ЛукӀа 4 - Пак Калам

Кьурумда синагъ авун

¹ Пак Руьгь акатнаваз Ярдан вацӀ галай патай хтай Иса гьа Пак Руьгьди кьурумда къекъуьриз хьана.

² Иблис ана яхцӀур юкъуз Ам рекьяй акъудиз алахъна. Гьа йикъара Исади затӀни тӀуьначир. ЯхцӀур югъ алатайла, Адаз гишин хьана.

³ Иблисди Адаз лагьана: – Вун Аллагьдин Хва яз хьайила, и къван фаз элкъуьрдай эмир це.

⁴ – Каламда кхьенва хьи, инсандал алай чан тек са фалди туш, – жаваб гана Исади.

⁵ Иблисди Ам са кьакьан дагъдиз акъудна, са легьзеда Адаз алемдин вири пачагьлугъар къалурна,

⁶ Исадиз лагьана: – И вири пачагьлугъар ва абурун халкьарин гьуьрмет-хатур гъана За Ви вилик эцигда. Абур вири зи ихтиярда ава; зи рикӀиз вуж кӀан хьайитӀа, абур за гьадаз гуда.

⁷ Вуна заз икрам авуртӀа, абур вири вибур жеда.

⁸ Исади жаваб яз лагьана: – Каламда кхьенва: «Жуван Ребби Аллагьдиз икрама, са Гьадаз къуллугъни ая».

⁹ Иблисди Ам Ярусалимдиз тухвана, Аллагьдин КӀвалин виридалайни кьакьан чкадал хкажна, лагьана: – Вун Аллагьдин Хва яз хьайила, инлай хкадра.

¹⁰ Каламда кхьенва: «Вун сагъ-саламатдиз хуьн Аллагьди Вичин малаикрин хиве твада;

¹¹ Абуру Вун, Ви кӀвач къванцихъни галукьар тавуна, гъилерал кьуна тухуда».

¹² Исади адаз жаваб яз лагьана: – Каламда лагьанва: «Виридан Ребби тир Аллагь синагъ ийимир».

¹³ Иса темягьдик кутуна куьтягьайла, иблис са кьадар вахтунда Адалай алатна.

¹⁴ Руьгьдивай къуват къачур Иса Галилейдиз хтана; чка-чкада Адакай гьар жуьредин гафар чкӀана.

¹⁵ Ада синагугра чирвилер гуз хьана, инсанрин сивера Адан тариф гьатна.

Хайи шегьерда Иса кьабул тавун

¹⁶ Иса Вич чӀехи хьайи Назаретдиз хтана. Киш юкъуз, адет тирвал, Ам синагугдиз атана. Ана авайбурун вилик Ам къарагъна Калам кӀелунив эгечӀна.

¹⁷ Адав Яшай пайгъамбардин къаргъу вугана. Ада, къаргъу ахъайна, ихьтин гафар кхьенвай чка жагъурна, кӀелна:

^18-19 «Зал Реббидин Руьгь ала. Ам гуьцӀуьр я кесиббуруз Шад Хабар гуз, есирриз азадвал гуз, буьркьуьбуруз экв хгуз, хилас ийиз зулумдик квай факъирар, чи Реббиди чӀехи регьим ийир вахт хьанвайдакай хабар гуз Зун атунин» .

²⁰ Къаргъу акьална, Ам синагугда къуллугъзавайдав вахгана, Иса ацукьна. Виридан вилер Адал алай.

²¹ – Квез инал ван хьайи и пайгъамбарвал къе кьилиз акъатна, – лугьуз хьана Исади.

²² Вири Исадихъ галаз рази яз, Адан сивяй акъатзавай хуш гафарал мягьтел хьанвай. – Ам Юсуфан хва тушни? – жузуна абуру.

²³ Исади абуруз лагьана: – Гьелбетда, куьне Заз мисалда авайвал лугьуда жеди: «Эй, жерягь! Сифте Жува Жув сагъар хъия. Инани, Жуван ватанда, Кефернагьум шегьерда Вуна авуна лагьана чаз ван хьайи крар тикрар хъия».

