Марк 7 - Пак Калам

Михьиди ва чиркинди

¹ Садра Ярусалимдай атай фарисеярни тавратдарар Исадал алтӀушна.

^2-5 Адан бязи тилмизри чиркин гъилеривди чуьхуьн тавуна фу нез акурла, атанвайбуру Исадивай хабар кьуна: – Ви тилмизри вучиз бубайрин адетрал амал ийизвач? Абуру вучиз чиркин гъилеривди фу незва? (Фарисейри ва вири чувудри, бубайрилай инихъ адет хьанвайвал, фу недалди гъилер чуьхуьда. Базардай хтайлани, эл-адет тирвал, чин-гъил чуьхуьн тавунмаз, абуру фу недач. Идалайни гъейри, абуру гзаф маса адетар кьилиз акъудда, къаб-къажах, курар, къажгъанар ва чарпаяр чуьхуьда.)

⁶ Исади абуруз жаваб яз лагьана: – Куьн хьтин кьве чин алайбурукай Яшаян ктабда хъсандиз кхьенва: «И инсанри мецелди Заз гьуьрмет ийизватӀани, рикӀелди абур Завай яргъа я.

⁷ Абуру Заз ийизвай ибадат гьаваянди я – инсанар абуру Зи тӀалабунрал ваъ, чпиз кӀани къайдайрал амал ийиз вердишарзава».

⁸ Куьне, Аллагьди авунвай тагькимар туна, инсанри кутунвай адетар кьунва.

⁹ Ада абуруз мадни лагьана: – Куьн Аллагьдин тагькимар жуван адетралди дегишардай хъсан устӀарар я!

¹⁰ Мусадин Къанунда кхьенвай: «Жуван дидедизни бубадиз гьуьрмет ая», «Дидедикайни бубадикай чӀурукӀа рахадайдан жаза кьиникь я».

¹¹ Амма куьне лугьузва: «инсанди вичин бубадизни дидедиз „за квев вахгана кӀанзавай бурж Аллагьдив ахгакьарда“ лагьайтӀа,

¹² а касди вичин дидени буба патал са карни тавуртӀани жеда».

¹³ Гьа идалди куьне Аллагьдин гафар куь адетралди эвез ийизва ва ихьтин гзаф маса кӀвалахарни ийизва.

¹⁴ Исади халкь мад Вичин патав кӀватӀна, лагьана: – За лугьузвай гафариз хъсандиз яб гана, куьн гъавурда гьат:

^15-16 къецяй инсандин къенез физвай гьич са затӀунивайни ам чиркин ийиз жедач, инсан чиркин ийизвайди адай вичяй акъатзавайди я.

¹⁷ Ам халкьдин арадай экъечӀна кӀвализ гьахьайла, Адавай тилмизри а кьисадин мана-метлеб хабар кьуна.

¹⁸ – Куьнни гьахьтин авамар яни? – жаваб гана Исади. – Къецяй инсандин къенез физвай са затӀунини ам чиркин тийидайдан гъавурда гьатзавачни?

¹⁹ Къецяй къвезвайди инсандин рикӀиз ваъ, руфуниз физва. Гьанайни ам къецел акъатзава. (Гьа икӀ Исади инсанди незвай вири затӀар михьи тирди малумарна.)

²⁰ Исади давамарна: – Инсан чиркин ийизвайди адай вичяй акъатзавай крар я,

²¹ куьз лагьайтӀа инсандин рикӀин къеняй чӀуру ниятар, явавилер, чуьнуьхунар, кьиникьар,

²² зинавилер акъатзава. Мадни ришветар, хъилер, фендигарвал, пехилвал, асивал, кьуру дамах, диливал акъатда.

²³ Вири и пис крари адан вичин къеняй атана инсан вич чиркин ийизва.

Чувуд тушир папан иман

²⁴ Гьанай экъечӀна, Иса Туьрс шегьер галай патариз атана. Гьана Ам са кӀвализ фена. Адаз Вич ана масадбуруз чир хьана кӀанзавачир. Амма Адавай а кар чуьнуьхиз хьанач.

²⁵ Жин акатнавай руш авай са папаз адакай хабар хьана, ам атана Исадин кӀвачерихъди чилел ярх хьана.

²⁶ А паб чувудрикай тушир, ам Суьрия-Финикейдай тир. Ада Исадиз вичин рушакай жин хкуд лугьуз минетзавай.

²⁷ Амма Исади лагьана: – КӀвенкӀве аялар тухарна кӀанда, абурун сивихъай атӀана, фу кицӀериз вегьин хъсан кар туш.

²⁸ Амма папа жаваб яз лагьана: – ГьакӀ я, Агъа. Амма аялри экӀягъандин кӀаник авадарай гъвелер кицӀерални гьалтзава эхир.

²⁹ – Ихьтин хъсан жавабдин хатурдай вавай хъфейтӀани жеда, – лагьана Исади. – Ахлад! Ви рушакай жин хкатна.

³⁰ КӀвализ хтайла, папаз вичин руш жин хкатна месел къатканваз жагъана.

ЛалакӀ бишиди сагъар хъувун

³¹ Туьрс шегьердин патарив гвай чкайрилай эгечӀна, Иса сифте Сидун галайвал, ахпа Галилейдин вирин патав ЦӀуд-Шегьер галайвалди фена.

³² Адан патав са биши лалакӀ гъана, ада вичел гъилер эциг лугьуз, Адаз минетар авуна.

³³ Исади ам халкьдин арадай къерехдиз тухвана, адан япара тупӀар туна. Ахпа Исади цуькӀуьн гана, лалакӀ бишидан мецик кяна.

³⁴ Цавуз вил яна, дериндай ухьт аладарна, адаз лагьана: – Еффата! (яни «Ачух хьухь!»)

³⁵ Адан биши япар гьасятда ачух хьана, мезни ахъа хьана, вични михьидаказ рахана.

³⁶ Исади и кардикай садазни ахъаймир лагьана эмирна. Амма Ада гьикьван къадагъа авуртӀани, абуру Исадикай амайдалайни гзаф ихтилатар ахъайиз хьана.

³⁷ Вирибуру рикӀивай мягьтел хьана лугьузвай: – Вири крар иердаказ ийизва: бишибурун япар ачухарзава, лалбурун – мецер.