавач, я аниз физ кӀанзавайбур куьне ахъайзавач.

¹⁵ Гуж я квез хьанвайди, тавратдарарни фарисеяр, кьве чин алайбур, куь диндал са кас кьванни гъун патал, куьн тефей гьуьлерни чилер амач. Ахьтинди квез жагъайла, куьне ам квелай кьве къат бетердаз элкъуьрда, ам квехъ галаз жегьеннемдин цӀуз аватда.

¹⁶ Гуж я квез хьанвайди, буьркьуь регьберар! Куьне лугьузва: «Ни Аллагьдин КӀвалел кьин кьуртӀа, адавай кьин кьилиз акъуд тавуртӀани жеда, амма ни Аллагьдин КӀвалин къизилрал кьин кьуртӀа, ада вичин кьин кьилиз акъудун лазим я».

¹⁷ Я буьркьуь ахмакьар! Вуч вине я, къизил яни, я тахьайтӀа а къизил пак авур Аллагьдин КӀвал?

¹⁸ Куьне вуч лугьузватӀа мадни са мисал гъин: «Ни къурбангандал кьин кьазватӀа, адавай кьин кьилиз акъуд тавуртӀани жеда. Ни къурбангандал алай къурбанддал кьин кьуртӀа, гьада гьа кьин кьилиз акъудун лазим я».

¹⁹ Эй буьркьуьбур! Вуч вине я, къурбанд яни, я тахьайтӀа ам пак ийизвай къурбанган?

²⁰ Ни къурбангандал кьин кьазватӀа, ада а къурбангандал вуч алатӀа, гьадални кьин кьазва.

²¹ Ни Аллагьдин КӀвалел кьин кьазватӀа, ада тек са Аллагьдин КӀвалел ваъ, гьакӀни ана Уьмуьр Тухузвайдални кьин кьазва.

²² Цаварал кьин кьазвайда Аллагьдин тахтунални адал Ацукьнавай Аллагьдал кьин кьазва.

²³ Гуж я квез хьанвайди, тавратдарарни фарисеяр, кьве чин алайбур! Куьне гьатта сала экъечӀзавай пурнийрин, шивитдин ва эферрин бегьердин цӀуд паюникай са пай Аллагьдиз акъудзава, амма Къанундин лап кьилин къайдайриз – адалатвилиз, регьимвилиз ва Аллагьдихъ иман авуниз – куьне гьич са ябни гузвач. Авуна кӀанзавай важиб авай кар гьа им я, амма муькуь крарни рикӀелай ракъурна виже къведач.

²⁴ Эй буьркьуь регьберар, куьне хъвазвай затӀ, ветӀ ква лугьуз, куьзда, амма деве туькьуьнда.

²⁵ Гуж я квез хьанвайди, тавратдарарни фарисеяр, кьве чин алайбур! Куьне къапарин винел пад михьзава, амма абурун къене куьне къанихвилелди чапхун авурди ава.

²⁶ Эй буьркьуь фарисей, къапунин кьве падни михьи жедайвал, сифте куьне адан къен пад михьа.

²⁷ Гуж я квез хьанвайди, тавратдарарни фарисеяр, кьве чин алайбур! Куьн винелай асуннавай сурариз ухшар я. Абур винелай гуьрчег яз аквада, амма абурун къен кьейибурун кӀарабрайни гьар жуьредин чиркерай ацӀана жеда.

²⁸ Винелай куьнни вири крар дуьздаказ ийизвайбур хьиз аквада, амма куь къенер жадувиливни чалкечирвилив ацӀанва.

²⁹ Гуж я квез хьанвайди, тавратдарарни фарисеяр, кьве чин алайбур! Куьне пайгъамбарриз гуьмбетар эцигзава, гьахъ-михьи ксарин сурар чӀагурзава.

³⁰ Гьа са чӀавуз куьне лугьунни ийизва: «Чна чи бубайрин девирра уьмуьр тухузвайтӀа, абуру пайгъамбаррин ивияр экъичдайла, чун бубайрихъ галаз сад жедачир».

³¹ Гьа идалди куьне куьн пайгъамбарар телеф авурбурун веледар я лагьана шагьидвал ийизва.

³² Куь бубайри кьил кутур крар гила куьне акьалтӀар хъия.

³³ Иланар! Гъуьлягъдин къеняй акъатнавайбур! Квевай жегьеннемдин цӀукай катиз жеда жал?

³⁴ ГьакӀ хьайила За куь патав пайгъамбарар, арифдарар ва тавратдарар ракъурзава; абурукай са бязибур куьне рекьида, са бязибур хашуниз яда, муькуьбурни куь синагугра гатаз, са шегьердай муькуь шегьердиз чукурда.

³⁵ Нетижада, гьахъ-михьи Гьабилалай эгечӀна, Аллагьдин КӀвалинни къурбангандин арада кьейи Барахан хва Зекеридал къведалди са тахсирни квачиз яна кьейи вири гьахъ-михьи инсанрин кьисас квелай къахчуда.

³⁶ За квез рикӀивай лугьузва: вири пис крарай и несилдиз жаза гуда.

Иса Ярусалимдихъ шехьун

³⁷ Эй Ярусалим, Ярусалим! Пайгъамбарар гатадай шегьер! Аллагьди ракъурнавайбур къванцин хура твадай шегьер! Вечре вичин цицӀибар кӀватӀна лувак кутадайди хьиз, шумудра Зун ви аялар кӀватӀиз алахънай. Амма квез кӀан хьаначир.

³⁸ Килиг, «куь Аллагьдин КӀвал ичӀиз тунва».

³⁹ Куьне «Реббидин ТӀварцӀелай Къвезвайдаз шукур хьурай» лугьудай вахт къведалди, квез Зун ахквадач.