²⁴ – За квез рикӀивай лугьузва: вичин ватанда вич пайгъамбар яз кьабулнавай са пайгъамбарни авач, – давамарна Исади. –

²⁵ За квез авайвал лугьузва: Ильясан девирда пуд йисни зура цав кӀеви хьайила, вири чил тирвал чӀехи каш гьатна. И чӀавуз Исраилда гзаф хендедаяр авай,

²⁶ амма Аллагьди Ильяс Исраилдин вири хендедайрин патав ваъ, Сидундин патав гвай Сарфат шегьерда авай са хендедадиз куьмек гуз ракъурна.

²⁷ Элиш пайгъамбардин девирда жузам азар квайбурни Исраилда гзаф авай, амма Аллагьди абур ваъ, суьрияви Наъман сагъарна.

²⁸ И гафарин ван жезвайла, синагугда авай виридак хъел акатиз хьана.

²⁹ Абуру къарагъна Иса шегьердай чукурна. Абуру Ам, чархалай вегьин патал, шегьер алай пелен къерехдал тухвана.

³⁰ Амма Иса абурун арадай экъечӀна, Вичин рехъ кьуна фена.

ЧӀуру жин хкудун

³¹ Иса Галилейдин Кефернагьум шегьердиз эвичӀна. Киш йикъара Ада синагугда инсанриз чирвилер гузвай.

³² Вири Адан чирвилерал гьейран хьанвай, Адан гафара гьукум авайди чир жезвай.

³³ Гьа вахтунда ана чӀуру жин квай са кас авай, адани кӀевиз гьарайна:

³⁴ – Яъ, Ваз чавай вуч кӀанзава, Назаретви Иса? Вун чи эхир пучиз атанвайди яни? Вун вуж ятӀа заз чизва. Вун Аллагьдин Пакди я.

³⁵ – Лал хьухь! ЭкъечӀ адай! – эмир гана Исади. Адак акатнавай жинжи ам синагугдин юкьвал ярхарна, са зиянни тагана, ам адакай хкечӀна.

³⁶ Анал алайбуруз кӀевидаказ таъсир авуна. – Им вуч лагьай чӀал я? – са-садаз лугьуз хьана абуру. – Ада Вичин чӀехи ихтиярдалди чӀуру жинерриз эмирар гузва, ва абурни Адан чӀалаз килигзава.

³⁷ Адакай ванер-сесер вири патариз чкӀана.

Гзафбур сагъарун

³⁸ Синагугдай экъечӀна, Иса Симунан кӀвализ фена. Симунан яран дидедиз ифинди тади гузвай. Ана авайбуру Исадивай куьмек тӀалабна.

³⁹ Исади, адан патав атана, ифин алудна. Папан ифин алатна. Ам гьасятда къарагъна, абурун кьилел-кӀвачел элкъвез эгечӀна.

⁴⁰ Рагъ акӀидайла, Адан патав инсанри чпин кӀвалерай азарар квайбур гъиз хьана; Ада, гьардалай гъил элкъуьриз, абур сагъар хъийизвай.

⁴¹ Гзафбурукай хкатзавай жинерри гьарайзавай: «Вун Аллагьдин Хва я». Исади абуруз и гафар лугьун къадагъа ийизвай, вучиз лагьайтӀа абуруз Ам Месигь тирди чизвай.

Исади чирвилер гун

⁴² Югъ алукьайла, Иса шегьердай экъечӀна касни авачир чкадиз фена. Инсанар Адахъ къекъвез хьана. Ам жагъайла, абур Адал чпин патавай масаниз хъфимир лугьуз, гьавалат хьана.

⁴³ Амма Исади лагьана: – За маса шегьеррани Аллагьдин пачагьвиликай Шад Хабар гана кӀанда, Аллагьди Зун гьа и кар патал ракъурнавайди я.

⁴⁴ Ада фена Ягьудатда авай синагугра Шад Хабардикай муштулухар гун давамарна.