МатӀай 15 - Пак Калам

Михьиди ва чиркинди

¹ Ахпа Исадин патав Ярусалимдай фарисеярни тавратдарар атана, Адаз лагьана:

² – Вучиз Ви тилмизри чи бубайрин адетрал амалзавач? Фу недайла, абуру чпин гъилер чуьхуьзвач.

³ – Вучиз, квез адет хьанвай къайдаяр хуьн патал, куьне Аллагьдин тагьким чӀурзава? – жаваб гана Ада. –

⁴ Аллагьди лагьанва: «Жуван дидедизни бубадиз гьуьрмет ая», «Дидедикайни бубадикай чӀурукӀа рахадайдан жаза кьиникь я».

^5-6 Амма куьне лугьузва: «Инсанди вичин бубадиз ва я дидедиз „За вав вахгана кӀанзавай бурж за Аллагьдив ахгакьарда“ лагьайтӀа, адаз диде-бубадиз гьуьрмет тийидай ихтияр ава». Гьа идалди куьне Аллагьдин гафар куь адетралди эвез ийизва.

⁷ Кьве чин алайбур! Яшая квекай хъсандиз лагьанай:

⁸ «И инсанри мецелди Заз гьуьрмет ийизватӀани, рикӀелди абур Завай яргъа я.

⁹ Абуру Заз ийизвай ибадат гьаваянди я – инсанар абуру Зи тагькимрал ваъ, чпи арадиз гъайи къайдайрал амал ийиз вердишарзава».

^10-11 Исади халкь Вичин патав кӀватӀна, лагьана: – За лугьузвай гафариз хъсандиз яб гана, гъавурда акьукь: инсандин сивиз атайда ам чиркин ийизвач, ам чиркин ийизвайди сивяй акъатайди я.

¹² Гьа чӀавуз тилмизар Адан мукьув атана: – Ви гафари фарисейрик хъел кутунвайди чаз чизва, – лагьана абуру.

¹³ – Цавараллай Зи Бубади кутун тавур гьар са экъечӀай набатат кӀаняй акъатна терг жеда – жаваб гана Исади. –

¹⁴ Хъфирай абур; абур буьркьуьбурун буьркьуь регьберар я; буьркьуьда буьркьуьдаз рехъ къалуриз хьайитӀа, абур кьведни фуруз аватда.

¹⁵ – И кьисадин манадин гъавурда чун тур, – лагьана Адаз Петруди.

¹⁶ – Куьн адан гъавурда гьелени акьазвачни? – лагьана Исади. –

¹⁷ Бес квез чизвачни, сивиз атайди къенез физва, къеняйни ам къецел акъатзава.

¹⁸ Сивяй акъатзавайди – рикӀяй акъатзавайди я, инсан чиркинни ийизвайди гьам я.

¹⁹ РикӀяй къвезвайбур чӀуру ниятар, кьиникьар, зинавилер, явавилер, чуьнуьхунар, тапан шагьидвилер, буьгьтенар я.

²⁰ Ибуру вирида инсан чиркин ийизва, амма чуьхуьн тавур гъилерив тӀуьни инсан чиркин ийидач.

Чувуд тушир папан иман

²¹ Гьанай экъечӀна Иса Туьрсни Сидун галай патарихъ фена.

²² Адан патав и чкайра уьмуьр тухузвай са къенанви паб атана, гьарайиз эгечӀна: – Заз регьим ая, я Агъа, я Давуд пачагьдин Хва, зи руш жинерри дили ийизва.

²³ Исади жаваб ганач. Тилмизар Адан патав атана, минетиз хьана: – Ам рахкура! Ада, датӀана чи гуьгъуьна гьатна, гьараяр ийизва.

²⁴ – Зун анжах хипер хьиз рекьелай алатнавай Исраилдин халкьдин патав ракъурнавайди я, – жаваб гана Ада.

²⁵ А папа, Адан патав атана, икрам авуна лагьана: – Я Агъа! Вакай са чара!

²⁶ – Аялривай фу къакъудна кицӀериз вегьин хъсан кар туш, – жаваб гана Ада.

²⁷ – Вун гьахъ я, я Агъа! – лагьана папа. – Амма кицӀерини чпин агъайрин суфрадилай аватай гъвелер неда.

²⁸ – Эй, вах, вахъ зурба иман ава, – лагьана адаз Исади. – Гьа ваз кӀанивал хьурай! Адан руш гьасятда сагъ хъхьана.

Кьуд агъзур кас тухарун

²⁹ Гьанай хъфена, Иса Галилейдин вирин къерехдал атана. Гьанилай Ам пелел хкаж хьана, гьанал ацукьна.

³⁰ Адан патав кьецӀибур, буьркьуьбур, набутбур, лалбур ва масабур галаз гзаф инсанар къвез хьана. Гъана ахьтин инсанар Исадин кӀвачеривай эцигдай, Ада абур сагъардай.

³¹ Лалбур рахаз, набутбур сагълам жез, кьецӀибур къекъвез, буьркьуьбуруз акваз акур халкь мягьтел хьана. Абуру Исраилдин Аллагьдиз шукур авуна.

³² Исади Вичин тилмизриз эверна, лагьана: – Пуд юкъуз Зи патав гвай инсанрин язух къвезва Заз: абуруз недай затӀни авач. Заз абур тӀуьн тагана чпин кӀвалериз ахъайиз кӀанзавач, абур рекье гьалдай фин мумкин я.

³³ – Икьван гзаф халкьдиз хелвет чкада акьван фу чна гьинай гъида? – хабар кьуна тилмизри.

³⁴ – Квев гьикьван фу гва? – жузуна Исади. – Ирид фуни са тӀимил кьван кӀезрияр, – жаваб гана абуру.

³⁵ Ада халкьдиз чилел ацукьун эмирна.

³⁶ Ирид фуни гьуьлуьн гъетер къачуна, хийир-дуьа ийиз-ийиз, фар кӀар-кӀар авуна Вичин тилмизрив вугана. Тилмизри абур халкьдиз пайна.

³⁷ ТӀуьна вири тух хьана: амай кӀусар кӀватӀна, ирид зимбил ацӀурна.

³⁸ Папарни аялар квачиз, фу тӀуьрбур вири кьуд агъзур кас хьана.

³⁹ Халкь ахъайна, Ам луьткведа аваз Магъадан галай патарихъ фена.