Леви 6 - Пак Калам

¹ Реббиди Мусадиз лагьана:

² «Инсанди Реббидиз акси яз тахсиркарвал авунватӀа: адав хуьн патал ва я адан жавабдарвиле са шей вуганвайди, ва я чуьнуьхнавайди инкар авуртӀа, ва я жувандавай кичӀерар гуналди са затӀ къакъудайтӀа,

³ ва я мукьвадавай квахьай затӀ жагъана, хиве кьан тийиз хьайитӀа – инсанри ийидай, и гунагьрикай садаз рехъ гайитӀа, ва ам тапан кьин кьуналди мадни артухарайтӀа, –

⁴ ихьтин кар авурда ва вичик гунагь акатайда, сифте вичи чуьнуьхайди ва я къакъудайди, ва я адал хуьн патал тапшурайди ва вахкун тавурди, ва я са нивай ятӀани квахьна вичиз жагъайди элкъуьрна вахкурай;

⁵ ада вичин тапан кьин кьунвай вири затӀар элкъуьрна вахкурай. Ганвай зарар эхирдалди эвез хъувурай ва вадай са пай винелни эхциграй. Вири и шейэр ада иесидив тахсир хиве кьунин къурбанд гудай юкъуз вахкун лазим я.

⁶ Ва тахсир хиве кьунин къурбанд яз ада Реббидиз рехне квачир ва дуьз къимет авай са гьерни гъана хахамдив вахкурай.

⁷ Хахамди Реббидин вилик адан винел гъил къахчунин серенжем кьиле тухуда – ва и кас тахсиркар авур чӀуру кӀвалахрилай гъил къахчуда».

Кунугдинни фан къурбанддин алава къайдаяр

⁸ Реббиди Мусадиз лагьана:

⁹ «Гьаруназ ва адан рухвайриз эмир ая: „Ингье кунугдин къанун. Кунуг ам цӀув вугай чкадал аламукьна кӀанда, – къурбангандал – йифди, экв жедалди; къурбангандал цӀай куз хьана кӀанда.

¹⁰ Хахамди, беден кӀевдай кушдин партал ва кушдин шалвар алукӀна, кунугдилай кьулухъ къурбангандал аламукьдай руьхъ кӀватӀрай, ва ам къурбангандин патав ичӀиррай.

¹¹ Ахпа парталар дегишна, руьхъ кундин сергьятрилай анихъ, михьи са чкадал акъудрай.

¹² Къурбангандал цӀай курай ва туьхуьн тавурай. Хахамди адак гьар пакамахъ кӀарасар кухтурай, кунуг экӀягърай, ва адан винел суварин къурбандрин пи курай.

¹³ Къурбангандал алай цӀай датӀана, хкахь тавуна кун лазим я.

¹⁴ Ингье фан къурбанддин къанун. Гьарунан эвледри ам къурбангандин патав Реббидин вилик эцигун лазим я.

¹⁵ Къурбанддикай зейтундин чӀем квай гъуьруьн са гъаб къачуна, ва гьакӀни вири шкьакь, ва къурбангандал къурбанддин рикӀел хуьнин пай яз кана кӀанда – им Реббидиз хуш ни галай гум жеда.

¹⁶ Амай пай Гьарунани адан рухвайри тӀуьрай. Фан къурбанд тӀили фу хьиз Гьалтунин Алачухдин гъене пак тир чкадал тӀуьна кӀанда.

¹⁷ Ам гъвар кутуна гьазурна виже къведач. Заз кузвай къурбандрин и пай За Гьаруназни адан рухвайриз гузва. И пай гьам гунагьдай ийизвай, гьамни тахсир хиве кьунин къурбандрин паквилерин паквал хьиз я.

¹⁸ Гьарунан эвледрин жергейрай тир вири итимривай ам нез жеда; эбеди яз, ам несилдилай несилдалди Реббидиз кудай къурбандрикай абурун пай я. Адак хкӀур гьар гьим хьайитӀани кьетӀенди жеда“».

¹⁹ Реббиди Мусадиз лагьана:

²⁰ «Гьарунани адан рухвайри чпивай чӀем гуьцӀай сифте йикъуз Реббидиз цӀудай са пай къуьлуьн гъуьруькай тир фан вахт-вахтунда ийидай къурбанд гана кӀанда – са пай пакамахъ ва са пайни нянихъ.

²¹ Ихьтин фу зейтундин чӀем кутуна, ягълавдал авуна кӀанда. Куьне гъизвай и фу хъсандиз ишиннавай тинидикай хьун лазим я; ам куьткуьна. Им Реббидиз хуш ни галай гум жеда.

²² Гьа икӀ Гьарунан эвледрикай тир, вичи Гьарунан кар давамарзавай гьар са хахамди авурай. Ихьтин фу Ребби патал эбеди яз пай авайди ва ам вири санлай кудайди я.

²³ Хахамди ийизвай фан гьар са къурбанд вири санлай кудай къурбанд хьунухь лазим я, ам тӀуьна жедач».

Гунагьдайни тахсир хиве кьунинни суварин къурбанддин алава къайдаяр

²⁴ Реббиди Мусадиз лагьана:

²⁵ «Гьаруназни адан рухвайриз хабар це: „Ингье гунагьдай къурбанддин къанун. Гунагьдай къурбанд Реббидин вилик, кунуг тукӀвадай чкадал тукӀун лазим я. Им паквилерин пак затӀ я.

²⁶ Гунагьдай къурбанд ийизвай хахамди ам тӀуьн лазим я: ам пак чкадал, Гьалтунин Алачухдин гъене тӀуьна кӀанда.

²⁷ И якӀук хкӀур гьар гьим хьайитӀани кьетӀенди жеда. Къурбанддин иви парталрал авахьайтӀа, парталдин ивидай хьайи чка пак чкадал чуьхвена кӀанда.

²⁸ Ихьтин къурбанддин як ргай чепедин къаб хана кӀанда: ам буьруьнждин къапуна рганатӀа, и къаб гуьцӀиз михьна ва яд экъуьрна кӀанда.

²⁹ Хахамрин тухумдин вири итимривай ихьтин къурбанд нез жеда: ам паквилерин пак затӀ я.

³⁰ Амма вичин иви пак чкада гъил къахчунин серенжем кьиле тухун патал Гьалтунин Алачухдик гъайи къурбанддин як тӀуьна жедач; ам кана кӀанда“.