Марк 2 - Пак Калам

Фалужди янавайди сагъар хъувун

¹ Са кьадар йикъар алатайла, Иса Кефернагьумдиз хтана. Ам кӀвале авайдакай вири шегьердиз ван хьана.

² Гьасятда кӀвал инсанрай ацӀана, ракӀаривни чка гумукьнач. Исади абурал Аллагьдин Гаф агакьариз хьана.

³ Адан патав са кьадар инсанар атана, абурукай кьуд касди фалужди янавай сад гъана.

⁴ Гзаф инсанар хьуниз килигна, Исадин мукьув агатдай мумкинвал тахьайла, мес кьунвайбуру Иса авай кӀвалин къавай тӀеквен акъудна, гьанай азарди кьунвайди агъуз авудна.

⁵ Исади, абурун иман акурла, фалужди янавайдаз лагьана: – Ви гунагьрилай гъил къахчунва, чан хва!

^6-7 Анал тавратдаррикайни са бязибур ацукьнавай. «Ида аси ихтилатар вучиз ийизва?» – фикирна абуру. – «Тек са Аллагьдилай гъейри, гунагьрилай гъил нивай къахчуз жеда?»

⁸ Абуру ихьтин фикирар ийизвайди Исадин рикӀиз аян хьана. – Вучиз куьне куь рикӀера а фикирар тунва? – лагьана Ада абуруз. –

⁹ Фалужди янавайдаз вуч лугьун регьят я? «Ви гунагьрилай гъил къахчунва» лугьудани, я тахьайтӀа «Къарагъ, месни къахчуна ахлад»?

^10-11 Амма виридан гунагьрилай гъил къахчудай ихтияр Инсандин Хцихъ авайди квез чир хьун патал, За фалужди янавайдаз лугьузва: «Къарагъ, жуван месни къахчуна кӀвализ ахлад!»

¹² Ам гьасятда къарагъна, вичин месни къахчуна, виридан виликай тӀуз хъфена. Анал алайбур вири мягьтел хьана. – Ихьтин кар чаз садрани акурди тушир, – лугьузвай абуру Аллагьдиз шукур ийиз.

Левидикай Исадин тилмиз хьун

¹³ Иса мад вирин къерехдал фена. Халкь атана Адал алтӀушна. Адани абуруз чирвилер гана.

¹⁴ Ахпа харж кӀватӀдай чкадин патавай фидайла, Адаз анал Гьалфеян хва Леви ацукьнаваз акуна. – Зи гуьгъуьна аваз ша! – лагьана Исади. Амни, къарагъна, Адан гуьгъуьнаваз фена.

¹⁵ Ахпа Исади Левидин кӀвале фу незвай. Исадихъ ва Адан тилмизрихъ галаз ана харж кӀватӀдайбурни гунагькарар гзаф авай. Адан гуьгъуьна абурукай гзафбур жедай.

¹⁶ Харж кӀватӀдайбурухъни гунагькаррихъ галаз санал Исади фу нез акурла, фарисейрин арадай акъатнавай тавратдарри Адан тилмизриз лагьана: – Ада харж кӀватӀзавайбурухъни гунагькаррихъ галаз вуч лагьана фу незва?

¹⁷ И гафар ван хьайила, Исади абуруз лагьана: – Жерягьдихъ дирибур ваъ, азарри кьунвайбур муьгьтеж жеда. Зун гьахъ-михьибуруз ваъ, гунагькарриз Зи патав эвериз атанвайди я.

Сив хуьникай

¹⁸ Гьа чӀавуз Ягьядин тилмизри ва фарисейри сив хуьзвай. Са шумуд касди, Исадин патав атана, лагьана: – Ягьядин ва фарисейрин тилмизри сив хуьзва, бес Ви тилмизри вучиз сив хуьзвач?

¹⁹ – Чам чпихъ галамай кьван гагьда мехъерин мугьманривай сив хвена акъвазиз жедани? – лагьана Исади. –

²⁰ Амма са чӀав атана, чпивай чам къакъуддайла, абуру сив хуьда.

²¹ Гьич садани цӀуру пекиниз цӀийи парчадикай пине ядач. ЯгъайтӀа, цӀийида цӀуруди акъажна, тӀеквен авайдалайни чӀехи ийида.

²² Гьич садани цӀийи чехир куьгьне целериз цадач, цайитӀа, чехирди куьгьне цел хъиткьинарда – вун чехирдикайни жеда, целерикайни; цӀийи чехирдиз цӀийи целер герек я.

Киш йикъан гъавурда тун

²³ Са Киш юкъуз Иса къуьлер экъечӀнавай никӀяй физвай. Рекье Адан тилмизри къуьлуьн кьилер атӀуз хьана.

²⁴ И кар акур фарисейри Исадиз лагьана: – Вучиз абуру Киш юкъуз къадагъа кар ийизва?

²⁵ – Давуд пачагьдиз ва адахъ галайбуруз гишин хьанвайла, абуру вуч авунатӀа куьне Каламдай садрани кӀелначни мегер? – жаваб гана Исади. –

²⁶ Им кьилин хахам АбиятӀар тир девирда хьайи кар я. Давуда, Аллагьдин КӀвализ гьахьна, хахамрилай гъейри садазни недай ихтияр авачир, Реббидин вилик жедай фар къачуна, вичини тӀуьна, галайбурузни гана.

²⁷ Ахпа Исади давамарна: – Инсан Киш югъ патал ваъ, Киш югъ инсан патал халкьнавайди я.

²⁸ ГьакӀ хьайила, Инсандин Хва Киш йикъан Агъани я.