МатӀай 21 - Пак Калам

Иса Месигь Ярусалимдиз атун

¹ Абур Зейтун пелен ценерив гвай Бетфагдив агакьна. Ярусалим, лагьайтӀа, лап мукьварив гвай. Исади кьве тилмиз ракъурна:

² – Куь вилик квай хуьруьз алад, – лагьана Ада. – Квез гьасятда гьаятда кутӀуннавай диши ламни адан шаркӀунтӀ аквада; абур ахъайна Зи патав гъваш.

³ Квевай хабар кьадай кас хьайитӀа, куьне лагь: «Абур Агъадиз герек я», Ада абур квел ахгакьарда.

⁴ И крар пайгъамбарди лагьай ихьтин гафар кьилиз акъатун патал хьайиди я:

⁵ «Сигьандин рушаз – Ярусалимдиз лагь: килиг, къвезва куь умун Пачагь шаркӀунтӀдал алаз, диши супадал алаз» .

⁶ Тилмизри фена Исади лагьайвал авуна.

⁷ Абуру ламни шаркӀунтӀ гъана, кьве ламрални чпелай хтӀунна пекер-парталар вегьена, Иса ламрал акьахна.

⁸ Халкьдин чӀехи кӀеретӀди чпин пек-лек хтӀуниз Исадин вилик рекьел экӀязавай, муькуьбуру тарарилай хилер атӀуз Адан вилик рекьел гадарзавай.

⁹ Исадин вилик квайбуруни кьулухъ галайбуру гьарай къачуна лугьузвай: – Давуд пачагьдин Хциз шукур хьурай! Реббидин ТӀварцӀелай Къвезвайдаз шукур хьурай! Цавариз шукур хьурай!

Гуз-къачузвайбур чукурун

¹⁰ Ам Ярусалимдиз гьахьайла, шегьердавай вирибуру, къалабулух кваз, хабар кьазвай: – Ам Вуж я?

¹¹ Халкьдин арадай жаваб гузвай: – Ам Галилейда авай Назарет шегьердай тир Иса пайгъамбар я.

¹² Аллагьдин КӀвалин гьаятдиз гьахьайла, Иса ана авай алверзавайбурни муьштерияр чукуриз эгечӀна. Ада пул дегишарзавайбурунни лифер маса гузвайбурун экӀягъанар ярхарна.

¹³ – Каламда кхьенва: «Зи кӀвализ дуьаяр ийидай кӀвал лугьуда». Куьне ам къучийрин макандиз элкъуьрзава, – лагьана Ада.

¹⁴ Аллагьдин КӀвале Адан патав буьркьуьбурни кьецӀибур къвез хьана, Ада абур сагъар хъувуна.

¹⁵ Ада авур кьван аламатар акур чӀехи хахамризни тавратдарриз Аллагьдин КӀвале аялри «Давуд пачагьдин Хциз шукур хьурай!» лагьай гафарин ван хьайила, абуру хъел кваз

¹⁶ Исадиз лагьана: – Абуру вуч лугьузватӀа Ваз ван къвезвани? Исади абуруз жаваб гана: – Къвезва. Бес куьне Каламдай ихьтин гафар кӀелначни мегер: «Аялринни хурухъ галамай бицӀекрин сивера Вуна Ви тарифдин гафар туна».

¹⁷ Ам абурун патавай къарагъна, шегьердай экъечӀна, Бетан лугьудай хуьруьз фена. Йифиз Ам гьана амукьна.

Инжилдин тар

¹⁸ Экуьнахъ Иса шегьердиз хкведайла, Адаз гишин хьана.

¹⁹ Хквезвай рекьин къерехда инжилдин тек тар акурла, Ам адан патав фена, амма тарал пешерилай гъейри затӀни алачиз акур Ада тараз лагьана: – Мад вал садрани майва тахьурай! Инжилдин тар гьасятда кьурана.

²⁰ И кар акур Адан тилмизар мягьтел хьана амукьна: – И тар гьасятда гьикӀ кьурана? – лагьана Адаз абуру.

²¹ – За квез рикӀивай лугьузва, – жаваб гана Исади, – иман ийидайла квехъ шак тахьайтӀа, куьне инжилдин тарни кьурурда, гьатта и пелез куьне «Къарагъ, жува жув гьуьлуьз вегь» лагьайтӀа, и карни кьилиз акъатда.

²² Дуьа ийидайла, рикӀе иман аваз вуч тӀалабайтӀа, гьам кьилиз акъатда.

Исадин ихтияр

²³ Иса Аллагьдин КӀвализ атана, чирвилер гудайла, Адал чӀехи хахамарни чувудрин агъсакъалар атана алтӀушна ва абуру Адаз лагьана: – Вуна и крар гьикӀ лагьана ийизва? Абур ийидай ихтияр Ваз ни гана?

²⁴ – За квевайни са кардикай хабар кьада, – жаваб гана Исади. – Куьне Заз жаваб гайитӀа, Зани квез Заз ни ихтияр ганватӀа, лугьуда.

