ЛукӀа 24 - Пак Калам

Исадал чан хтун

¹ Пакамахъ фад, гьафтедин сад лагьай юкъуз, папар атир галай гъери гваз а кьветӀ авай чкадал атана.

² КьветӀен сив кӀевнавай къван алуднаваз акурла,

³ абур къенез гьахьна, амма анай абуруз Ребби Исадин Беден жагъанач.

⁴ Абур серсер хьана акъвазнавайла, садлагьана абурун вилик цӀарцӀар гузвай пекер алай кьве итим пайда хьана.

⁵ Папариз кичӀе хьана, абурувай кьил хкажиз жезвачир. И гьал акурла, кьветӀевайбуру папариз лагьана: – Куьн чан алайдахъ кьейибурун арада вучиз къекъвезва?

⁶ Ам ина амач: Адал чан хтанва. Галилейда авайла, Ада квез лагьай гафар рикӀел хкваш.

⁷ Ада лагьанай хьи, Инсандин Хва гунагькаррин гъиле твада, Ам абуру хашуниз яда ва пуд лагьай юкъузни Адал чан хквервал я.

⁸ Папарин рикӀел Исади лагьай гафар хтана.

⁹ Абуру, кьветӀяй хъфена, цӀусад илчидиз ва амай тилмизриз хабарна. (

¹⁰ Илчийриз хабар гайибур Маждалдай тир Майрам, Ягьна, Якьубан диде Майрам ва абурухъ галай маса папар тир.)

¹¹ Абуру лугьузвай гафар гьакӀанбур хьиз хьана, илчияр папарин чӀалахъ жезвачир.

¹² Амма Петруди къарагъна кьветӀ галайвал чукурна. Элкъвена кьветӀез килигайла, адаз анжах Иса кутур кафан акуна. Хьайи кардал мягьтелвал ийиз, ам элкъвена хъфена.

Эмагьусдай тир тилмизар

¹³ Гьа и юкъуз Исадин тилмизрикай кьвед Ярусалимдилай кьве сятдин рехъ авай Эмагьус лугьудай хуьруьз физвай.

¹⁴ Абур чеб чпихъ галаз хьайи и вири агьвалатрикай рахазвай.

¹⁵ ГьакӀ рахаз-рахаз абур физвайла, Иса Вич абурун мукьув атана, абурухъ галаз санал фена.

¹⁶ Амма тилмизрин вилерин экв тӀимил хьанвай хьиз тир, абуруз Иса чир хъжезвачир.

¹⁷ Исади абурувай жузуна: – Рекье куьн куькай рахазвай? Абур чинар пашман яз акъвазна.

¹⁸ Абурукай КӀелпӀас лугьудай сада лагьана: – И йикъара Ярусалимда хьайи кардикай, аниз атай кьван инсанрикай хабар авачирди анжах са Вун яз тахьуй гьа?

¹⁹ – Вуч хабар? – жузуна Исади. – Назаретви Исадикай хабар – жаваб гана абуру. – Ам Аллагьдин ва халкьдин вилик кардани ва лагьай гафуна къудрат авай пайгъамбар тир.

²⁰ Чи чӀехи хахамрини кьилевайбуру Ам, кьиниз лайих я лугьуз, хашуниз ягъиз туна.

²¹ Амма чна, Исраил Хиласдайди атанва лугьуз, умуд кутазвай. Абуру Ам кьейи йикъалай инихъ пуд югъ алатнава.

²² Чи папарикай са бязибуру чун мягьтеларни авуна: абур экуьнахъ фад Исадин мейит эцигай кьветӀез фенай,

²³ амма абуруз Исадин мейит жагъанач. Чпиз акур малаикри Адал чан хтана лугьузвалдай.

²⁴ Чибурукай са бязибур Адан мейит эцигай кьветӀел фейила, абуруз акурди гьа папари лагьайвал я, амма абуруз Ам ана аваз акунач.

²⁵ Гьа чӀавуз Исади абуруз лагьана: – Куьн вуч акьул кьери ксар тушни! Пайгъамбарри лагьайдан чӀалахъ хьун гьакьван четин кар хьанани квез?

²⁶ Вичин баркалладив агакьун патал, Месигьди вири и азабар чӀугун лазим тирдакай Пайгъамбарри лагьаначирни кьван?

