ЛукӀа 23 - Пак Калам

Иса ПилатӀан вилик гъун

¹ Дуванда авайбур вири къарагъна, Иса ПилатӀан патав тухвана.

² Абур Адак тахсирар кутаз эгечӀна: – Чаз тайинарна хьи, Вич Месигь-Пачагь я лугьуз, Римдин пачагьдиз харж гун къадагъа ийиз, Ада халкь рекьяй акъудзава.

³ ПилатӀа Исадивай хабар кьуна: – Вун чувудрин Пачагь яни? – Вуна гьакӀ я лугьузва, – жаваб гана Исади.

⁴ ПилатӀа чӀехи хахамризни халкьдиз лагьана: – Заз и инсандик тахсир кваз жагъизвач.

⁵ Амма абуру, Ада Вичин чирвилералди Ягьудатда, Галилейдай эгечӀна и чкадал къведалди халкьдик футфа кутазва лугьуз кӀевивал ийизвай.

Иса Гьирудан вилик

⁶ Галилейдикай ван хьайила, ПилатӀа жузуна: – Ам Галилейдай яни мегер?

⁷ Иса Гьируд бегдин вилаятдай тирди чир хьайила, ада Ам и йикъара Ярусалимдиз атанвай Гьирудан патав ракъурна.

⁸ Иса акурла, Гьируд гзаф шад хьана. Адаз ам фадлай акуна кӀанзавай, адаз Исадикай пара ванер атанвай. Идалайни гъейри ада вичиз Исадин керемат-ишараяр аквада лугьуз умуд авунвай.

⁹ Гьируда Исадиз гзаф суалар гана, амма Ада Гьирудаз са жавабни ганач.

¹⁰ ЧӀехи хахамрини тавратдарри Адак кӀевелай тахсирар кутузвай.

¹¹ Амма Гьирудани адан аскерри Исадихъ хукӀуриз, чпиз кӀандай кьван рахшандар авурдалай кьулухъ, Адал зарафат патал чӀагай либасарни алукӀна, Ам элкъуьрна ПилатӀан патав рахкурна.

¹² Гьа и юкъуз ПилатӀни Гьируд чеб чпихъ галаз дуст хъхьана, идалай вилик абур душманар тир.

Иса ПилатӀан вилик

¹³ ПилатӀа чӀехи хахамар, гьакимар, халкь кӀватӀна,

¹⁴ абуруз лагьана: – Куьне и Инсан халкь рекьяй акъудзавайди я лугьуз зи патав гъанва. Ингье, за куь вилик ам силисна, амма заз и инсандик куьне лугьузвай тахсирар кваз жагъизвач.

¹⁵ Гьирудазни и касдик тахсирар кваз акунач. Ада Ам чи патав рахкурнава. Квез аквазвайвал, вич кьена кӀандай хьтин гьич са затӀни и Касди авунвач.

^16-17 ГьакӀ хьайила, за Ам, гатана, ахъай хъийида.

¹⁸ Амма вири халкьди гьарайиз эгечӀна: – Ам йикь! Чаз Бараб азад ая!

¹⁹ Бараб, шегьерда кьиникьар галай гъулгъула туниз килигна, къазаматнавайди тир.

²⁰ Иса азад авун патал, ПилатӀа мад вичин ван хкажна.

²¹ Амма кӀватӀ хьанвайбуру гьарайзавай: – Ам хашуниз ягъ! Хашуниз ягъ!

²² ПилатӀа абуруз пуд лагьай гъилера лагьана: – Ада вуч пис кар авуна кьван? Заз Адак Ам рекьиз жедай хьтин тахсир кваз аквазвач. ГьакӀ хьайила, Адаз са-кьве къамчи вегьена ахъая лагьана эмирда за.

²³ Амма халкьди Ам хашуниз ягъун тӀалабзавай. Абурун гьарайри чпин кар авуна.

²⁴ ПилатӀа абурун тӀалабун кьилиз акъудун кьетӀна.

²⁵ Анал алай инсанрин тӀалабуниз килигна, къазаматда ацукьарнавай Бараб азадна, амма Иса, рекьин патал, анал алайбурун ихтиярда туна.

Иса хашуниз ягъун

²⁶ Иса хашуниз ягъиз тухузвайбуруз никӀяй шегьердиз хквезвай Киринейдай тир Симун лугьудай са кас акуна. Абуру Симунан кӀулаз хаш яна, ам Исадин гуьгъуьна аваз финиз мажбурна.

²⁷ Исадин гуьгъуьна аваз халкьдин са зурба кӀеретӀ къвезвай, абурун арада дерт чӀугваз, Адахъ шеларзавай папарни авай.

²⁸ Абурухъ элкъвена, Исади лагьана: – Эй, Ярусалим шегьердин папар! Захъ ваъ, квехъ ва куь балайрихъ шехьа.

