ЛукӀа 14 - Пак Калам

Киш хуьнилай регьим вине я

¹ Са Киш юкъуз Иса, фарисейрин кьиле авайдахъ галаз фу тӀуьн патал, адан кӀвализ фейила, ана авайбуру Адалай вил алуд тийиз хьана.

² Исадин патав беден яд кӀватӀ хьунин азарди кьунвай са кас гвай.

³ И арада Исади тавратдарривайни фарисейривай: «Киш юкъуз сагъар хъувун дуьз яни-тушни?», – лагьана хабар кьуна.

⁴ Абуру сивяй са гафни акъуднач. Исади гъил хкӀуна а кас сагъарна ва ам рекье хтуна.

⁵ Ахпа Исади инал алайбурувай жузуна: – Куь хва, я тахьайтӀа яц къуйдиз аватайтӀа, куьне, Киш юкъузни килиг тавуна, ам анай гьасятда акъуддачни?

⁶ Абурувай жаваб гуз хьанач.

Демина хъсан чкайрикай кьиса

⁷ КӀвализ эвернавайбуру къвез хъсан чкаяр хкягъиз ацукьиз акурла, Исади абуруз кьиса ахъайна:

⁸ – Ваз мехъерин межлисдиз эверайла, фена хъсан чка кьаз алахъмир, валайни машгьур касдиз эвернаваз хьун мумкин я.

⁹ Ам атайла, ваз кӀвализ эверайда: «Инал и кас ацукьрай», – лугьун мумкин я. ГьакӀ хьайила, беябур хьана, вун фена лап гьа ракӀарив гвай чкадал ацукьуниз мажбур жеда.

¹⁰ Амма ваз са межлисдиз ша лагьайла, жув фена гьа ракӀарив ацукь. Гьа чӀавуз иесиди ваз: «Я дуст, акӀ жедач, фена вини кьиле ацукь», – лугьуда. ГьакӀ хьайила, ацукьнавайбурун виликни ваз хатур-гьуьрмет жеда.

¹¹ Гьар ни вичи вич вине кьуртӀа, гьам агъуз вегьида, вичи вич агъуз кьурди виниз акъудда.

¹² Вич илифарай фарисейдизни Исади лагьана: – Мугьманвилиз эвердайла, вуна ви дустариз, стхайриз, ви мукьвабуруз, девлет авай ви къуншийриз эвермир: абуру вунни илифар хъийида ва куьн кьилера кьил хъжеда.

^13-14 Амма вуна эвердайла, эвелни-эвел элкъвена ваз хгудай шей авачир къекъверагриз, набутбуруз, кьецӀибуруз, буьркьуьбуруз ша лагь. Гьадалди вун бахтавар жеда. Гьахъ-михьи тир вири инсанрал чан хтайла, ваз Аллагьди хгуда.

Деминиз эвернавайбурукай кьиса

¹⁵ И гафарин ван хьайила, Исадихъ галаз ацукьнавайбурукай сада лагьана: – Аллагьдин Пачагьлугъда ни фу тӀуьртӀа, гьам бахтавар я.

¹⁶ Исади жаваб яз лагьана: – Са инсанди зурба межлис кутуна гзафбуруз эвернай.

¹⁷ ТӀуьн-хъун ийидай вахт хьайила, ада вичи ша лагьанвайбуруз: «Вири гьазур хьанва, буюр» лугьуз, вичин лукӀ ракъурна.

¹⁸ Амма эвернавайбур, гаф-чӀал сад авунвайди хьиз, гьар жуьредин багьнаяр акъудиз эгечӀна. Сада адаз «Зун къачунвай чилиз килигиз фин лазим я; ваз тавакъу ийида, закай кефи хамир», – лагьана.

¹⁹ Муькуьда лагьана: «За вад жуьт яцар къачунва, зун абуру цана чеб гьикӀ тухудатӀа чириз физва; ваз тавакъу ийида, залай гъил къахчу».

²⁰ Пуд лагьайда лагьана: «За паб гъанва, гьакӀ хьайила завай къвез жедач».

²¹ ЛукӀрани хтана, вичин агъадиз хьайи-хьайивал ахъайна. КӀвалин иесидиз хъел атана: «Гьерекатна, – лагьана лукӀраз, – фена шегьердин куьчейрайни ккӀарай къекъверагар, набутар, буьркьуьбурни кьецӀибур галаз хъша».

²² Са герендилай, лукӀра хтана: «Я Агъа! – лагьана. – Ви эмир кьилиз акъуднава, ятӀани суфрадихъ чкаяр мад ама».

²³ «Рекьерайни жигъиррай алад, – лагьана агъади, – зи кӀвал ацӀун патал, абур гьанрайни галаз хъша.

²⁴ За ваз лугьузва хьи, за эверна татайбуру зи фу недач!»

Тилмизвилин къимет

²⁵ Исадихъ галаз гзаф инсанар физвай. Ада абурухъ элкъвена лагьана:

²⁶ – Зи патав къвезвайда вичин бубадилайни дидедилай, папалайни аялдилай, стхайрилайни вахарилай ва вичин чандилайни гъил къачуна къвезвачтӀа, адакай Зи тилмиз хьун мумкин туш.

²⁷ Вуж Вичин азабрин хаш кӀулаз яна, Захъ галаз къвезвачтӀа, гьадакай Зи тилмиз жедач.

²⁸ Квекай садаз минара эцигиз кӀан хьайитӀа, сифте ада минарадин къимет, ахпа жувахъ авай такьатар гьисабдачни мегер?

^29-30 ТахьайтӀа, минарадин бине кутуна, ам эцигна куьтягь тавурла, ам акур вирибур а касдал, «И инсандивай бине кутунвай минара эцигна куьтягьиз хьанач», – лугьуз, хъуьреда.

³¹ Я тахьайтӀа, маса пачагьдин аксиниз дяве ийиз экъечӀзавай пачагьди ацукьна, цӀуд агъзур кас галаз вичивай къад агъзур аскер галаз къвезвай пачагьдин хура акъвазиз жедани лагьана, сифте веревирдер ийидачни кьван?

³² Адаз вичивай атӀадан хура акъваз тежедай чӀал чир хьайитӀа, ада, атӀам яргъа амаз, ислягьвилин шартӀарикай меслят авун паталди, адан кьилив вичин векилар ракъурда.

³³ Куьнни гьакӀ я, куьне квехъ авай-авачирдалай гъил къачунвачтӀа, квекай садакайни Зи тилмиз хьун мумкин туш.

³⁴ Кьел хъсан шей я; кьелен ери квахьайтӀа, адаз гьикӀ дад хгуз жеда?

³⁵ Ам чил миянар ийизни виже къведач; ам гьакӀ гадарна тада. Нихъ ван къведай япар аватӀа, гьадаз ван атурай!