МатӀай 18 - Пак Калам

Вуж артух я?

¹ Гьа вахтунда Исадин кьилив тилмизар атана, Адавай жузуна: – Цаварин Пачагьлугъда виридалайни чӀехиди вуж я?

² Ада аялдиз Вичин кьилив эверна, ам абурун юкьвал акъвазарна,

³ лагьана: – За квез рикӀивай лугьузва: куьн, дегиш хьана, аялар хьиз тахьайтӀа, куьн Цаварин Пачагьлугъдиз гьахьдач.

⁴ Гьавиляй, вуж и аял хьиз умун хьайитӀа, гьам Цаварин Пачагьлугъда виридалайни чӀехиди жеда.

⁵ Ихьтин са аял Зи хатурдай жуванди яз ни кьабулайтӀа, гьада Зун кьабулзава.

Инсан рекьяй акъуддай затӀарикай

⁶ Захъ иман ийизвай ихьтин адетдин гъвечӀи ксарикай сад ни рекьяй акъудиз хьайитӀа, ам гарданда регъуьн къван туна гьуьлуьн деринриз ракъурайтӀа хъсан я.

⁷ Инсанрив гунагьар ийиз тазвай и дуьньядиз гуж хьурай! Инсанри гунагьар мад ийида, амма масабурув гунагьар ийиз тазвай ксаризни гуж хьурай!

⁸ Ви са гъили ва я са кӀвачи вун гунагь ийидай йикъаз гъизватӀа, вуна абур атӀана гадара; кьве гъил ва я кьве кӀвач кваз жегьеннемдин цӀуз аватдалди са гъил ва я са кӀвач кваз ваз эбеди уьмуьрдиз гьахьун хъсан я.

⁹ Ви са вили вун гунагь ийидай йикъаз гъизватӀа, вуна ам акъудна гадара; кьве вил аваз цӀун гургур авай жегьеннемдиз аватдалди ваз са вил аваз уьмуьрдиз гьахьун хъсан я.

Квахьай хипекай кьиса

^10-11 Килиг гьа, ихьтин адетдин гъвечӀи ксарив рикӀивай эгечӀ, абурун малаикар датӀана цавараллай Зи Бубадин вилик ква.

¹² Виш хеб авай суьруьдикай са хеб хкатайла, адан иесиди вуч ийида лагьана фикирзава куьне? Гьелбетда, ам, кьудкъанни цӀекӀуьд хеб дагълара туна, рехъ алатай са хпехъ къекъвез фида.

¹³ За квез рикӀивай лугьузва: ам жагъайла, адаз а рехъ алат тавуна амай кьудкъанни цӀекӀуьд хеб хьунилай гзаф шадвал гьа са хпе гуда.

¹⁴ Гьа и саягъда цавараллай куь Бубадизни кӀанзавайди гьа ихьтин адетдин гъвечӀи ксарикай садни терг тахьун я.

Стхадин гунагьдиз вуч ийида?

¹⁵ Ви стхади-ваха ваз гунагь кар кьуртӀа, фена адахъ галаз жуван бейкефвиликай кьилди-кьилихъ рахух. Ада яб гайитӀа, ваз стха жагъун хъувуна.

¹⁶ Ада яб тагайтӀа, ви гафарал кьве ва я пуд касди шагьидвал авун патал, жувахъ галаз са ва я кьве кас твах. Вучиз лагьайтӀа кхьенва: «Вири гафар кьве ва я пуд шагьидди тестикьарна кӀанда».

¹⁷ Стхади-вахари гьабурузни яб тагайтӀа, адакай иманийрин кӀватӀалдиз лагь, ада кӀватӀалдизни яб тагайтӀа, адаз мажусидиз, я тахьайтӀа харж кӀватӀзавайдаз хьиз килиг.

¹⁸ За квез рикӀивай лугьузва: чилел куьне вуч къадагъа авуртӀа, Цавараллайда гьам къадагъа ийида; чилел куьне вуч ийидай ихтияр гайитӀа, Цавараллайдани гьам ийидай ихтияр гуда.

¹⁹ Мад За квез рикӀивай лугьуда хьи, квекай кьве кас са кар тӀалабда лагьана меслят хьайитӀа, а кар патал абуру дуьани ийиз хьайила, ам гьихьтин кар хьайитӀани, цавараллай Бубади ам кьилиз акъудда.

²⁰ Гьинал Зи ТӀвар кьуна кьвед-пуд кас кӀватӀ хьайитӀа, абурухъ галаз Зунни жеда.

Инсаф авачир къуллугъдардикай кьиса

²¹ Ахпа Петруди мукьув агатна, Исадивай хабар кьуна: – Я Агъа! Зи стхади заз такӀан кар ийиз хьайитӀа, за адалай шумудра гъил къахчун лазим я? Иридра къахчудани?

²² – Иридра ваъ, иридра пудкъанни цӀуд гъилера – лагьана Исади. –

²³ ГьакӀ хьайила Цаварин Пачагьлугъ вичин къуллугъдарривай гьахъ-гьисаб авун тӀалабзавай пачагьдив гекъигиз жеда.

²⁴ Эвелни-эвел адан патав цӀуд агъзур тӀалантӀ бурж алай къуллугъдар гъана.

²⁵ Адавай вичел алай бурж вахгуз тахьуниз килигна, пачагьди ам, адан паб, аялар, вичихъ авай гьар са шей гваз, лукӀвиле маса гун ва идалди вичин бурж алудун эмирна.

²⁶ Инал къуллугъдарди, метӀерал акъвазна, икрам авуна: «Са тӀимил эхи хъия, за вав вири бурж вахгуда».

²⁷ Пачагьдиз адан язух атана. Ада ам ахъайна, буржни гьалална.

²⁸ Гьа и къуллугъдар, вичин виш динар бурж алай вич хьтин са къуллугъдардин патав фена, адан туьтуьникай кьуна, лугьуз хьана: «Вал алай бурж пул гахце».

²⁹ Адан бурж квайда метӀерал акъвазна, адаз минетиз хьана: «Са тӀимил эхи хъия, за вав бурж вахгуда».

³⁰ Адаз эхиз кӀан хьанач, фена ада вичин бурж квайди бурж вахгудалди къазаматда тваз туна.

³¹ И кар акур адан юлдашар гзаф пашман хьана. Абуру фена хьайи-хьайивал чпин пачагьдиз ахъайна.

³² Гьа чӀавуз пачагьди къуллугъдардиз эверна, лагьана: «Кьеркьеш лукӀ! Вуна заз минетнай лугьуз За ваз зи бурж вири гьалалнай.

³³ За ваз авур хьтин регьим вуна ви юлдашдизни авун лазим тир».

³⁴ Вири бурж вахгудалди хъел атай пачагьди ам жаллатӀрин гъиле туна.

³⁵ Лап рикӀин къеняй сада садалай куьне гъил къахчун тавуртӀа, цавараллай Зи Бубади квелайни гъил къахчудач.