ЛукӀа 19 - Пак Калам

Иса Закхеян патав

¹ Иса Еригьан шегьердай яна физвай.

² Ингье, харж кӀватӀдайбурун кьилел алай Закхей тӀвар алай, девлет авай са кас,

³ Иса вуж ятӀа чириз кӀанз, Ам акваз алахъзавай, амма вичин гъвечӀи буй себеб яз, халкьдин арадай адаз Иса аквазвачир.

⁴ Иса акун патал, ам чукурна фена тутун тараз акьахна, Иса гьа и таран патавай фин лазим тир.

⁵ Тарав агакьайла, Исади виниз килигна адаз лагьана: – Закхей! Гьерекатна эвичӀ! Къе Зун ваз мугьман хьун лазим я.

⁶ Закхея, тадиз тарай эвичӀна, Исадиз хушвилелди кӀвализ ша лагьана.

⁷ И кар акур вирибуру, Иса гунагькардин кӀвализ мугьманвилиз физва лугьуз, наразивал ийиз хьана.

⁸ Закхеяни, къарагъна, Реббидиз лагьана: – Я Агъа! За зи девлетдин са пай кесибриз гуда; за нивай артух харж къачунатӀа, гьадав кьудра артух вахгуда.

⁹ – Ви кӀвалел къе хиласвал атанва, – лагьана Исади, – вучиз лагьайтӀа вунни Ибрагьиман велед я.

¹⁰ Инсандин Хва и дуьньядиз, квахьнавай ксар жагъурна, абур хиласун патал, атанвайди я.

Пул хуьз вугуникай кьиса

¹¹ И гафариз яб гайибуруз Исади са кьисани ахъай хъувуна. Ам Ярусалимдиз мукьва хьанвай, гьакӀ хьайила гзафбуру гила-мад Аллагьди пачагьвалдай вахт алукьда лугьуз фикирар ийиз хьанай.

¹² Исади лагьана: – Са асул-несил авай инсан яргъал вилаятдиз, вичиз пачагьвал къачуна элкъвена хтун патал, физ кӀвачин хьанвай.

¹³ Ада вичин цӀуд къуллугъдардиз эверна, гьардав хуьн патал гимишдин са манат вугана лагьана: «Зун фена хкведалди и пул кардик кутур».

¹⁴ Амма адан жемятдиз ам такӀандай ва адан гуьгъуьнал алаз, «Ада пачагьвал авуна чаз кӀандач» лугьун патал, чархачияр ракъурна.

¹⁵ Пачагьвал къачуна элкъвена хтайла, ада вичин патав, ни вуч къачунатӀа чирун патал, пул вугай къуллугъдарриз эверун эмирна.

¹⁶ Сад лагьайда атана лагьана: «Агъа! Ви са гимишдин манатди цӀуд гимишдин манат гъана».

¹⁷ «Баркалла, вун хъсан къуллугъдар я! – лагьана ада. – И гъвечӀи карда вуна вафа хуьниз килигна, вун за цӀуд шегьердин кьиле акъвазарзава».

¹⁸ Кьвед лагьайда атана лагьана: «Агъа! Ви са гимишдин манатди гимишдин вад манат гъана».

¹⁹ «Вунни вад шегьердин кьиле акъвазарда», – лагьана ада идазни.

²⁰ Пуд лагьайда атана лагьана: «Агъа, ингье ягълухдик кутуна хуьзвай ви гимишдин манат.

²¹ Заз вахъай кичӀеда, вун атӀугъай, чин кӀеви инсан я: вуна эциг тавур шей вуна вахчуда, вуна цун тавур ник вуна гуьда».

²² «Ви дуван за, кьеркьеш къуллугъдар, ви гафаралди ийида! – лагьана агъади. – Зун жува эциг тавурди къахчудай ва жува цун тавурди гуьдай, чин кӀеви инсан тирди ваз чизвай.

²³ Заз хийир жедайвал, вучиз вуна зи пул кирида вуганач? Хтайла, за ам кьил алаз къахчудайди тир».

²⁴ Патав акъвазнавайбуруз ада лагьана: «Адавай пул къахчуна, ам гимишдин цӀуд манат кьил алаз гъилиз гъайидав гице».

