МатӀай 16 - Пак Калам

Фарисейрин тӀалаб

¹ Адан патав сакъаярни фарисеяр атана. Иса синагъ ийиз кӀанз, абур Адал Цавараллайдавай къалуриз жедай хьтин керемат-ишара ая лугьуз алахъна.

² Ада жаваб яз лагьана: – Нянихъ квез цав яру яз акуртӀа, куьне лугьуда: хъсан гьава жеда.

³ Экуьнахъ фад цав яру яз акуртӀа, куьне лугьуда: къе чӀимел гьава жеда. Цавуз килигиз квевай гьихьтин гьава жедатӀа тайинариз жезва, амма исятда гьихьтин вахт алукьнаватӀа, адан ишарайрай куь кьил акъатзавач.

⁴ Къенин несил гьикьван чӀур ва чалкечир хьанва! И несилди керемат-ишара тӀалабзава, амма адаз Юнусан керемат-ишарадилай гъейри маса керемат-ишара аквадач. Ам, гьабур туна, хъфена.

⁵ Исадин тилмизар вирин а патаз экъечӀна, амма фу къачун абурун рикӀелай алатна.

⁶ Исади абуруз лагьана: – Килиг гьа, фарисейринни сакъайрин маядикай мукъаят хьухь.

⁷ Тилмизри, лагьайтӀа, чпив фу гвач лугьуз ихтилатарзавай.

⁸ Абурун гъавурда авай Исади лагьана: – Фу гвач лугьун вуч лагьай чӀал я, иманда зайифбур?

⁹ Куьн гилани са куьнинни гъавурда гьатнавачни? Куь рикӀел За вад фалди вад агъзур итим тухарайди аламачни? Амукьай фарай куьне шумуд зимбил ацӀурнай?

¹⁰ Куь рикӀел За ирид фалди кьуд агъзур итим тухарайди аламачни? Амукьай фарай куьне шумуд зимбил ацӀурнай?

¹¹ За квез лагьайди факай туширди куьне вучиз кьатӀанач? Килиг гьа, фарисейринни сакъайрин маядикай мукъаят хьухь.

¹² Инал абур Ада лугьузвай мая фак кутадай мая туширдан гъавурда гьатна, Ам рахазвайди фарисейринни сакъайрин чирвилерикай тир.

Петруди иман къалурун

¹³ Иса ФилипӀан Кесар шегьер авай патариз атайла, Ада Вичин тилмизривай хабар кьуна: – Инсанри Зун, яни Инсандин Хва, вуж я лугьузва?

¹⁴ – Садбуру Ягья пайгъамбар, муькуьбуру – Ильяс, пуд лагьайбуруни – Ермиягь ва я маса пайгъамбаррикай сад я лугьузва, – жаваб гана абуру.

¹⁵ – Куьне Зун вуж я лугьузва? – жузуна Ада.

¹⁶ – Ви Буба чан алай Аллагь я, Вун Адан Хва Месигь я, – жаваб гана Симун-Петруди.

¹⁷ А чӀавуз Исади лагьана: – Бахтавар я вун, Юнусан хва Симун, и гафар ваз инсанри чирнавайди туш, абур ваз цавараллай Зи Бубади чирнавайбур я.

¹⁸ Зани ваз лугьузва: вун – Петру (яни Раг) я, гьа и раг За Захъ иманийрин кӀватӀалдин бинеда эцигда, гьатта агъа дуьньядин къуватривайни адан хура акъвазиз жедач.

¹⁹ Вав За Цаварин Пачагьлугъдин куьлег вугуда: вуна чилел вуч къадагъа авуртӀа, гьам Цавараллайда къадагъа ийида; вуна чилел вуч ихтиярар гайитӀа, цавараллайдани гьа ихтиярар гуда.

²⁰ Исади Вичин тилмизривай Вич Месигь тирди садазни талгьун тӀалабна.

Исади Вичин кьиникьикай сад лагьай гъилера лугьун

²¹ Гьа чӀавалай эгечӀна Исади Вичин тилмизриз Вич Ярусалимдиз фин лазим тирдакай лагьана: – Агъсакъалри, чӀехи хахамри, тавратдарри Заз гзаф азиятар гуда, абуру Заз кьиникьин жаза гуда, пуд йикъалай Зал чан хкведа.

²² Петруди Адаз къерехдиз эверна лагьана: – Аллагьди яргъазрай, Агъа! Ви кьилел ахьтин крар татурай!

²³ Ада Петрудихъ элкъвена лагьана: – Алат Залай, иблис! Ваз Зун рекьелай алудиз кӀанзавани? Ви рикӀе авайди Аллагьдиз талукьди ваъ, вири инсанри ийидай хьтин фикирар я.

²⁴ Ахпа Исади Вичин тилмизриз лагьана: – Низ Захъ галаз къвез кӀанзаватӀа, къуй ам, чандилай гъил къачуна, вичин азабрин хашни кӀулаз яна Захъ галаз атурай.

²⁵ Низ вичин чан хуьз кӀанзаватӀа, адавай ам къакъудда. Зун патал ни вичин чан эцигайтӀа, адаз чан жагъин хъийида.

²⁶ Вичин чан пучна вири дуьнья къачуникай инсандиз вуч хийир ава? Къакъатай чан элкъвена къахчун патал гудай затӀ жагъинни мегер?

²⁷ Инсандин Хва, Вичин Бубадин баркалладик кваз, Вичин малаикарни галаз атана ахкъатда. Гьа чӀавуз Ада, чпин крариз килигна, гьардал къведайди вичел агакьарда.

²⁸ За квез рикӀивай лугьузва: инал акъвазнавайбурук ахьтинбур ква хьи, абуруз пачагь яз къведай Инсандин Хва акун тавунмаз, гьич ажални аквадач.