Марк 8 - Пак Калам

Кьуд агъзур кас тухарун

¹ Гьа йикъара Исадин патав гзаф инсанар атана, абуруз недайди тахьуниз килигна, Исади Вичин тилмизар кӀватӀна, лагьана:

² – Пуд юкъуз зи патав гвай и инсанрин язух къвезва Заз: абуруз недай затӀни авач.

³ ТӀуьн тагана чпин кӀвалериз ахъаяйтӀа, абур рекье гьалдай фин мумкин я, са бязибур яргъарай атанва эхир.

⁴ – Хелвет чкада абуруз гудай кьван фу гьинай атурай? – жаваб гана тилмизри.

⁵ – Квев шумуд фу гва? – хабар кьуна Исади. – Ирид фу, – жаваб гана абуру.

⁶ Ада халкьдиз чилел ацукь лагьана. Ирид фуни къачуна, хийир-дуьа ийиз-ийиз, кӀус-кӀус авуна, Ада ам, халкьдиз гун патал, тилмизрив вугана. Абуруни а фу халкьдиз пайна.

⁷ Абурув са тӀимил кӀезриярни гвай. Хийир-дуьа авуна, Исади гьабурни пайиз туна.

⁸ ТӀуьна, халкь тух хьана. Амукьай фан кӀусарай ирид зимбил ацӀана.

⁹ Фу тӀуьрбурун кьадар кьуд агъзур итимдив агакьнавай. Абур Ада кӀвалериз ахъайна.

¹⁰ Ахпа Иса Вичин тилмизарни галаз луьткведа акьахна, Далманут галай патахъ фена.

Фарисейрин тӀалаб

¹¹ Фарисейри атана Исадихъ галаз гьуьжетар ийиз хьана. Абуру, Цаварал Алайдавай къалуриз жедай керемат-ишара къалура лугьуз, Адавай тӀалабиз хьана. Гьадалди абуруз Ам синагъ ийиз кӀанзавай.

¹² Ада дериндай агь чӀугуна, лагьана: – Вучиз и несилди керемат-ишара къалурун тӀалабзава? За квез рикӀивай лугьузва: и несилдиз керемат-ишара аквадач.

¹³ Фарисеяр гьанал туна, Ам Вичин тилмизарни галаз луьткведа аваз вирин а патаз рекье гьатна.

¹⁴ Тилмизрин рикӀелай фу къачун алатна, луьткведа чпив гвайдини тек са фу тир.

¹⁵ – Килиг гьа, фарисейрин маядикайни Гьируд пачагьдин маядикай мукъаят хьухь, – эмирна Исади тилмизриз.

¹⁶ Тилмизриз и гафар чпив фу гвачирвиляй лагьай хьиз хьанай.

¹⁷ Абурун гъавурда авай Исади лагьана: – Фу гвач вуч лагьай чӀал я? Куьне гилани кьатӀузвачни? Куьн гилани гъавурда акьазвачни? Куь рикӀер гилани къванер яз амани?

¹⁸ Вилер аваз квез аквазвачни? Япар аваз квез ван къвезвачни? Куь рикӀел затӀни аламачни?

¹⁹ За вад фу вад агъзур итимдиз пай авурла, куьне амукьай кӀусарай шумуд зимбил ацӀурнай? – ЦӀикьвед зимбил, – жаваб гана абуру.

²⁰ – Ирид фу кьуд агъзур итимдиз пай авурла, куьне амукьай кӀусарай шумуд зимбил ацӀурнай? – Ирид зимбил, – жаваб гана абуру.

²¹ – Куьн гила кьванни гъавурда акьуначни? – лагьана Ада.

Бетсаидада буьркьуьди сагъар хъувун

²² Исани тилмизар Бетсаиддиз атана акъатна. Адан патав буьркьуьди гъана ва адак гъил хкӀура лугьуз минетна.

²³ Исади буьркьуьдан гъил кьуна, ам хуьруьн къерехдиз тухвана, адан вилериз цуькӀуьн вегьена, адал гъилер эцигна хабар кьуна: – Ваз аквазвай затӀ авани?

²⁴ Буьркьуьда кьил хкажна лагьана: – Заз патавай физвай инсанар тарар хьиз аквазва.

²⁵ Ахпа Исади мад адан вилерал гъилер эцигна, буьркьуьди мад атӀумна килигна. Исади ам сагъар хъувуна. Адан вилериз экв хтана.

²⁶ Исади, ам кӀвализ рахкурдайла, лагьана: – Хуьруьз гьахьмир.

Петруди иман къалурун

²⁷ Иса Вичин тилмизар галаз ФилипӀан Кесардин патав гвай хуьрериз фена. Рекье Ада Вичин тилмизривай хабар кьуна: – Инсанар Зун Вуж я лугьуз рахазва?

²⁸ – Садбуру Ягья пайгъамбар, муькуьбуру Ильяс, пуд лагьайбуруни алатай пайгъамбаррикай сад я лугьузва, – жаваб гана абуру.

²⁹ – Бес куьне Зун Вуж я лугьузва? – жузун хъувуна Ада. – Вун Месигь я, – жаваб гана Петруди.

³⁰ Ада абуруз Вич Вуж ятӀа масадбуруз лугьун къадагъа авуна.

Исади Вичин кьиникьикай сад лагьай гъилера лугьун

³¹ Исади Вичин тилмизар «Инсандин Хци гзаф азаб-азиятар чӀугун лазим я», – лугьуз гъавурда тваз хьана. – Агъсакъалри, чӀехи хахамри, тавратдарри Инсандин Хва кваз кьадач, абуру Адаз кьиникьин жаза гуда, пуд йикъалай Адал чан хкведа, – лагьана Ада.

³² И гафар Ада ачухдиз лугьузвай. Амма Петруди, Адаз са къерехдиз эверна, ахьтин чӀуру гафар сивяй акъудмир лагьана.

³³ Элкъвена Вичин тилмизриз килигиз-килигиз, Исади Петрудин гаф атӀана: – Алат Залай, иблис! Ви рикӀе авайди Аллагь туш, вибур инсанри ийидай хьтин фикирар я.

³⁴ Ахпа Исади халкьдизни Вичин тилмизриз санал эверна. – Низ Захъ галаз къвез кӀанзаватӀа, къуй ам, чандилайни гъил къачуна, вичин азабрин хашни кӀулаз яна Захъ галаз атурай, – лагьана Ада. –

³⁵ Низ вичин чан хуьз кӀанзаватӀа, адавай ам къакъатда, Зун ва Шад Хабар патал ни вичин чан эцигайтӀа, адан чан сагъ жеда.

³⁶ Вичин чан пучна вири дуьнья къачуникай инсандиз вуч хийир ава?

³⁷ Вичин къакъатай чан элкъвена къахчун патал гудай затӀ инсандиз жагъидани?

³⁸ Къенин несил гьикьван чӀур ва чалкечир хьанва! Адакай низ Зунни Зи Гафар кьабулиз регъуь хьайитӀа, Инсандин Хцизни, Вичин Бубадин баркалла алаз, пак малаикрихъ галаз къведайла, гьахьтин касни кьабулиз регъуь жеда.