МатӀай 17 - Пак Калам

Исадин къамат дегиш хьун

¹ Ругуд югъ алатайла, Петрудилай, Якьубалай ва адан стха Ягьядилай гъейри, мад касни галачиз, Иса кьакьан дагъдиз экъечӀна.

² Гьана абурун вилик Адан къамат дегиш хьана: Адан чини ракъини хьиз нур гана, Адан пекерни экв хьиз лацу хьана.

³ Садлагьана тилмизриз Адахъ галаз суьгьбетар ийиз акъвазнавай Мусани Ильяс акуна.

⁴ Гьа и арада Петруди Исадиз лагьана: – Я Агъа! Вуч хъсан хьана чун инал алаз. Ваз кӀандатӀа, за инал пуд кума эцигин: сад – Ваз, сад – Мусадиз, садни – Ильясаз.

⁵ Ада и гафар лугьузвай вахтунда абур экуь цифедик акатна, анай рахадай ван атана: – Ам Зи рикӀ алай Хва я, Зи шадвал Гьадалди я. Адан чӀалаз килиг!

⁶ И ван хьайи тилмизриз гзаф кичӀе хьана ва абур чинар кӀаникна чилел ярх хьана.

⁷ Исади, абурун патав атана, абурук гъил кяна: – КичӀе жемир, къарагъ! – лагьана Ада.

⁸ Кьил хкажна килигайла, абуруз Исадилай гъейри касни акунач.

⁹ Дагъдай эхвичӀзавайла, абуруз Исади эмирна: – Инсандин Хцел кьейидалай кьулухъ чан хкведалди, акурдакай масадаз ихтилат мийир.

¹⁰ Адан тилмизрини хабар кьуна: – Вучиз тавратдарри Месигьдилай вилик Ильяс хтун лазим я лугьузва?

¹¹ – Гьахъ я, Ильяс пайгъамбарди Адалай вилик хтана, вири крар гуьнгуьна тун лазим я, – жаваб гана Ада. –

¹² Амма За квез лугьун хьи, ам хтунни авунай, амма инсанриз ам чир хьаначир. Адаз инсанри чпивай жедайвал писвал авуна. Гьадаз хьиз, инсанри Инсандин Хцизни азабар гуда.

¹³ Гьа инлай, Иса Ильясакай рахазвайтӀани, Адан ихтилат Ягья пайгъамбардикай тирдан гъавурда тилмизар гьатнай.

Жин квай жегьил сагъар хъувун

¹⁴ Иса халкьдин патав хтайла, Адан кьилив са инсан атана, метӀерал акъвазна.

¹⁵ – Я Агъа! – лагьана ада. – Зи хциз регьим ая! Ам варз цӀийи хьайила чӀур жезва. Адаз гзаф азабар гузва, гагь ада цӀуз хкадарзава, гагь – вацӀуз.

¹⁶ За ам Ви тилмизрин патав гъанай, амма абурувай ам сагъариз хьанач.

¹⁷ – Эй иман гвачир, рекьяй акъатнавай несил! – жаваб яз лагьана Исади. – Гьикьван гагьда Зун квехъ галамукьрай? Гьикьван чӀавалди За куьн эхрай? Гъваш ам Зи патав!

¹⁸ Исади жинжиз адай экъечӀун эмирна, амни аялдай экъечӀна. Аялни гьасятда сагъ хьана.

¹⁹ Иса текдиз амайла, Адан патав тилмизар атана: – А кар чалай вучиз алакьначир? – хабар кьуна абуру.

^20-21 – Куь иман зайиф тирвиляй – лагьана Ада. – За квез рикӀивай лугьузва: куь иман финдин твар кьван авайтӀа, квевай и пелез «Инлай анихъ хьухь» лагьана эмир гуз жедай, пелни анихъ жедай. Квехъ ахьтин иман аватӀа, квелай алакь тийидай гьич са карни жедач. Исади Вичин кьиникьикай кьвед лагьай гъилера лугьун

²² Абур вири санал Галилейдиз хкведайла, Исади абуруз лагьана: – И мукьвара Инсандин Хва инсанрин гъиле твада,

²³ Ам яна рекьида, амма пуд лагьай юкъуз Адал чан хкведа. И гафар ван хьайила, адан тилмизар зурба хажалатдик акатна.

Аллагьдин КӀвализ гудай харж

²⁴ Исани тилмизар Кефернагьумдиз акъатайла, Петрудин патав Аллагьдин КӀвализ гудай харж кӀватӀдайбур атана, адавай хабар кьуна: – Ви Муаллимди Аллагьдин КӀвализ гудай харж тир кьве драхма гузвачни мегер?

²⁵ «Гузва» лагьана, Петру кӀвализ гьахьна. Петрудин сивяй гаф акъатдалди, Исади адавай хабар кьуна: – Ваз чиз, Симун, и дуьнья гъиле авайбуру харжар нивай къачузва? Ам абуру чпин веледривай къачузвани, я тахьайтӀа маса инсанривай?

²⁶ Петруди «Маса инсанривай» лагьана жаваб гана. – АкӀ хьайила, абурун веледар харжуникай азад я, – лагьана Исади. –

²⁷ Амма, харж кӀватӀдайбуруз хъел татун патал, фена вириз кӀир вегь; сифте гьатай гъетрен сив ахъая, ваз анай кьуд драхма жагъида, вуна а пул тухвана, жуван паталайни Зи паталай абуруз це.