Леви 9 - Пак Калам

Хахамри къуллугъ гатӀунун

¹ Муьжуьд лагьай юкъуз Мусади Гьаруназни рухвайриз ва Исраилдин агъсакъалриз эверна

² ва Гьаруназ лагьана: «Гунагьдай къурбанд патал са эркек дана ва кунуг патал са гьер гъваш; кьведни рехне квачирбур хьана кӀанда. Абур Реббидин вилик акъвазара.

³ Исраилдин рухвайриз абуру гунагьдай къурбанд патал кьун, кунуг патални йис хьанвай, рехне квачир данани кӀел гъун патал эмир це.

⁴ Мадни чпихъ галаз Реббидин вилик суварин къурбанд патал са жунгав ва са гьер ва гьакӀни чӀем какадарнавай фан къурбанд къачурай. Къе куь вилик Ребби акъвазда эхир!»

⁵ Исраилдин рухвайри Мусади эмир гайи кьван вири шейэр Гьалтунин Алачухдин патав гъана; вири эл атана Реббидин вилик акъвазна.

⁶ Мусади лагьана: «Куь вилик Реббидин баркалла пайда хьун патал ингье квез Реббиди вуч авун эмир ганватӀа».

⁷ Гьаруназ лагьайтӀа, Мусади икӀ лагьана: «Къурбангандин патав алад ва гьам жувалай, гьамни халкьдилай гъил къахчунин серенжем патал жуван гунагьдай къурбанд ва жуван кунуг ая. Ахпа, гъил къахчунин серенжем яз, Реббиди эмир гайивал, халкьдин патай къурбанд ая».

⁸ Гьаруна къурбангандин патав фена, вичелай ийизвай гунагьдай къурбанд яз, дана тукӀуна.

⁹ Рухвайри адан вилик данадин иви гъана, ада адак тӀуб кяна ва къурбангандин крчарал алтадна. Амукьай иви ада къурбангандин кӀаник экъична.

¹⁰ Гунагьдай къурбанддин пи, дуркӀунар ва лекьинин кӀвенкӀв ада, Реббиди Мусадиз эмир гайивал, къурбангандал кана,

¹¹ данадин хамни як лагьайтӀа, кундилай анихъ кана.

¹² Ахпа Гьаруна кунуг тукӀуна; рухвайри къурбанддин иви адан патав гъана, ва ада ивидалди къурбанган вири патарихъай хъичинна.

¹³ Рухвайри Гьарунав къурбанддин пайи-паяр авунвай жендек ва адан кьил вугана, ва ада ибур вири къурбангандал кана.

¹⁴ Къурбанддин къенер ва кӀвачер чуьхвена, ада абур кунугдин винел къурбангандал кана.

¹⁵ Ахпа ада халкьди гъанвай гьайванарни садакьаяр къурбанд авуна. Ада кьун кьуна – халкьдин патай тир гунагьдай къурбанд – ва гьа идалай вилик авурвал гъил къахчун патал ам тукӀуна.

¹⁶ Ахпа ада кунуг-гьайван акъудна ва ам къайда тирвал къурбанд авуна.

¹⁷ Ахпа ада фан къурбанддикай са чӀук къачуна ва ам пакаман кунугдиз алава яз, къурбангандал кана.

¹⁸ Гьаруна гьакӀ халкьдин патай суварин къурбанд яз жунгав ва са гьерни тукӀуна. Рухвайри адан патав къурбандрин иви гъана ва ада ивидалди къурбанган вири патарихъай хъичинна.

¹⁹ Абуру жунгавдин ва гьерен пи – тум, къенерал алай пи, дуркӀунар ва лекьинин кӀвенкӀв –

²⁰ ва пи гьайванрин хурун паярин винел эцигна. Пи Гьаруна къурбангандал кана,

²¹ гьайванрин хурар ва эрчӀи патан ятурар, Мусади эмир гайивал, Реббидин вилик зурзун-къурбанд яз зурзурна.

²² Гьаруна гъилер ахъайна халкьдал туькӀуьрна ва инсанриз хийир-дуьа авуна. Гунагьдай ийизвай, кунугдин ва суварин къурбандар авуна, ам агъуз эвичӀна.

²³ Мусани Гьарун Гьалтунин Алачухдик фена ва, анай экъечӀна, халкьдиз хийир-дуьа авуна. Ва вири халкьдиз Реббидин баркалла пайда хьана.

²⁴ Реббидилай атай цӀу къурбангандал алай кунуг ва пи кужумна. Им акурла, вири халкьдай еке шадвилин гьарай акъатна ва абуру пел чилиз яна.