ЛукӀа 20 - Пак Калам

Исадин ихтияр

¹ Йикъарикай са юкъуз Исади Аллагьдин КӀвале инсанрин вилик чирвилер гуз, абурал Шад Хабар агакьарзавайла, Адан патав агъсакъаларни чӀехи хахамар галаз тавратдарар атана.

² – Вуна ийизвай и крар гьикӀ лагьана ийизва? – жузуна абуру. – Ваз а ихтияр ни гана?

³ – За квевайни са кардикай хабар кьада, – жаваб гана Исади, – куьнени Заз жаваб це:

⁴ Ягьяди инсанрив чпиз кӀан хьана цик акахьун къачуз тазвайни, я тахьайтӀа, Аллагьдин къастуналди?

⁵ Абуру чпи чпихъ галаз веревирдер авуна: – Чна «Аллагьдин къастуналди» лагьайтӀа, Ада хабар кьада: «Бес куьн Ягьядихъ вучиз агъунач?»

⁶ «Инсанриз чпиз гьакӀ кӀан хьана» лагьайтӀа, вири жемятди къван гана чун рекьинни мумкин я, вучиз лагьайтӀа Ягья гьакъикъи пайгъамбар тирдан вири халкь чӀалахъ жезва.

⁷ Гьавиляй абуру жаваб гана: – Ам гьикӀ ятӀа, чаз чидач.

⁸ – Зани квез а крар За ни ихтияр гана ийизватӀа лугьудач, – лагьана Исади.

Пис ципицӀбанрикай кьиса

⁹ Халкьдиз Исади ихьтин кьиса ахъайна: – Са инсанди ципицӀбагъ кутуна, ам вичиз кӀвалахиз кьунвай ципицӀбанрив вугана, вич яргъал вахтаралди сиягьатдиз фена.

¹⁰ Вахт атайла, ада ципицӀбанрин патав вичиз къвезвай майвайрин пай къахчуз вичин нуькер ракъурна, амма ципицӀбанри ам гатана ва затӀни гвачиз элкъуьрна рахкурна.

¹¹ Мад маса вач-хъша ракъурна; амма гьадазни бегьем гатунар кьуна, беябур авуна чукурна, затӀни гвачиз ам элкъуьрна кьулухъ рахкурна.

¹² Ахпа ада пуд лагьай вач-хъша ракъурна, гьамни абуру хер-кьацӀ авуна элкъуьрна рахкурна.

¹³ Инал ципицӀбагъдин иесиди лагьана: «За вуч авуртӀа хъсан я? За зи рикӀ алай хва ракъурда; ам акурла, абуруз, белки регъуь жен».

¹⁴ Амма ам акурла, ципицӀбанри чпи чпин арада веревирдер авуна: «Им варис я; ша, ирс чал гьалтун патал, чна ам рекьин».

¹⁵ Абуру ам, ципицӀбагъдай акъудна, кьена гадарна. Гила ципицӀбагъдин иесиди абуруз вуч ийида?

¹⁶ Ада атана а ципицӀбанар рекьида ва ципицӀбагъни масадбурун гъиле вугуда. И гафар ван хьайибуру лагьана: – Аллагьди яргъазрай!

¹⁷ Амма Исади, абуруз килигна, лагьана: – «УстӀарри кваз такьуна гадарай къванцикай хандакӀдин пипӀе твадай кьилин къван хьана» лагьана кхьенвай гафарин метлеб вуч я?

¹⁸ Гьар вуж а къванцел алукьайтӀа, адан чин-гъил алатда, нел а къван аватайтӀа, ам а къванци шупӀда.

¹⁹ АлакьнайтӀа, чӀехи хахамрини тавратдарри Иса инал аламаз кьуна къазаматда твадай. И кьисани Ада абурун аксина ахъайнавайдан гъавурда абур гьатнавай, амма абуруз халкьдихъай кичӀезвай.

Пачагьдиз гудай харж

²⁰ Абур, Исадилай вил алуд тийиз, Адан геле къекъвезвай. Ам гафунал кьуна Римдин сердердин гъиле тун патал, Адал чеб винелай гьахъ-михьи яз къалурдай, амма рикӀ чӀулав жасусар гьалдарнавай.