²⁵ «Я агъа! – лагьана абуру. – Адахъ гимишдин цӀуд манат ава».

²⁶ «За квез лугьузва хьи, авайдаз гуда, авачирдавай авайдини къакъатда, – жаваб гана ада. –

²⁷ За чпин кьилел пачагьвал авуна такӀан зи душманар, лагьайтӀа, зи вилик гъана, рекьикь».

Иса Месигь Ярусалимдиз атун

²⁸ И кьиса ахъайна, Иса Ярусалимдиз рекье гьатна.

²⁹ Зейтун пелен патав гвай Бетфагдивни Бетандив агакьайла, Ада тилмизрикай кьвед ракъурна

³⁰ лагьана: – Куь вилик квай хуьруьз алад; аниз финни кумаз квел кутӀуннавай хам шаркӀунтӀ гьалтда, адал садрани инсан акьахайди туш; ам ахъайна иниз гъваш.

³¹ Квевай «Ам вучиз ахъайзава?» лагьана хабар кьадай кас хьайитӀа, куьне адаз икӀ лагь: «Ам Агъадиз герек я».

³² Ракъурайбур фена ва абуруз Ада лагьай чкадал шаркӀунтӀ жагъана.

³³ Абуру шаркӀунтӀ ахъайдайла, адан иесийри абуруз лагьана: – Куьне ламрак вучиз кязава?

³⁴ Абуруни жаваб гана: – Ам Агъадиз герек я.

³⁵ ШаркӀунтӀ абуру Исадин патав гъана; шаркӀунтӀдал чпин пекер-парталар вегьена, адал абуру Иса акьадарна.

³⁶ Иса ламрал алаз фидайла, инсанри Адан вилик рехъ тирвал чпин пекер вегьиз хьана.

³⁷ Ам Зейтун пелен кӀаниз мукьва хьайила, Адан гзаф кьадар тилмизри, чпиз икьван аламатар къалурай Аллагьдал шад яз, гьарай ацалтна шукурар ийиз хьана.

³⁸ Абуру гьарай кваз лугьуз хьана: – Реббидин ТӀварцӀелай къвезвай Пачагьдиз шукур хьурай! Цавара ислягьвал хьурай, Аллагьдиз цавар ацӀай кьван шукур хьурай!

³⁹ Халкьдин арада авай са бязи фарисейри Исадиз лагьана: – Муаллим! Жуван тилмизар секинра.

⁴⁰ – За квез лугьузва, абур кисайтӀа, къванерай гьараяр акъатда, – жаваб гана Ада.

⁴¹ Шегьер аквадай чкадив агакьайла, Иса адан гележегдихъ шел-хвал ийиз эгечӀна:

⁴² – Эй, Ярусалим, вазни ислягьвал куь гъидатӀа къемаз чир хьанайтӀа хъсан жедай! Амма Аллагьди ам вакай чуьнуьхнава.

⁴³ Ви кьилел ахьтин йикъар къведа хьи, душманри атана сенгерар яда ва кьуд патахъайни вун элкъуьрна кьада, вал абуру гьар патахъай басрухда,

⁴⁴ вун барбатӀда, ви къеневай веледарни тергда, ви къван къванцел тун тавуна вун руг-руг ийида. Ибур, ви патав куьмек гуз Аллагь атайла, ваз Ам чир тахьайвиляй жедай крар я.

Гуз-къачузвайбур чукурун

⁴⁵ Иса Аллагьдин КӀвалин гьаятдиз гьахьна, ана гуз-качузвайбур чукуриз эгечӀна.

⁴⁶ Ада абуруз лугьуз хьана: – Каламра «Зи кӀвал дуьа ийидай кӀвал я» лагьана кхьенва, амма куьне ам гьинавачир гьарамзадайрин макандиз элкъуьрнава.

⁴⁷ Ада Аллагьдин КӀвале гьар юкъуз чирвилер гузвай. ЧӀехи хахамар, тавратдарар, агъсакъалар ам рекьидай са мумкинвилихъ къекъвезвай,

⁴⁸ амма чпин фикир кьилиз акъуддай са рехъ абуруз жагъизвачир. Халкьди, лагьайтӀа, алтӀушна къанихдаказ Адан чирвилериз яб гузвай.