Леви 26 - Пак Калам

Хийир-дуьа ва лянет ( 26–27 кьилер) Яб гунай хийир-дуьа авун

¹ Реббиди Мусадиз лагьана: «Куьне квез бутар рас ийимир, куьн авай чкайра я раснавай кӀалубар, я пак къванер хкажмир, куь чилел, абурун патав икрам авун патал, чпел шикилар атӀанвай къванер эцигмир. ГьикӀ лагьайтӀа Зун, Ребби, куь Аллагь я.

² Зи Киш йикъар кьиле твах ва Зи ибадатханадиз гьуьрмет ая. Зун Ребби я.

³ Куьне За къалурнавай къайдаяр кьилиз акъудиз хьайитӀа, Зи эмирар мукьуфдивди кьиле тухуз хьайитӀа,

⁴ За квез вахт-вахтунда къвалар ракъурда ва чили бегьер гуда, чуьлда авай тарарини бегьер гъида.

⁵ Куьне гьеле техилар гатун кьилиз акъуд тавунмаз, ципицӀар кӀватӀ хъийидай вахт алукьда, ципицӀар гьеле кӀватӀ тавунмаз – тумар цадай вахт алукьда; куьне тухдалди неда ва жуван чилел секин уьмуьр тухуда.

⁶ За куь уьлкведиз ислягьвал гуда: куьн ксун патал къаткайла, садани куь секинвал чӀурдач. За куь чилелай вагьши гьайванар алудда; туруни куь чил барбатӀ ийидач.

⁷ Куьне куь душманар катуниз мажбур ийида, абур куь туруник телеф жеда.

⁸ Квекай вад виш кас катарда, виш касди цӀуд агъзур катарда, куь душманар куь туруник телеф жеда!

⁹ За квез хийир-дуьа ийида. За куьн гзаф аладдайбур, ва гзаф кьадарралди авайбур ийида. За квехъ галаз авай Зи Икьрар кьилиз акъудда.

¹⁰ Куьне шазанлай амай затӀар тӀуьн тавунмаз, куьн абур, цӀийи бегьердиз чка хьун патал, гадаруниз мажбур жеда.

¹¹ За Зи кӀвал куь арада эцигда ва За квез нифрет ийидач;

¹² Зун куь арада жеда, куь Аллагь жеда, куьнни – Зи халкь.

¹³ Зун Ребби, квекай мисривийрин лукӀар тахьун патал, куьн Мисридай ахкъудай куь Аллагь я. За, куьн гардан кӀир тавуна къекъуьнин мураддалди, куьн кӀаник акатнавай вик кукӀварна.

Яб тагунай лянет

¹⁴ Амма куьне Заз яб тагуз, Зи вири эмирар кьилиз акъуд тийиз,

¹⁵ куьне За къалурнавай къайдаяр инкар ийиз ва куьне Зи вири эмирар кьилиз акъуд тийиз ва Захъ галаз авай икьрар чӀуриз Зи къалурунар нифрет ийиз хьайитӀа,

¹⁶ За квез вуч ийидатӀа чир хьухь. За квез мусибат ийида: верем ва цӀаярин азар ракъурда, куь вилерин экв зайиф жеда, чанди куь гзаф азаб чӀугвада. Куьне тумар цада, амма гьавайда жеда – куь фу куь душманри неда.

¹⁷ За квел Зи хъел ракъурда: душманри куьн кӀаник кутада, мидяйри квел агъавал ийида. Ва куьн, квехъ садни галтугзавачтӀани, кьулухъ килиг тийиз катда.

¹⁸ Куьне идалай кьулухъни Заз яб тагайтӀа, За квев куь гунагьрай ирид гъилера артух жаза агакьарда,

¹⁹ За куь кьилиз ялдай лавгъавал кукӀварна терг ийида. За куь кьилел алай цав ракь хьиз, кӀвачерик квай чил буьруьнж хьиз жедайвал ийида.

²⁰ Куьне куь къуватар гьавая серф ийида: куь чили бегьер гудач, тарарини майваяр гъидач.