²⁷ Мусади Тавратда кхьенвайдалай эгечӀна пайгъамбаррин ктабра кхьенвай гафарал къведалди Исади Каламда Вичикай вуч лагьанватӀа, тилмизар гьадан гъавурда туна.

²⁸ Абур чеб физвай хуьруьз мукьва хьана. Исади Вич гьа хуьрелай анихъ физвайди хьиз къалурна.

²⁹ Амма абуру Ам чӀалал гъиз хьана: – Югъ алатна няни хьанва. Вун чахъ галаз амукь. Исани абурухъ галаз кӀвализ гьахьна ва ана амукьна.

³⁰ Ам абурун суфрадихъ атайла, Ада къачуна фу атӀана, хийир-дуьа авуна, абуруз пайна.

³¹ Гьа чӀавуз абурун вилер ахъа хьана, абуруз Иса чир хъхьана. Амма Ам акуна-такуна квахьна.

³² Абуру сада-садаз лагьана: – Ада рекье чун Каламдин гъавурда твадайла, чи хура кудай рикӀер авачирни кьван?

³³ Абур тадиз къарагъна Ярусалимдиз хтайла, абуруз цӀусад тилмиз ва абурухъ галайбур саналлаз жагъана.

³⁴ Анал алайбуру атайбуруз лагьана: – Реббидал гьакъикъатда чан хтанва! Ам Симуназ акуна.

³⁵ Ахпа кьве тилмизди рекье чпин кьилел атайдакай ва абуруз, фу атӀудайла, Иса гьикӀ чир хьанатӀа, гьадакай ахъайна.

Тилмизриз Иса акун

³⁶ Абуру а кардикай ихтилатдайла, Иса Вич атана абурун юкьваз акъатна ва абуруз лагьана: – Хийирар хьуй!

³⁷ Абуру, чеб чпивай квахьна, кичӀе хьана, чпин вилерикай Иса карагзава лагьана фикирна.

³⁸ Амма Исади лагьана: – Куьн акӀ вучиз ава? Вучиз куьн кьве рикӀин хьанва?

³⁹ Зи Гъилеризни килиг, Зи кӀвачеризни. Зун гьа жув я, Зак гъил кяна килиг: карагунихъ Захъ хьиз як-кӀараб жедач.

⁴⁰ ИкӀ лагьана, Ада абуруз Вичин гъилерни кӀвачер къалурна.

⁴¹ Абуру шадвиляй, гьеле чӀалахъ тахьана, мягьтелвилер ийизвайла, Ада лагьана: – Ина квехъ недай затӀ авачни?

⁴² Абуру Адаз чранвай гъетрен са пай гана.

⁴³ Къачуна Ада абурун вилик тӀуьна.

⁴⁴ – Гьеле Зун квехъ галамайла, За квез лагьанай хьи, Зи кьилел Мусадин Къанунда, пайгъамбаррин кхьинра ва Забурда кхьенвайвал вири атун лазим я, – лагьана Ада.

⁴⁵ Ахпа Исади Вичин тилмизриз Каламда кхьенвайдан гъавурда гьатдай акьул гана.

⁴⁶ – Каламда кхьенва, – лагьана Ада, – Месигьди азабар чӀугуна, кьейи пуд лагьай юкъуз Адал чан хквервал я.

⁴⁷ Ярусалимдилай эгечӀна вири халкьариз чпин гунагьрилай гъил къахчун патал, Аллагьдин рекьел ша лагьайди Месигьдин ТӀварцӀелай малумардайвал я.

⁴⁸ Куьн хьанвай кардин шагьидар я,

⁴⁹ Зани квез Зи Бубади хиве кьурди ракъурда. Квез цаварай гудай къуват квек акатдалди куьн Ярусалим шегьерда акъваз.

Иса цаварал хъфин

⁵⁰ Исади тилмизар Ярусалимдай Бетандиз кьван гъана, гъилер цавуз хкажна, абуруз хийир-дуьа авуна.

⁵¹ Ада абуруз хийир-дуьа ийидайла, Ам абурукай чара хьана, цавариз хкаж жез эгечӀна.

⁵² Абур, Адаз икрам авуна, зурба шадвилелди элкъвена Ярусалимдиз хтана.

⁵³ Аллагьдиз хийир-дуьа ийиз, абур датӀана Аллагьдин КӀвале жез хьана.