Марк 10 - Пак Калам

Паб гъуникайни рахкуруникай

¹ Гьанай экъечӀна, Исани тилмизар Ярдан вацӀун муькуь патай яна Ягьудатдин чилерал акъатна. Исадал инсанар алтӀуш хьанай. Вичиз адет хьанвайвал, Исади абуруз мад чирвилер гузвай.

² Иса синагъ ийиз кӀанз, фарисейри атана Адавай хабар кьуна: – Гъуьлуь паб рахкурун дуьз кар яни?

³ – Мусадин Къанунда гьихьтин эмир ганва? – жаваб яз лагьана Ада.

⁴ – Мусади «тӀалакьар ганвай чар кхьена чара хьухь», – лагьана ихтияр ганай, – лагьана абуру.

⁵ – Ада а тагьким куь чӀуру рикӀер акурла кхьейди я, – жаваб яз лагьана Исади. –

⁶ Дуьнья халкь ийидайла, Аллагьди итимни паб арадал гъана.

^7-8 Гьавиляй, вичин бубани диде туна, итимдикайни папакай кьведакай сад жеда. Абур кьве чан ваъ, са чан жеда.

⁹ Гьа икӀ, Аллагьди сад авурбур инсанди чара авун лазим туш.

¹⁰ КӀвале Адан тилмизри Адавай мадни а кардикай хабар кьуна.

¹¹ – Ни вичин папахъ галаз чара хьана, масад гъайитӀа, гьада зинавал ийизва, – лагьана Исади.

¹² Паб вичин гъуьлуькай чара хьана, масадаз фейитӀа, гьадани зинавал ийизва.

Исади аялриз хийир-дуьа авун

¹³ Исади кап алтадун патал, Адан патав аялар гъиз хьана, амма тилмизри абуруз туьгьметар ийизвай.

¹⁴ И кар акур Исади, хъел атана, лагьана: – Аялар Зи патав атурай, куьне абуруз манийвал гумир, вучиз лагьайтӀа Аллагьдин Пачагьлугъ гьахьтинбурунди я.

¹⁵ За квез рикӀивай лугьузва: Аллагьдин Пачагьлугъ ни аялди хьиз кьабул тавуртӀа, ам аниз акъатдач.

¹⁶ Аялар къужахда кьуна, абурал кап алтадна, Ада абуруз хийир-дуьа авуна.

Девлет авай жегьил

¹⁷ Иса рекьиз экъечӀдайла, сада, чукурна атана, Адан вилик метӀерал акъвазна, Адавай хабар кьуна: – Хъсан Муаллим! Эбеди уьмуьрдин иеси хьун патал, за вуч авун лазим я?

¹⁸ – Вуна Заз хъсанди вучиз лугьузва? – жаваб гана Исади. – Аллагьдилай гъейри садни хъсанди туш.

¹⁹ Ваз Аллагьдин тагькимар чида: «Ягъна рекьимир, зинавал ийимир, чуьнуьхмир, тапан шагьидвал ийимир, алцурармир, жуван диде-бубадин хатур-гьуьрмет хуьх».

²⁰ – Я Муаллим, за вири а тагькимрал жуван жегьил чӀавалай амал ийизва, – лагьана ада.

²¹ Жегьилдиз килигай Исадин ам рикӀи чӀугуна. – Ваз кимизвайди са кар я – лагьана Исади, – алад, фена вахъ вуч аватӀа, гьам маса гана, кесибриз пай ая, гьа чӀавуз вахъ цавара хазинаяр жеда. ГьакӀ авурла, Захъ галаз ша.

²² И гафар ван хьайила, вич вичивай квахьна, жегьил пашмандаказ хъфена, вучиз лагьайтӀа адахъ зурба девлет авай.

²³ Элкъвена килигна, Исади Вичин тилмизриз лагьана: – Девлет авайбуруз Аллагьдин Пачагьлугъдиз гьахьун гьикьван четин я хьи!

²⁴ И гафари Адан тилмизар мягьтеларна. Амма Исади мад лагьана: – Веледар! Аллагьдин Пачагьлугъдиз гьахьун акьван четин я хьи!

²⁵ Девлет авайдаз Аллагьдин Пачагьлугъдиз гьахьунилай деведиз рапунин хъуькъуьмдай экъечӀун регьят я.

²⁶ Абур мад мягьтел хьана. – АкӀ хьайила, бес нивай вич хиласиз жеда? – хабар кьуна абуру сад-садавай.

²⁷ Абуруз килигна, Исади лагьана: – И кар инсанрилай ваъ, анжах са Аллагьдилай алакьда, Аллагьдилай алакь тийидай затӀни авайди туш.

²⁸ Гьа чӀавуз Петруди Адаз лагьана: – Ингье, вири туна, чун Ви гуьгъуьна аваз атанва.

