ЛукӀа 21 - Пак Калам

Кесиб хендедадин садакьа

¹ Исадиз садакьадин пул вегьидай буьруьнждикай авунвай крчуна пул эцигзавай девлет авайбур акуна.

² Адаз аниз кьве чет кепек вегьенвай кесиб хендедани акуна.

³ Исади лагьана: – За квез рикӀивай лугьузва: и кесиб хендедади амайбурулай гзаф пул вегьена.

⁴ АтӀабуру чпихъ авай артуханди вегьизвай, и папа, вичин кесибвилизни килиг тавуна, вичихъ авай-авачир вири гана.

Гележегдикай Исадин келимаяр

⁵ Са бязибур, Аллагьдин КӀвал эцигнавай къванер гьихьтин иербур ятӀа, ам гьихьтин багьа затӀаралди чӀагурнаватӀа аку лугьуз рахадайла, Исади лагьана:

⁶ – Ахьтин йикъар къведа хьи, квез ина аквазвай кьван затӀарикай къван къванцел аламаз садни амукьдач, вири барбатӀ жеда.

⁷ – Муаллим! – хабар кьуна Адавай. – А кар мус жеда? Адакай виликамаз хабар гудай ишара гьихьтинди я?

⁸ Исади жаваб гана: – Куьн гъалатӀ тежедайвал мукъаят хьухь, гзафбур, чеб Зун я лугьуз, Зи ТӀварцӀелай атанвайди я лугьуз, а вахтни алукьнава лугьуз, къведа. Абурун гуьгъуьна гьатмир.

⁹ Дявейрикай ва гъулгъулайрикай ванер къвез хьайила, квез кичӀе жемир: сифте гьакӀ хьун лазим я, амма им эхир туш.

¹⁰ Гьа чӀавуз Исади абуруз лагьана: – Халкь халкьдал къарагъда, пачагьлугъни – пачагьлугъдал.

¹¹ Чка-чкайра зурба залзалаяр жеда, кашни тӀегъуьн гьатда, маса бедбахтвилерни къведа ва цавайни зурба ишараяр жеда.

¹² Адалайни вилик Зун себеб яз куьн кьада ва хурук кутада. Синагугра куь дуван ийида, куьн къазаматда твада, пачагьринни гьакимрин вилик куьн жавабдарвилиз чӀугвада.

¹³ Гьа чӀавуз квез Закай рахадай мумкинвал жеда.

¹⁴ Хъсандиз рикӀел хуьх: гьихьтин жавабар гудатӀа лугьуз, виликамаз фикирар ийимир.

¹⁵ За квез рахадай мезни гуда, дерин акьулни. Гьич са душмандивайни я куь хура акъвазиз, я куьн гафаралди тухуз жедач.

¹⁶ Диде-бубаярни стхаяр-вахар, мукьва-кьилиярни дустар куьн рекьидай рекьерихъ къекъведа, квекай са бязибур рекьинни ийида.

¹⁷ Зи тилмизар хьуниз килигна, вирибуруз куьн такӀан жеда.

¹⁸ Амма куь кьилелай аватай са чӀарни пуч жедач.

¹⁹ КӀевиз акъваз – куьн хилас жеда.

²⁰ Кьушунри элкъуьрна кьунвай Ярусалим акурла, гьа чӀавуз чир хьухь хьи, ам тергдай вахт мукьва хьанва.

²¹ Гьа чӀавуз Ягьудатда авайбур дагълариз катрай. Шегьерда вуж аватӀа, гьанай экъечӀрай, шегьердин патарив вуж гватӀа, шегьердиз тефирай.

²² Кьисас йикъар ва Каламда кхьенвайди кьилел къведа.

²³ Гьа чӀавуз кӀвачел заланбурузни хурухъ чагъа аялар галайбуруз гуж жеда! И чилел зурба мусибат къведа, Аллагьдин хъелни и халкьдин кьилел аватда.

²⁴ Турунин хура гьатна, инсанрин эхир пуч жеда ва гзафбур маса халкьар авай чкайриз есирар яз тухуда. Маса халкьарини, чпин гъиле гьатай серфе куьтягь тахьанмаз, Ярусалимдиз кӀур гуда.

²⁵ Ракъинилай, вацралай ва гъетерилай чанда кичӀ твадай ишараяр аквада. Къув къачунвай гьуьлуьнни къизгъин лепейрин гъиляй вуч ийидатӀани тийижиз зурзун акатнавай халкьарин ийир-тийир квахьда.

²⁶ Цавун къуватар юзана акур инсанар къах хьана амукьда ва алемда жедай крари абурун чанда кичӀ твада.

²⁷ Гьа вахтунда абуруз Инсандин Хва циферал алаз, Вичин къудратда аваз ва баркалла алаз къвез аквада.

²⁸ И гужар кьилел къведайла, тик хъхьухь, кьилер хкаж хъия, куь хиласвал мукьва жезвайди чир хьухь.

²⁹ Исади абуруз кьиса ахъайна: – Инжилдиз ва амай тарариз килиг.

³⁰ Абуру пеш авуна акурла, квез мукьвара гад алукьдайди гьикӀ чир жезватӀа,

³¹ гьакӀ За лугьузвайди кьилел къвез акурла, Аллагьдин пачагьвилин вахт агакьнавайди квез чир хьухь.

³² За квез рикӀивай лугьузва: ам гилан несил алатна фидалди кьилиз акъатда.

³³ Чилни цав алатна фида, амма Зи Гафар алатна фидач.

³⁴ Килиг гьа, куьн явавилерин, хъунрин, дуьньядин ката-галтугунрин гуьгъуьна гьатайтӀа, а югъ, желе хьиз, атайла, куьн ийир-тийир жеда:

³⁵ а югъ дуьньяда виридан кьилел къведа.

³⁶ Кьилел къведай крар регьятдиз алуд жедайвал, бес кьадар къуват хьун патал ва эхирдай Инсандин Хцин вилик экъечӀиз хьун патал, гьар са чӀавуз уях хьухь ва дуьаяр ая.

³⁷ Гьар юкъуз Исади Аллагьдин КӀвале чирвилер гудай, йифиз анай экъечӀна Зейтун пелел фена гьана жедай.

³⁸ Пакамалай Адан гафариз яб гуз вири халкь Аллагьдин КӀвализ Адан патав къведай.