Леви 27 - Пак Калам

Вяддин садакьаяр

¹ Реббиди Мусадиз лагьана:

² «Исраилдин рухваяр хабардар ая: „Сада, Реббидиз авур вяд кьилиз акъудуналди, инсандин уьмуьрдин къимет вахкун лазим ятӀа,

³ къад йисалай пудкъад йисал кьван хьанвай итимдин къимет ибадатханадин шекъелрин кьадардалди гимишдин яхцӀурни цӀуд шекъел я,

⁴ папан лагьайтӀа – къанни цӀуд шекъел.

⁵ Инсандин йисарин кьадар вадалай къадалди кьван ятӀа, гададин къиметди и чӀавуз къад шекъел тешкилда, рушан – цӀуд.

⁶ Инсандин уьмуьр са вацралай вад йисал кьван ятӀа, гададин къимет гимишдин вад шекъел, рушан лагьайтӀа, гимишдин пуд шекъел жеда.

⁷ Инсандин йисарин кьадар пудкъад ва идалай гзаф яз хьайитӀа, итимдин къиметди цӀувад шекъел тешкилда, папан лагьайтӀа, цӀуд.

⁸ Вяд авурди тайинарнавай къимет гун патал гзаф кесиб ятӀа, ам хахамдин кьилив гъана кӀанда, ва хахамди, адан гьал-агьвал гьикӀ ятӀа чирна, ада гьихьтин къимет гун лазим ятӀа тайинарда.

⁹ Хиве кьунвай вяддай Реббидиз къурбанд ийиз жедай гьайванрикай сад вахкузватӀа, Реббидиз бахш авунвай и гьайван пак тирди жезва.

¹⁰ Ам маса гьайвандалди эвез авуна жедач: я писдан чкадал хъсанди, я хъсандан чкадал писди гана жедач. Вяд авурда гьар гьикӀ ятӀани са гьайван масадалди эвез авуртӀа, и чӀавуз гьам хиве кьунвай гьайван, гьам вичелди ам эвез авунвайди пакбур жеда.

¹¹ Жуваз кьин кьунвайвал, вич Реббидиз къурбанд ийиз тежедай чиркин гьайван тайинарнатӀа, и гьайван хахамдин патав гъун герек я,

¹² ва хахамди адан къимет, ам хъсанди яни, писди яни килигна, тайинарда. Хахамди адал гьихьтин къимет эцигайтӀа, гьакӀ женни ийида.

¹³ Нуьзуьр авунвайдаз гьайван пул гана къахчуз кӀан хьайитӀа, ада адан къиметдин вадай са пай мадни эхцигун лазим я.

¹⁴ Сада вичин кӀвал Реббидиз акъудайтӀа, хахамди ам хъсанди яни, писди яни гьадалай аслу яз, кӀвалин къимет атӀун лазим я. Хахамди адан къимет гьикьван акъудайтӀа, гьакьван женни ийида.

¹⁵ Вичин кӀвал акъудайдаз ам пул гана къахчуз кӀан хьайитӀа, ада адан къиметдал вадай са пай алава хъувун лазим я – ва элкъвена вичин кӀвал къахчуда.

¹⁶ Садаз вичин тухумдин чиликай Реббидиз ник акъудайтӀа, адан къимет ана цаз жедай тумунин кьадардай акъудна кӀанда: ана цун мумкин тир мухан гьар са гьуьмердин кьилихъ гимишдин яхцӀурни цӀуд шекъел.

¹⁷ Са касди Реббидиз вичин ник элкъвей йисарин йисуз бахш ийизватӀа, адан бегьем къимет фикирда кьуна кӀанда.

¹⁸ Амма ада Реббидиз вичин ник элкъвей йисарин йисарилай гуьгъуьниз бахш ийизватӀа, хахамди никӀин къимет элкъвей йисарин йисалди амай кьван йисарин кьадардиз килигна атӀана кӀанда. И чӀавуз къимет агъузарун герек я.

¹⁹ Ник акъудайдаз ам пул гана къахчуз кӀан хьайитӀа, ада адан къиметдал мадни вадай са пай эхцигун лазим я, ва ник элкъвена гьадаз хкведа.

²⁰ Амма ада ник пул гана къахчуначтӀа, ва ам масадаз маса ганватӀа, ихьтин ник мад пул гана къахчуз жедач.

²¹ Элкъвей йисарин йисуз, ник азад хъижедайла, ам вичел вяд алай ник хьиз, Реббидиз акъуднавайди хьиз пакди жеда, адакай хахамдин хсусият жеда.

²² Сада Реббидиз маса къачунвай ник бахшнаватӀа, яни адан тухумдин чилик акат тийизвай ник,

²³ хахамди никӀин къимет элкъвей йисарин йисаралди амай кьван йисарин кьадардиз килигна атӀурай. А касди хахамдив никӀин къимет гьа юкъуз вахгун лазим я; им Реббидин пак затӀ я.

²⁴ Элкъвей йисарин йисуз лагьайтӀа, а ник, ам нивай маса къачунайтӀа, ам нин тухумдин чиликай тиртӀа, элкъвена гьаданди хъжеда.

²⁵ Вири къиметар ибадатханадин шекъелралди тайинарзава; шекъелда къад герагь ава.

²⁶ Гьайвандин эркек сифте дул Реббидиз бахшна жедач: ам гьакӀани, сифте бала яз, гьаданди я. Гьам малдин, гьам лапагдин сад лагьай бала Реббидинди я.

²⁷ Амма и сифте бала гьарам гьайвандинди ятӀа, ам, адан къиметдал мадни вадай са пай эхцигна, пул гана къахчуз жеда. Гьайван пул гана къахчунвачтӀа, ам тайинарнавай къиметдай маса гуда.

²⁸ Амма иесиди вяд авуна Реббидиз эцигдай гьич са жуьредин хсусиятни, кӀандатӀа вич инсан, гьайван ва я ирс тир чил хьурай, я маса гуз, я пул гана къахчуз жедач. Вяд авуна Реббидиз акъудай вири затӀар паквилерин паквал я.

²⁹ Вяд авуник акатай инсан пул гана къахчуз жедач; ам яна кьиникь лазим я.

³⁰ Чили гузвай вири затӀарин – никӀерин бегьер ва тарарин майваяр – цӀуд паюникай са пай Реббидиз талукь я; ибур Реббидин пак затӀар я.

³¹ Садаз вичин цӀуд паюникай са пай пул гана къахчуз кӀанзаватӀа, ада адан къиметдал вадай са пай эхцигун лазим я.

³² Карч алай ири ва куьлуь гьайванрин цӀуд паюникай са пай – нехирбандин лашдин кӀаникай фейи гьар са цӀуд лагьай гьайван Реббидин пак тир затӀ я.

³³ Хъсан гьайванар писбурукай чара авун ва садбур масабуралди эвез авун лазим туш. Амма гьар гьикӀ хьайитӀани са гьайван масадалди эвез авунатӀа, абур къведни пак тирбуруз элкъвезва; абур пул гана къахчуз жедач“».

³⁴ Реббиди Синай дагъдал Мусадиз Исраилдин рухваяр патал авур эмирар гьа ихьтинбур я.