МатӀай 2 - Пак Калам

Арифдарар

¹ Иса Гьируд пачагьдин девирда Ягьудат вилаятдин Бетлегьем шегьерда дидедиз хьана. Гьа и чӀавуз рагъэкъечӀдай патай Ярусалимдиз арифдарар атана.

² – Гьинава Чувудрин Пачагь, и мукьвара дидедиз хьанвай? – хабар кьуна абуру. – РагъэкъечӀдай патай чаз адан гъед акуна. Чун Адаз икрам ийиз атанвайбур я.

³ И гафарин ван хьайила, Гьируд пачагьдик ва адахъ галаз санал вири Ярусалимдик къалабулух акатна.

⁴ Гьируда вири чӀехи хахамарни чувудрин тавратдарар кӀватӀна, абурувай хабар кьуна: – Месигь гьина дидедиз хьун лазим тир?

⁵ – Ягьудатда авай Бетлегьем шегьерда, – жаваб гана абуру. – Пайгъамбардини икӀ кхьенва:

⁶ «Эй Бетлегьем, Ягьудатдин чилел алай шегьер! Вун Ягьудатдин чӀехи шегьеррин арада виридалайни гъвечӀиди туш. Ви инсанрин арадай Зи халкь, яни Исраилдин халкь, Хуьдайди, адан кьиле Жедайди акъатда».

⁷ Гьа чӀавуз Гьируд пачагьди арифдарриз чинеба эверна, абурувай гъед экъечӀдай дуьз чӀав чирна.

⁸ Ахпа ада, абур Бетлегьемдиз ракъурдайла, лагьана: – Алад, фена БицӀекдикай галай-галайвал хабарар яхъ. Ам квез акурла, Зани Адаз икрам ийидайвал, заз хабар це.

^9-10 Абур, пачагьдиз яб гана, фена. Рекье абуруз чпиз рагъэкъечӀдай патай акур гъед ингье мад ахкуна. Ам акурла, абуруз гзаф хвеши хьана. Гъетре абур вичихъ галаз тухвана. Эхирни гъед атана Аял авай кӀвалин винел акъвазна.

¹¹ КӀвализ гьахьайла, абуруз БицӀек Адан диде Майрамав гваз акуна. Абур метӀерал акъвазна, БицӀекдиз икрам авуна. Чпив гвай хазинаяр ахъайна, Аялдиз абуру савкьватар яз къизил, атир галай къирни векьер-кьалар гана.

¹² Абуруз ахварай Аллагьди Гьируд пачагьдин патав хъфин тавуникай виликамаз лагьанай. Гьавиляй абур чпин уьлкведиз маса рекьяй хъфена.

Мисридиз катун

¹³ Арифдарар хъфейдалай кьулухъ Реббидин малаикди атана Юсуфаз ахварай лагьана: – Къарагъ! Аялни Адан диде къачуна Мисридиз кат, за ваз кьулухъ эхвердалди гьана амукь. Гьируд пачагь, Аял терг авун патал, Ам авай чкадихъ къекъвезва.

¹⁴ Ам къарагъна, Аялни Адан диде къачуна, йифиз Мисридиз рекье гьатна.

¹⁵ Гьана абур Гьируд пачагь рекьидалди амукьна. Гьа и саягъда пайгъамбарди Аллагьдин мецелай лагьай ихьтин гафар кьилиз акъатна: «За Зи Хциз Мисридай хъша лагьана».

¹⁶ Абур Мисридиз катай чӀавуз Гьируд пачагь арифдарар хкведа лугьуз акъвазнавай. Абур тахтана акурла, Гьирудаз абуру вичиз таб авурди чир хьана. Пис хъел акатна, ада Бетлегьемда ва адан патав гвай чкайра авай кьван кьве йис хьанвай ва адалай гъвечӀи вири гадаяр терг авун эмирна. БицӀек дидедиз жедай чӀав ада арифдаррин гафарай чирна.

¹⁷ Гьа чӀавуз Ермиягь пайгъамбарди Аллагьдин мецелай лагьайди кьилиз акъатна:

¹⁸ «Вири Рама тирвал йикь-шуван гьатна. Рагьил вичин амачир аялрихъ секин тежез шехьзава».

Мисридай хтун

¹⁹ Гьируд пачагь кьенмазни, Мисрида Юсуфаз ахварай Реббидин малаик акуна.

²⁰ – Къарагъ, Аялни Адан диде къахчуна, Исраилдин чилерал ахлад, Аял рекьиз кӀан хьайибур кьенва, – лагьана малаикди.

²¹ Ада, къарагъна, Аялни Адан диде къахчуна, абур Исраилдин чилел хтана.

²² Ягьудатда бубадин чкадал Гьируд пачагьдин хва Архела пачагьвал ийизвай. И кардикай хабар хьайила, адаз аниз физ кичӀе хьана. Амма Юсуф ахвара авай чӀавуз, адаз вуч авуна кӀандатӀа Аллагьди лагьайла, ам Галилейдиз атана.

²³ Гьана ам Назарет лугьудай шегьерда акъвазна. Гьа икӀ, пайгъамбарри Месигьдикай лагьай ихьтин гафар кьилиз акъатна: «Адаз инсанри Назаретви лугьуда».