Леви 4 - Пак Калам

Гунагьдай къурбанд

¹ Реббиди Мусадиз лагьана:

² «Исраилдин рухвайриз хабар це: „Са ни ятӀани, чпиз чин тийиз, Реббидин къадагъайрикай сад чӀурайтӀа, тавуна кӀандай хьтин са кӀвалах авуртӀа, ингье вуч авун лазим ятӀа.

³ Кьилин хахамди са гунагь авуртӀа ва адан тахсир вири халкьдал аватайтӀа, хахамди вичи авунвай тахсиркарвиляй, гунагьрикай михьи хьун яз, Реббидиз рехнеяр квачир са жунгав къурбанд авурай.

⁴ Ада жунгав гъана Гьалтунин Алачухдин сивел, Реббидин вилик акъвазаррай, жунгавдин кьилел гъилер эцигна, ам Реббидин вилик тукӀурай.

⁵ Кьилин хахамди жунгавдин ивидикай къачуна, Гьалтунин Алачухдик тухурай,

⁶ тӀуб ивидик кяна, ирид гъилера Реббидин вилик, ибадатханадин перде галайвал хъичинрай.

⁷ Ада гьакӀ Гьалтунин Алачухда авай, Реббидин вилик эцигнавай, хуш ни галай затӀарай гум акъудун патал гъилик ийидай къурбангандин крчарални иви алтадрай, амукьай ивини Алачухдиз гьахьдай чкадин патав гвай кунугрин къурбангандин кӀаник экъичрай.

⁸ Гунагьдай къурбанддин жунгавдал алай кьван вири пи хкудун лазим я: къенерал алай пи ва къваларив гвай вири пи,

^9-10 кьве дуркӀунни абурал ятуррин патавай хьиз алай пи ва гьакӀни лекьинал алай хел суварин къурбанд ийизвай жунгавдин хьиз. Ам дуркӀунрихъ галаз санал акъудна кӀанда. Ва хахамди вири абур кунугрин къурбангандал курай.

¹¹ Жунгавдин хам ва вири адан як, кьилихъ, кӀвачерихъ, къенерихъ ва ратара авай чиркерихъ галаз санал, –

¹² жунгавдикай вуч амукьнаватӀани – кундилай алудна, руьхъ гадарзавай михьи са чкадал гъана ва гьанал кӀарасрик цӀай кутуна кана кӀанда. Ибур вири руьхъ гадардай чкадал кун лазим я.

¹³ Исраилдин вири элди, чпиз чин тийиз, са чӀуру кар авуртӀа ва идаз фикир тагайтӀа, абуру Реббидин къадагъайрикай сад чӀурайтӀа, ва тахсир вири жемятдал аватайтӀа,

¹⁴ ва абурун чӀуру крар раиж хьайитӀа, жемятди гунагьдай къурбанд яз са жунгав гъурай, ам Гьалтунин Алачухдин вилик акъвазаррай.

¹⁵ Элдин агъсакъалри Реббидин вилик жунгавдин кьилел чпин гъилер эциграй ва ам Реббидин вилик тукӀурай.

¹⁶ Кьилин хахамди жунгавдин иви Гьалтунин Алачухдик гъурай,

¹⁷ тӀуб ивидик кягърай ва Реббидин вилик, перде галайвал адалди ирид гъилера хъичинрай.

¹⁸ Ада иви Гьалтунин Алачухда Реббидин вилик квай къурбангандин крчарал алтадрай, ивидикай амукьайдини Алачухдин вилик квай кунугрин къурбангандин кӀаник экъичрай.

¹⁹ Жунгавдин къеняй вири пи акъудна ва ам къурбангандал кана кӀанда.

²⁰ Гунагьдай къурбанд ийизвай жунгавдихъ галаз вуч авун лазим ятӀа, гьа жуьреда вири кьилиз акъудна кӀанда. Гьа икӀ хахамди абурун винел гъил къахчунин серенжем кьиле тухуда – ва абурулай гъил къахчуда.

²¹ Жунгавдин жендек лагьайтӀа, кундин сергьятрай акъудна, гьа сад лагьайди хьиз, кана кӀанда. Им вири жемятдин гунагьдай къурбанд я.

²² Регьберди са чӀуру кар авуртӀа – ада, чпиз чин тийиз, Реббидин, вичин Аллагьдин, къадагъайрикай сад чӀурайтӀа, ва адал гунагь аватайтӀа,

²³ ва адаз вичи авунвай чӀуру кӀвалах къахлурайтӀа – ада рехне квачир са кьун къурбанд авурай.

²⁴ Ада кьунан кьилел гъилер эцигна, ам Реббидин вилик кунугар авун патал чара авунвай чкадал тукӀурай. Им гунагьдай къурбанд я.

²⁵ Хахамди а къурбанддин ивидик тӀуб кяна, кунугрин къурбангандин крчарал иви алтадрай, амукьай ивини къурбангандин кӀаник экъичрай.

²⁶ Вири пи лагьайтӀа, суварин къурбанддин пи хьиз, къурбангандал кана кӀанда. Гьа идалди хахамди адан винел, ам гунагьдикай михьивилиз акъудун яз, гъил къахчунин адет кьиле тухуда, – ва регьбердилай гъил къахчуда.

²⁷ Жергедин ксарикай сада, чпиз чин тийиз, са чӀуру кӀвалахдиз рехъ гайитӀа – ада Реббидин къадагъайрикай сад чӀурна ва адал гунагь атайтӀа,

²⁸ ва адаз вичи авунвай чӀуру кӀвалах къахлурайтӀа – ада рехне квачир са цӀегь къурбанд авурай.

²⁹ Ада гунагьдай къурбанддин кьилел гъилер эцигна, ам кунугар патал чара авунвай чкадал тукӀурай.

³⁰ Хахамди ивидик кяна кунугрин къурбангандин крчарал ам алтадрай, амукьай ивини къурбангандин кӀаник экъичрай.

³¹ Вири пини, суварин къурбанддин къеняй хьиз, акъудна кӀанда. Ва хахамди пи къурбангандал курай. Им Реббидиз хуш ни галай гум жеда. Гьа икӀ хахамди а касдин винел гъил къахчунин серенжем кьиле тухуда ва а касдилай гъил къахчуда.

³² А касди гунагьдай къурбанд хперин суьруьдикай къачуз хьайитӀа, рехне квачир диши кӀел гъурай.

³³ Ада къурбанддин кьилел гъилер эцигна, ам кунугрин къурбангандал тукӀурай.

³⁴ Хахамди ивидик тӀуб кяна, ам кунугрин къурбангандин крчарал алтадрай, амукьай ивини къурбангандин кӀаник экъичрай.

³⁵ Вири пини, суварин къурбанд авунвай гьерен къеняй хьиз, акъудна кӀанда. Ва хахамди вири пи Реббидиз кудай къурбандрихъ галаз санал курай. Гьа икӀ хахамди а касдин винел гъил къахчунин серенжем кьиле тухуда ва а касдилай гъил къахчуда.