²⁹ – За квез рикӀивай лугьузва – лагьана Исади. – Зи ва Шад Хабардин хатурдай вичин кӀвалерилай, стхайрилай, вахарилай, дидедилай, бубадилай, аялрилай, мулкарилай гъил къачурбурукай

³⁰ и девирда, виш гъилерилайни артух кӀвалерни, стхаярни, вахарни, дидеярни, аяларни, мулкарни, чеб хурук кутурбурукай, гьалт тийидай садни амукьдач. Къведай девирдани абуруз эбеди уьмуьр жеда.

³¹ Исятда вилик квай гзафбур кьулухъ жеда, кьулухъ галайбур – вилик.

Исади Вичин кьиникьикай пуд лагьай гъилера лугьун

³² Исани тилмизар Ярусалимдиз фидай рекье авайла, Иса абурукай хкатна вилик кваз физвай. И карди тилмизар мягьтеларнавай, амайбурукни кичӀевал кутунвай. Ада цӀикьвед илчидиз эверна, Вичин кьилел къведай азаб-азиятрикай абуруз мад ахъайиз хьана:

³³ – Ингье чун Ярусалимдиз физва, Инсандин Хва хаинвилелди чӀехи хахамринни тавратдаррин гъиле твада, абуруни Ам кьиникьиз акъудна римвийрин гъиле хутада.

³⁴ Ам, ягьанатар авуна, гатана, тфуяр гана, рекьида. Пуд лагьай юкъуз Адал чан хкведа.

Якьубанни Ягьядин тӀалабун

³⁵ Гьанал Исадин патав Зебедеян рухваяр Якьубни Ягья атана. – Муаллим, – лагьана абуру. – Вуна чи тӀалабун кьилиз акъудна кӀанзава чаз.

³⁶ – Квез За вуч авуна кӀанзава? – хабар кьуна Ада.

³⁷ – Вал баркалла атайла, чакай садаз Ви эрчӀи патавай, муькуьдаз чапла патавай ацукьдай ихтияр це, – лагьана абуру.

³⁸ Амма Исади абуруз лагьана: – Куьне тӀалабзавайдакай квез хабар авач. За хъвазвай гъам-пияла квевай хъваз жедани? За эхай кьван азабар квевай эхиз жедани?

³⁹ – Жеда, – жаваб гана абуру. – За хъвазвай гъам-пияла куьнени хъвада, За эхай кьван азабар куьнени эхда,

⁴⁰ амма Зи эрчӀи ва чапла патаривай ацукьун – им Завай ихтияр гуз жедай кӀвалах туш, – лагьана Исади. – А чкаяр – низ гьазурнаватӀа, гьабурунбур я.

⁴¹ И гафарин ван хьайила, амай цӀуд илчидиз Якьубакайни Ягьядикай гзаф хъел атана.

⁴² Исади, абур кӀватӀна, лагьана: – Вири халкьарихъ абурал гуж гъалибна агъавал ийизвай вилик-кьилик квай инсанар авайди, вири халкьарал гьахьтин чӀехи ксари гьакимвал тухузвайди квез чида.

⁴³ Амма куь арада акӀ туш: куь арадай низ вилик-кьилик жез кӀанзаватӀа, къуй ам куь кьилел-кӀвачел элкъуьрай.

⁴⁴ Куь арада низ сад лагьай чкадал жез кӀанзаватӀа, гьам виридаз лукӀ хьун лазим я.

⁴⁵ Инсандин Хвани Вичиз масадбуру къуллугъ авун патал ваъ, Вич масадбуруз къуллугъ ийиз атанвайди я эхир. Ам Вичин чан гзафбурун гунагьрилай гъил къахчун патал эцигиз атанвайди я.

Буьркьуь БартӀимай сагъар хъувун

⁴⁶ Ахпа абур Еригьандиз атана. Еригьандай Ам Вичин тилмизарни са кьадар инсанар галаз экъечӀдайла, абуруз Тимаян буьркьуь хва БартӀимай, це лугьуз, рекьин къерехда ацукьнаваз акуна.

⁴⁷ Назаретви Иса патавай фейиди чир хьайила, къекъверагди гьарайиз эгечӀна: – Я Иса! Заз регьим ая! Я Давуд пачагьдин Хва!

⁴⁸ Гзафбуру адаз лал хьухь лагьана, амма ада амайдалайни кӀевиз гьарайна: – Давуд пачагьдин Хва, заз регьим ая!

⁴⁹ Исади, акъваз хьана, адаз Вичин патав эвериз туна. – Къарагъ, викӀегь акъваз, – лагьана адаз анал алайбуру. – Ада ваз эверзава.

⁵⁰ Вичин аба хтӀунна гадарна, къудгъунна къарагъна, ам Исадин патав атана.

⁵¹ – Ваз Завай вуч кӀанзава? – хабар кьуна Исади. – Заз вилериз экв ахкуна кӀанзава, зи Муаллим, – лагьана буьркьуьда.

⁵² – Алад, ви иманди вун сагъарна, – лагьана Исади. Адан вилериз гьасятда экв хтана, гьамни Исадин гуьгъуьна аваз гьа са рекьяй фена.