^25-26 Вучиз Ягьяди инсанрив цик акахьун къачуз тазвай? Ада инсанрив абуруз чпиз кӀан хьана цик акахьун къачуз тазвайни, я тахьайтӀа, Аллагьдин къастуналди? Абуру чпи чпихъ галаз веревирдер авуна: – Чна «Аллагьдин къастуналди» лагьайтӀа, Ада хабар кьада: «Бес куьн Ягья пайгъамбардин чӀалахъ вучиз хьанач?» «Инсанриз кӀан хьана», – лугьуз чаз халкьдихъай кичӀеда, вучиз лагьайтӀа халкь Ягья гьакъикъи пайгъамбар тирвилин чӀалахъ жезва.

²⁷ Гьавиляй абуру жаваб гана: – Чаз чидач. – Зани квез а крар Заз ни ихтияр гана ийизватӀа лугьудач – хълагьна Исади.

Кьве хцикай кьиса

²⁸ – Гила куьне За квез лугьудайдакай фагьум-фикир ая. Са касдихъ кьве хва хьана. Буба сад лагьай хцин патав атана, адаз лагьана: «Къе, чан хва, фена зи ципицӀбагълара кӀвалаха».

²⁹ «Ваъ, заз физ кӀанзавач», – жаваб гана хци. Амма ахпа вичин жавабдал пашман хьана, ам ципицӀбагъдиз фена.

³⁰ Буба муькуь хцин патав фена, гьа гафар гьадазни лагьана. «Фида, агъа», – лагьана хци. Амма ам ципицӀбагъдиз фенач.

³¹ Кьве хцикай бубадин тӀалабун ни кьилиз акъудна? – Сад лагьайда, – жаваб гана абуру. – За квез рикӀивай лугьузва: харж кӀватӀдайбурни ява папар Аллагьдин Пачагьлугъдиз квелай вилик акъатда, – лагьана Исади. –

³² Ягья квез дуьз рехъ къалуриз атанай, амма куьне яб акалнач, харж кӀватӀдайбурни ява папар адан чӀалахъ хьана. А кар квез акурлани, куьне туба авунач, я Ягьядихъни агъунач.

Пис ципицӀбандикай кьиса

³³ Гила маса кьисадиз яб це. Са инсанди ципицӀбагъ кутуна, адалай пару элкъуьрна. Фур эгъуьнна, ципицӀар шуткьундай чка туькӀуьрна, ципицӀбагъдал къаравул чӀугун патал минарани эцигна. Ибур вири вичиз кӀвалахиз кьунвай ципицӀбанрив вугана, вич сиягьатдиз фена.

³⁴ Бегьер кӀватӀдай вахт агакьайла, вичиз къвезвай пай къахчун патал, ада вичинбур ципицӀбанрин патав ракъурна.

³⁵ ЦипицӀбанрини адан инсанар кьуна сад хъсандиз гатана, муькуьди яна кьена, пуд лагьайдазни къван гана.

³⁶ Ахпа ада аниз амайдалайни гзаф нуькерар ракъурна, ципицӀбанри гьабурузни гьахьтин кар кьуна.

³⁷ Эхирни ада абурун патав «Зи хцикай абуруз регъуь жеда» лагьана вичин хва ракъурна.

³⁸ ЦипицӀбанриз адан хва акурла, абуру чпи чпиз лагьана: «Им варис я. Ша чна ам рекьин, адан ирсни чал гьалтда».

³⁹ Абуру ам кьуна, ципицӀбагъларай акъудна, яна кьена.

⁴⁰ Квез чиз, ципицӀбагъларин иеси аниз атайла, а ципицӀбанриз ада вуч авун лазим я?

⁴¹ – Ада а пис ксар азаб гана рекьида, ципицӀбагъни вахтунда вичив майваяр вахгудай маса ципицӀбанрив вугуда, – жаваб гана абуру.

⁴² Исади лагьана: – Каламдай куьне ихьтин гафар кӀелначни бес: «УстӀарри кваз такьуна гадарай къванцикай хандакӀдин пипӀе твадай кьилин къван хьана. Им Аллагьди гайивал я. Бес им аламат тушни кьван чаз аквазвайди» .

⁴³ ГьакӀ хьайила За квез лугьузва хьи, квевай Аллагьдин Пачагьлугъ къахчуда, а Пачагьлугъ чувудар туширбурув вугуда, чувудар туширбуруни чпин майваяр вахтунда Аллагьдив вахгуда.

⁴⁴ Вуж а къванцел алукьайтӀа, адан чин-гъил алатда, нел а къван аватайтӀа, ам а къванци шупӀда.

⁴⁵ ЧӀехи хахамрини фарисейри Адан кьисайриз яб гайила, абур Иса чпикай рахазвайдан гъавурда гьатна.

⁴⁶ ГьакӀ хьайила абуруз Ам кьаз кӀан хьана, амма халкьди Иса пайгъамбардай кьуниз килигна, абуруз халкьдихъай кичӀе хьана.