Марк 5 - Пак Калам

Герасинда жинерар хкудун

¹ Исани тилмизар вирин а пата авай герасинвийрин вилаятдиз акъатна.

² Иса луьткведай эвичӀайла, гьасятда кьветӀера авай сурарай Адан вилик чӀуру жин квай са кас акъатна.

³ Кьейибур динжардай кьветӀер ам патал кӀвал-югъ тир, гьич садавайни ам гьатта зунжурривни кутӀунна секинариз жезвачир;

⁴ мукьвал-мукьвал ам зунжурралди кутӀуннатӀани, адаз къандалар янатӀани, ада абур кукӀвариз гадариз хьанай. Гьич садавайни ам муьтӀуьгъариз жезвачир.

⁵ Акъваз тавуна, йифдини югъди, дагъларани кьветӀера-сурара гьарай ацалтна, ада вичи вич къванерив ядай.

⁶ Яргъай Иса акурла, ада атана Исадин вилик икрам авуна,

⁷ ва ада гьарайна лагьана: – Ваз завай вуч кӀанзава, Виридалайни Виниз тир Аллагьдин Хва Иса? Ваз Аллагьдин хатур аватӀа, зун азабрик кутамир!

⁸ Исади лагьана: – ЭкъечӀ и инсандай, чӀуру жин!

⁹ Исади адавай жузуна: – Ви тӀвар вуж я? – Зи тӀвар Кьушун я, вучиз лагьайтӀа чун гзаф я, – жаваб гана ада.

¹⁰ Ада Исадиз чеб и вилаятдай чукурмир лугьуз минетиз хьана.

¹¹ Пелен кӀане вакӀарин са чӀехи суьруьди векь незвай.

¹² Вири жинерри Исадиз минет ийиз лагьана: – Чун вакӀарин къенериз гьахьдайвал Вуна чун гьабурук кутур.

¹³ Исади абуруз ихтияр гана. ЧӀуру жинерарни а инсандай экъечӀна, фена вакӀариз гьахьна. Кьве агъзур кьван вакӀар авай суьруьди, кухунна фена, тик чархалай вириз хкадарна. Абур вири цин кӀаниз яна.

¹⁴ ВакӀарбанри, цӀай квайбуру хьиз, катна фена, и кардикай шегьердани хуьрера ахъайна. Агьалиярни вуч хьанатӀа лугьуз къвез килигиз хьана.

¹⁵ Исадин патав атайла, абуруз жинеррин кьушун квайди пекер алаз ва акьул кьиле аваз анал ацукьнаваз акуна. Абуруз кичӀе хьана.

¹⁶ А кар акурбуру жинерар квайдакайни вакӀарикай хьайи-хьайивал атайбуруз ахъайна.

¹⁷ Анал алайбуру Исадиз, чпин патарай ахлад лугьуз, минетиз хьана.

¹⁸ Иса луьткведа акьахдайла, жинерар хкатайда Адаз вични твах лугьуз минетна.

¹⁹ Амма Исади адаз ихтияр ганач. – Ахлад жуван кӀвализ, жуван мукьвабурун патав, Реббиди ваз вуч регьим авунатӀа, Ада ваз гьихьтин зурба кар авунатӀа, хъфена гьадакай ахъая, – лагьана Исади.

²⁰ И касди Исади вичиз авур зурба кардикай ЦӀуд-Шегьер тирвал хабарар чукӀурзавай. Вири инсанарни мягьтел хьана амукьзавай.

Яиран рушал чан хкун

²¹ Иса луьткведа аваз элкъвена кьулухъ хтайла, гзаф инсанар атана Адал алтӀушна. Ам вирин къерехда акъвазнавай.

²² Адан патав синагугдин кьиле авайбурукай тир Яир лугьудай са кас атана. Иса акунмазни, ам Адан кӀвачерик ярх хьана.

²³ Ада минетна лагьана: – Зи руш ажалдик ква, атана адалай кап алтадна, ам ажалдикай хиласа.

²⁴ Иса адахъ галаз фена. Адан гуьгъуьна гзаф инсанар гьатнавай, абуру Ам чуькьвена юкьва тунвай.

²⁵ Фейи чкада цӀикьвед йисуз датӀана къеняй иви физвай са паб авай.

²⁶ А папаз такур лукьман хьаначир, абурукай адан чан туьтуьниз кӀватӀ хьанвай. Ада вичихъ авай-авачирди вири лукьманриз харжнатӀани, адаз регьят хьаначир, адан гьалар амайдалайни пис жезвай.

^27-28 Исадикай а папаз виликрани ванер атанай. Исадин пекерик вичивай гъил кягъиз хьайитӀа, зун сагъ хъжеда лугьуз ада вич чӀалахъарзавай. ГьакӀ хьайила, инсанрин арадай атана, ада кьулухъай Исадин пекерик гъил кяна.

²⁹ А папай физвай иви гьасятда акъваз хьана ва ада вич сагъ хъхьайди кьатӀана.

³⁰ Исади Вичяй фейи къуват гьасятда гьиссна. Ада, халкьдихъ элкъвена, хабар кьуна: – Зи пекерик ни гъил кяна?

³¹ – Халкьди Вун элкъуьрна юкьва тунвайди акваз-акваз, Вуна «Зи пекерик ни гъил кяна?» лугьуз, хабар кьазвани? – лагьана Адаз тилмизри.

³² И кар авурди гьи паб тиртӀа лугьуз, Исади кьуд патаз вил вегьена.

³³ Папа, вичиз хьанвай регьятвал чиз, кичӀела зурзаз Адан кӀвачерик ярх хьана, вичин азабрикай ва гила хьанвай регьятвиликай авайвал Исадиз ахъайна.

³⁴ – Чан руш! – лагьана Исади адаз. – Ви иманди вун хиласна. Ахлад, саламат хьуй вун! Мад ваз тӀал хъжедач!

³⁵ И гафар Адан мецел аламаз, синагугдин кьиле авайдан кӀваляй са кас атана, лагьана: – Я Яир! Ви руш кьена. Муаллим мад икрагь ийимир.

³⁶ Исади и гафар ван тахьайдай кьуна, синагугдин кьиле авайдаз лагьана: – КичӀе жемир, анжах Захъ иман ая!

³⁷ Петрудилай, Якьубалай ва Якьубан стха Ягьядилай гъейри Ада садазни Вичихъ галаз къведай ихтияр ганач.

³⁸ Синагугдин кьиле авайдан кӀвализ атайла, Адаз ана авай шел-хвал, гьарай-вургьай акуна.

³⁹ КӀвализ гьахьна, ана Ада шехьзавайбуруз лагьана: – Куьне ина шелар-хвалар вучиз ийизва? Руш кьенвач, ам ксанва.

⁴⁰ Абур Адал хъуьрена. Амма Ам, вири кӀваляй акъудна, рушан диде-буба ва Вичин пуд тилмизни галаз руш къатканвай кӀвализ гьахьна.

⁴¹ Рушан гъил кьуна, Исади лагьана: – Талита, кум! (Ам «Я руш, За ваз къарагъ лугьузва» лагьай чӀал я.)

⁴² Руш тадиз къарагъна, къекъвез эгечӀна – адан цӀикьвед йис тир. И кар акурбур мягьтел хьана амукьна.

⁴³ Исади абуруз и кардикай садазни талгьун эмирна. Ахпа Ада рушаз тӀуьн гун эмирна.