Леви 7 - Пак Калам

¹ Ингье тахсир хиве кьунин къурбанд авунин къанун. Им паквилерин пак затӀ я.

² Тахсир хиве кьунин къурбандни гьа кунуг тукӀвадай чкадал тукӀвада. Къурбанган вири патарихъай ивидалди хъичинна

³ ва къурбангандин винел вири пи эцигна кӀанда: гьерен тум ва къенен пи,

⁴ гьакӀни кьве дуркӀунни ва абурал алай, ятуррин патав гвай пи ва чӀулав лекьинин кӀвенкӀв. Ам дуркӀунрихъ галаз санал акъудна кӀанда.

⁵ Хахамди ибур вири къурбангандал Реббидиз кудай къурбанд яз кун лазим я. Им тахсир хиве кьунин къурбанд я.

⁶ Хахамрин тухумдин вири итимривай и як нез жеда. Ам пак чкадал тӀуьн лазим я. Им паквилерин пак затӀ я.

⁷ Гьам тахсир хиве кьунин, гьамни гунагьдай къурбанд патал къанун сад хьтинди я: къурбанд вичи гъил къахчунин серенжем кьиле тухузвай хахамдинди я.

⁸ Кьилдин касдин патахъай кунуг авур хахамди ада къурбанд авур гьайвандин хам вичиз къахчуда.

⁹ Хьра чранвай, тавада ва я ягълавда гьазурнавай фан къурбанд ам кьиле тухвай хахамдиз жеда.

¹⁰ Амай фан къурбандар, зейтундин чӀем какадарнавай, я тушни кьуру, Гьарунан эвледриз гьа сад хьиз талукь я.

¹¹ Ингье инсанди Реббидиз ийизвай суварин къурбанддин къанун.

¹² Ам шукур яз ийизватӀа, и къурбанддик зейтундин чӀем какадарнавай тӀили фу, чӀем алтаднавай тӀили лаваш ва къуьлуьн гъуьруьн хъсандиз ишиннавай тинидикай авунвай, чӀем какадарнавай кьелечӀ фу хьана кӀанда.

¹³ И, вичик гъвар квай лавашни кухтунвай, садакьа шукур ийизвай суварин къурбанддихъ галаз санал хьана кӀанда.

¹⁴ Гьар жуьредин са фу Реббидиз къурбанд авун патал къачуда; им вичи суварин къурбанддин винел ивидин стӀалар хъичинунин серенжем кьиле тухвай хахамдин пай я.

¹⁵ Шукур малумарзавай суварин къурбанддин як гьа юкъуз тӀуьна куьтягьарун лазим я – пакамалди гьич са кӀусни туна виже къведач.

¹⁶ Вяд ва я гуьгьуьлалди ийизвай суварин къурбанд кьиле тухудайла, ам гьа юкъуз тӀуьна кӀанда, амукьайди – къведай юкъуз.

¹⁷ Пуд лагьай юкъуз амукьай як кана кӀанда.

¹⁸ Суварин къурбанддин як пуд лагьай юкъузни нез хьайитӀа, и къурбанд турус жедач, ам гъайи касдин патай кьабулдач. Им чӀур хьанвай як я, ва ни ам тӀуьнатӀа, гьадаз гунагь жеда.

¹⁹ Са гьихьтин ятӀани чиркин затӀунихъ галукьай як тӀуьна виже къведач; ам кана кӀанда. Вич михьи гьар садаз як недай ихтияр ава.

²⁰ Ни вич чиркин яз, Реббидиз гузвай суварин къурбанддин як тӀуьртӀа, ам вичин халкьдикай хкудна гадарда.

²¹ Ни са гьихьтин ятӀани чиркин затӀуник хукӀурайтӀа, кӀандатӀа ам инсандин нежесар хьуй, я тушни чиркин гьайван, я тушни чан алай мурдар затӀ, ахпани Реббидиз ийизвай суварин къурбанддин як тӀуьртӀа, ам вичин халкьдикай хкудна гадарда».

Пи ва иви тӀуьн къадагъа авун

²² Реббиди Мусадиз лагьана:

²³ «Исраилдин рухвайрив хабар агакьара: „Калерин, хперин ва цӀегьерин пи немир.

²⁴ Гиликьай ва я вагьши гьайванри кукӀварай гьайванрин пи гьар жуьредин игьтияжра гъилик ая, амма тӀуьн патал ваъ.

²⁵ Ни Ребби патал кудай ихтияр авай гьайванрин пи незватӀа, гьам вичин халкьдикай хкудна гадарда.

²⁶ Куьне гьина уьмуьр тухвайтӀани, гьайванрин ва къушарин иви тӀуьн патал гъилик ийимир.

²⁷ Ни иви тӀуьн патал гъилик ийизватӀа, ам вичин халкьдикай хкудна гадарда“».

Хахамдин пай

²⁸ Реббиди Мусадиз лагьана:

²⁹ «Исраилдин рухваяр хабардар ая: „Реббидиз суварин къурбанд ийизвайда адан са чӀук Реббидив вахкурай.

³⁰ Вичин гъилералди ада вичин Реббидиз кудай къурбанд гъун лазим я: гьайвандин пи ва хуру вахкурай – и хуру Реббидин вилик зурзун-къурбанд яз зурзурна эцигдайвал.

³¹ Хахамди пи къурбангандал курай, хуру лагьайтӀа, Гьаруназ ва адан эвледриз жеда.

³² Куь суварин къурбандрин эрчӀи ятур пай яз хахамдив вахце.

³³ ЭрчӀи ятур – Гьарунан эвледрикай къурбангандал суварин къурбанддин иви хъичинзавайди ва пи кузвайди вуж ятӀа, гьадан пай я.

³⁴ Вучиз лагьайтӀа За Исраилдин рухвайривай, абурун суварин къурбандрикай зурзурай хур ва хкажай ятур къачузва ва хахам Гьаруназ ва адан эвледриз гузва. Им абуруз Исраилдин рухвайрин патай къвезвай даим пай я.

³⁵ Ихьтин, Реббидиз кудай къурбандрикай пай, Гьаруназ ва адан рухвайриз чеб Реббидин хахамар яз хкягъай йикъалай къвезва.

³⁶ Реббиди абурувай чӀем гуьцӀайла, Ада Исраилдин рухвайри хахамрив им вахкун эмир авуна – асирдилай асирдалди, несилдилай несилдалди“».

³⁷ Им кунугрин ва гьакӀни фан, гунагьдай ийизвай, тахсир хиве кьунин, паквилиз акъудзавай суварин къурбандрин къанун я.

³⁸ Вири ибурун гьакъиндай Реббиди Мусадиз Синай дагъда эмир гана – Исраилдин рухвайриз Реббидиз къурбандар авунин гьакъиндай эмир авур юкъуз, – Синайдин кьурумда.