²¹ – Я Муаллим! – Исадивай хабар кьуна абуру. – Ви ихтилатар ва Вуна гузвай чирвилер гьахъбур тирди, Вуна чин чуьхуьдай гафар тийидайди чаз чизва. Вуна Аллагьдин рекьерни гьакъикъидаказ къалурзава.

²² Римдин пачагьдиз харж гун дуьз кар жезвани, жезвачни?

²³ Исади, абуруз чӀуру ният авайди чиз, лагьана:

²⁴ – Зун килигун патал, са динар гъваш. Идал алай шикил ва кхьенвай тӀвар нинди я? – Пачагьдинди я – жаваб гана абуру.

²⁵ – ГьакӀ хьайила, – лагьана Исади, – пачагьдин пай пачагьдиз це, Аллагьдин пай – Аллагьдиз.

²⁶ Абуруз халкьдин вилик Исадин гафарай Ам кьуна къазаматда твадай делилар жагъанач. Абур Адан жавабдал мягьтел хьана, кисна акъвазна.

Кьейибурал чан хтуникай

²⁷ Гьа вахтунда кьейидалай кьулухъ инсандал чан хкведач лугьудай сакъайрикай са бязибуру атана Исадивай жузуна:

²⁸ – Я Муаллим! Мусади чаз кхьенай хьи, «паб аваз аялар авачирди кьейитӀа, къуй муькуь стхади адан паб къахчуна вичин стхадин тухум кухтурай».

²⁹ Ирид стха хьана: сад лагьай стхади паб гъана, амма ам аялар тахьана кьена.

³⁰ Адан паб кьвед лагьай стхади къахчуна, аялар тахьана гьамни кьена.

³¹ Пуд лагьай стхани гьакӀ хьана. А паб ирид стхадини къахчунай, амма садахъни аялар хьанач.

³² Абурулай кьулухъ пабни хкьена.

³³ Ам ирид стхадик гъуьлуьк хьуниз килигна, абурал чан хтайдалай кьулухъ а паб ирид стхадикай гьи стхадин паб жеда?

³⁴ Исади жаваб яз лагьана: – И чилел алай садбур гъуьлуьз физва, муькуьбуру папар гъизва.

³⁵ Амма кьейидалай кьулухъ чан хтайбурукай лайих авайбуру гележегда паб тагъана ва я гъуьлуьз тефена уьмуьр тухуда.

³⁶ Малаикар хьтинбур хьана, абур рехкьидач. Аллагьди абурал чан хкуниз килигна, абурукай Аллагьдин веледар жеда.

³⁷ Кьейибурал чан хтуникай рахайтӀа, Мусадин Тавратда цӀай кьуна кузвай къукъвадин валарикай кхьенвай цӀарара Реббидиз Ибрагьиман, Исакьан ва Якьубан Аллагь лугьузва.

³⁸ Аллагь кьейибурун ваъ, чан алайбурун Аллагь я, Аллагь патал вири чан алайбур я.

³⁹ Инал тавратдаррикай са бязибуру лагьана: – Вуна хъсан лагьана, Муаллим!

⁴⁰ Мад Адавай са куьникайни хабар кьадай жуьрэт абуру хъувунач.

Месигь – Давуд пачагьдин Хва яни?

⁴¹ Исади Вичин вязер давамарна: – Месигьдиз Давудан Хва вучиз лугьузвайди я?

^42-43 Забурда Давуда вичи лагьанва эхир: «Реббиди зи Агъадиз лагьанай: „Ви душманар За ви кӀвачерик вегьидалди атана Зи эрчӀи гъилихъай ацукь“».

⁴⁴ Давуда Месигьдиз Агъа лугьуз хьайила, Ам Давудан Хва гьикӀ жезвайди я?

⁴⁵ Вири халкьди яб гудайла, Ада Вичин тилмизриз лагьана:

⁴⁶ – Тавратдарриз яргъи пекер алаз майданрал чеб къалуриз кӀанзава, абурун рикӀ халкьди чпиз гьуьрмет авун къалурунал ала. Синагуграни межлисра абур вилик чкаяр кьаз алахъда. Абурукай яргъаз хьухь!

⁴⁷ Абуру, кьве чин алайбуру хьиз, яргъалди дуьаярдай амалар ийиз, хендедайрин кӀвал-югъ тӀуьна куьтягьда. Амма Аллагьдин патай абурув лап кӀеви жаза агакьда.