²⁹ Ингье, инсанри «Аялар тежезвайбур, хун тавурбур ва хуру тагузвайбур бахтавар я» лугьудай йикъар алукьзава.

³⁰ Гьа чӀавуз инсанри дагъларихъ элкъвена лугьуда: «Ацахьна чал ават!» Тепейризни лугьуда: «Атана чун кӀаник кутур!»

³¹ Мижедай ацӀанвай ицӀи тар икӀ тергзаватӀа, кьурай тарцин гьал гьикӀ хьурай?

³² Адахъ галаз санал кьиникьиз акъуднавай кьве тахсиркарни тухузвай.

³³ «Келле» лугьудай чкадал агакьайла, Амни кьве тахсиркар, сад Адан эрчӀи патай, муькуьдини чапла патай хашуниз яна.

³⁴ Исади Вич хашуниз язавайбур патал Аллагьдиз дуьа авуна: – Эй Буба! Вуна ибурулай гъил къахчу, ибур чпи ийизвай кардин гъавурда авач. Нуькерри Исадин пекер чип вегьена чпин арада пайна.

³⁵ Халкь акъвазна килигзавай. Абурухъ галаз санал гьакимри рахшандар ийизвай. – Ам Аллагьди хкянавай Месигь яз, масадбур Ада хиласзавайтӀа, гила Вичи Вич хиласрай! – лугьуз хьана абуру.

³⁶ Аскеррини Адаз гьинавачир гафар лугьузвай. Адан патав атана, Адаз хъухъ лугьуз цуру чехир теклифзавай. Адан сивив цуру чехир авай къаб агудна,

³⁷ Адаз лагьана: – Вун чувудрин Пачагь ятӀа, Жува Жув хиласа.

³⁸ Адан кьилихъай кхьенвай: «Им чувудрин Пачагь я».

³⁹ Адахъ галаз санал патав гвай хашуниз янавай тахсиркаррикай сада Адаз пис экъуьгъунар авуна: – Вун Месигь ятӀа, Вуна Вунни хиласа, чунни.

⁴⁰ Муькуьда адаз туьгьметдив лагьана: – Ваз Аллагьдихъай кичӀедачни, бес вазни гьа жаза ганвачни?

⁴¹ Чаз атана кӀанзавай жаза чаз ганва; чна авур кардай чав чи эвез агакьнава, амма и касдик гьич са тахсирни квач.

⁴² Исадизни ада лагьана: – Я Иса! Вун Пачагь хьайила, Вуна зун рикӀел хкваш!

⁴³ – За ваз рикӀивай лугьузва хьи, къемаз вун Захъ галаз женнетда жеда, – лагьана Исади.

Исадин кьиникь

⁴⁴ Нисинилай сятдин пудалди вири чилел мичӀ акьалтнай:

⁴⁵ ракъинин экуьвал зайиф хьана. Аллагьдин КӀвале авай перде юкьвайгъуз пад хьана.

⁴⁶ Исади ван алаз гьарайна, лагьана: – Я Буба! Зи Руьгь За Вав вугузва. ГьакӀ лагьана Ада чан гана.

⁴⁷ И крар акур аскеррин кьилевай сада Аллагьдиз шукур авуна, лагьана: – Ам гьакъикъи гьахъ-михьи Инсан тир.

⁴⁸ Тамашиз анал алтӀушнавай вири инсанар инал хьайи кар акурла, чпин хур гатаз-гатаз, чкӀиз эгечӀна.

⁴⁹ Ам чидай кьван вирибуруз, Галилейдай Адан гуьгъуьна аваз атай папаризни, яргъал акъвазна, вири кьиляй-кьилиз акунай.

Иса рага атӀанвай сура тун

^50-51 Ягьудатдин АриматӀай шегьердай тир Юсуф лугьудай регьим авай ва гьахъ-михьи са кас Меслягьатдин векил тиртӀани, ам дуванди кьабулай къарардихъни адан крарихъ галаз рази тушир. Адан вилни Аллагьди пачагьвалдай вахтунал алай.

⁵² Ада, ПилатӀан патав атана, адавай Исадин мейит къахчудай ихтияр тӀалабна.

⁵³ Ада Исадин мейит хашунилай эляна, кетендин кафандик кутуна ва рага атӀанвай гьеле са мейитни тун тавунвай кьветӀе-сура эцигна.

⁵⁴ А югъ жуьмядин няни тир, Киш югъ алукьзавай.

⁵⁵ Юсуфан гуьгъуьна аваз Галилейдай Исадихъ галаз атай папарни фенай. Ам кьветӀе гьикӀ эцигнатӀа, гьикӀ кучукнатӀа, абур килигна.

⁵⁶ Ахпа абур кӀвализ хъфена. КӀвале абуру атир галай гъери гьазурна. Киш юкъуз, Аллагьдин тагькимрив кьазвайвал, абуру ял яна.