Леви 8 - Пак Калам

Синай дагъдин патав къурбандар авун ( 8–10 кьилер) Гьарунни адан рухваяр паквилиз акъудун

¹ Реббиди Мусадиз лагьана:

² «Гьарун ва адан рухваяр эверна гъваш; алукӀдай парталар ва гуьцӀдай чӀем, гунагьдай къурбанд патал жунгав, кьве гьер ва са зимбилда авай тӀили фу къачу.

³ Вири эл Гьалтунин Алачухдин сивел кӀватӀа».

⁴ Мусади Реббиди вичиз эмир гайивал авуна. Эл Гьалтунин Алачухдин сивел кӀватӀ хьайила,

⁵ Мусади лагьана: «Ингье Реббиди вуч авун эмир авунатӀа».

⁶ Ада Гьарунни адан рухваяр вилик гъана акъвазарна, абур чуьхвена,

⁷ Гьарунал перем алукӀна, адан юкьва чӀул туна, адал абани чухва алукӀна, ам чухвадин чӀулуналди алчукна кутӀунна.

⁸ Ада Гьарунал хуруган алукӀна, хуруганда уримни туммим эцигна,

⁹ Гьарунан кьилизни сирих яна. Сирихдин вилик патал Мусади, Реббиди вичиз эмир гайивал, къизилдин кьелечӀ кӀус, пак тир таж, алкӀурна.

¹⁰ Ахпа Мусади гуьцӀдай чӀем къачуна ва, Алачухдивай ва ана авай кьван вири шейэривай гуьцӀуналди, ам паквилиз акъудна.

¹¹ Ирид гъилера къурбанган чӀемедалди хъичинна, адаз ва адахъ галай вири затӀариз, латаз ва адан кӀаник кутадай затӀуниз чӀем яна, Мусади абур паквилиз акъудна.

¹² ГуьцӀдай чӀем Гьарунан кьилел илична, Мусади адавай гуьцӀна ва паквилиз акъудна.

¹³ Ахпа ада Гьарунан рухваяр вилик акъудна, ва Реббиди вичиз эмир гайивал, абурал перемар алукӀна, абурун юкьва чӀулар туна ва абурун кьилер яйлухралди кутӀунна.

¹⁴ Ахпа ада гунагьдай къурбанд тир жунгав акъвазарна. Гьаруна ва адан рухвайри жунгавдин кьилел гъилер эцигна.

¹⁵ Жунгав тукӀуна. Мусади тӀуб ивидик кяна ва ам, къурбанган паквилиз акъудун патал, къурбангандин крчарал алтадна. Амукьай иви ада адан бинедив экъична. Гьа икӀ ада, ам патал гъил къахчунин серенжем кьиле тухуналди, къурбанган паквилиз акъудна.

¹⁶ Жунгавдин къенерал алай кьван вири пи, лекьинин къвалалай экъечӀнавай пай ва пини галаз кьве дуркӀун къачуна Мусади къурбангандал кана,

¹⁷ жунгавдин амай паяр, хам, як ва ратара авай чиркер, ада, Реббиди эмир гайивал, кундилай къерехда цӀай яна кана.

¹⁸ Ахпа кунугдин гьер акъудна. Гьарунани адан рухвайри адан кьилел гъилер эцигна,

¹⁹ ва гьер тукӀуна. Мусади къурбангандин вири патарихъ иви хъичинна.

²⁰ Гьерен жендек алажна куьлуь авуна, ва Мусади кьил, жендекдин паяр ва пи кана.

²¹ Къенерни гьерен кӀвачер чуьхвена ва Мусади са затӀни тун тавуна, гьер къурбангандал кана. Им, Реббиди Мусадиз эмир гайивал, кунуг, Реббидиз хуш ни галай гум, Адаз кудай къурбанд тир.

²² Ахпа кьвед лагьай гьер вилик акъудна – паквилиз акъудзавай къурбанд. Гьарунани адан рухвайри гьерен кьилел гъилер эцигна

²³ ва гьер тукӀуна. Мусади адан ивидикай къачуна ва Гьарунан эрчӀи патан япун кӀвенкӀвевай, эрчӀи гъилин чӀехи тупӀувай ва эрчӀи кӀвачин чӀехи тупӀувай гуьцӀна.

²⁴ Ахпа Гьарунан рухваяр вилик акъудна ва Мусади абурун гьар садан эрчӀи япун кӀвенкӀвевай, эрчӀи гъилин чӀехи тупӀувай ва эрчӀи кӀвачин чӀехи тупӀувай иви гуьцӀна – ва къурбангандин вири патарихъай амукьай иви хъичинна.

²⁵ Ахпа ада пи, тум, къенерин макь, лекьинин паталай экъечӀнавай пай, пини кваз кьве дуркӀунни ва гьерен эрчӀи ятур къачуна.

²⁶ Реббидин вилик эцигнавай тӀили фу авай зимбилдай Мусади тӀили лаваш, зейтундин чӀем янавай лаваш ва хъукъвай фу къачуна, абур вири пидал ва гьерен эрчӀи ятурдал эцигна.

²⁷ Вири ибур, Гьарунан ва адан рухвайрин гъилерал эцигнаваз, Мусади Реббидин вилик зурзун-къурбанд яз зурзурна.

²⁸ Ахпа Мусади Гьарунан ва адан рухвайрин гъилерал алай вири затӀар къачуна ва кунугдихъ галаз къурбангандал кана. Им паквилиз акъудзавай къурбанд, Реббидиз хуш ни галай гум, Адаз кудай къурбанд тир.

²⁹ Гьерен хур къачуна, Мусади ам Реббидин вилик зурзун-къурбанд яз зурзурна. Им, Реббиди адаз эмир гайивал, паквилиз акъудзавай къурбанддикай Мусадин пай тир.

³⁰ Ахпа Мусади гуьцӀдай чӀем къачуна, къурбангандилай иви къачуна ва Гьарун ва адан парталар ва гьакӀни адан рухваяр ва абурун парталар хъичинна. Гьа икӀ ада Гьарун ва адан парталар ва гьакӀни адан рухваяр ва абурун парталар паквилиз акъудна.

³¹ Мусади Гьаруназ ва адан рухвайриз лагьана: «И як Гьалтунин Алачухдин сивел ругуг ва ам гьанал паквилиз акъудзавай къурбанддин зимбилда авай фахъ галаз неъ – За „Им Гьарунани адан рухвайри тӀуьн лазим я“ лугьуз, эмир гайивал.

³² ЯкӀукайни факай амукьайди куг.

³³ Гьалтунин Алачухдин сивелай ирид юкъуз элячӀмир – куьн паквилиз акъудун куьтягь жедалди. ИкӀ ирид юкъуз давам хьун лазим я.

³⁴ Къе авур кӀвалахар Реббиди, квелай гъил къахчун патал, виликамаз къалурнавайди тир.

³⁵ Ирид юкъуз, Реббидиз куь къуллугъ авуналди, Гьалтунин Алачухдин сивел акъваз, юкъузни, йифизни, гьа икӀ хьайитӀа куьн рекьидач. Заз гьа икӀ эмир авунвай».

³⁶ Гьарунани адан рухвайри Реббиди Мусадин мецелай чпиз эмир авурвал вири кьилиз акъудна.