²¹ Амма куьне идалай кьулухъни Заз аксивал авуртӀа ва Заз яб гуз кӀан тахьайтӀа, За куь гунагьрай гудай жаза иридра артухарда.

²² За куь винел, чпи куь аялар телефдай ва мал-къара тергдай, вагьши гьайванар ракъурда. Куьн къвердавай кьадардиз тӀимил жеда, куь рекьер баябан жеда.

²³ Амма идалай кьулухъни куьне Зи тарс кьун тавуртӀа ва гьа виликдай хьиз Заз аксивал авуртӀа,

²⁴ Зунни квез акси яз экъечӀда: За квез куь гунагьрай ирид гъилера артухни алаз жаза гуда.

²⁵ Икьрар чӀур авунай кьисас вахчун патал, За квел тур ракъурда! Куьн куь шегьерра чуьнуьх хьайи чӀавуз, за квел виридахъ галукьдай тӀегъуьн ракъурда, ва куьн душмандин гъиле гьатда.

²⁶ За куьн факай магьрумда. Фу чурун патал цӀуд папаз са хьар бес жеда. Куьн патал фу терездал алцумда. ТӀуьрдалай кьулухъ куьн гишила амукьда.

²⁷ Куьн идалай кьулухъни Заз яб тагуз ва гьа виликдай хьиз Заз акси яз хьайитӀа,

²⁸ Зунни пис хъел акатна, квез акси экъечӀда ва квез куь гунагьрай иридра гзаф жаза гуда.

²⁹ Куьне куь рухвайрин ва рушарин як неда.

³⁰ За куь хкажнавай пак чкаяр чукӀурда ва куь хуш ни галай гум акъуддай къурбанганар терг ийида; куь мейитар бутрин ханвай амукьайрихъ галаз какахьна гадарнаваз жеда. За квез нифрет ийида!

³¹ Куь шегьерар За харапӀайриз элкъуьрда, ибадатханаяр ичӀи яз тада ва куьне ийизвай къурбандрин гум къенез чӀугваз кӀан жедач.

³² За куь чил а саягъда барбатӀ ийида хьи, анал ацукьун патал къведай куь душманрик зурзун акатда.

³³ За куьн халкьарин арада чукӀурда ва куьн чукурун патал тур къакъарай акъудда. Куь уьлкве ичӀи жеда, куь шегьерарни харапӀайриз элкъведа.

³⁴ Чили вичин Кишдин йисар эвез хъийида. Баябанвал давам жедай ва куьне душманрин арада уьмуьр тухудай вири йисара чили ял яда ва вичин Кишдин йисар эвез хъийида.

³⁵ И баябанвал давам жедай вири вахтунда чили, куьне вичел уьмуьр тухвай, амма ада ял акьадар тавур Кишдин а йисарин гьисабдай ял яда.

³⁶ Квекай саламат яз амукьдайбуру лагьайтӀа, душман уьлкведа уьмуьр тухуда, ва За абурун рикӀе кичӀ твада. Пешини вишриш ийида ва абур катда, туруникай катзавайбуру хьиз зверда, абурухъ гьич са касни галтугзавачтӀани, алукьда.

³⁷ Абур хкадарна, гуя туруникай хьиз, сада сад ярхариз катда – амма абурухъ гьич са касни галтугзавач. Квевай душмандин хура акъвазиз жедач

³⁸ ва чара халкьарин арада рекьида, куь душманрин чили куьн туькьуьнда.

³⁹ Душмандин чилел квекай сагъ-саламатдиз амукьдайбур вужар ятӀа, абур, чпин ва бубайринни гунагьар себеб яз, чан аламаз китӀида!

⁴⁰ Амма чпинни, бубайринни гунагь хиве кьуртӀа, абуру Заз акси яз тахсиркарвилериз рехъ ганай ва Заз акси экъечӀнай.

⁴¹ И кар себеб яз Зунни абуруз акси хьанай ва абур душмандин уьлкведиз ракъурнай. Абурун аси рикӀ муьтӀуьгъ хьайитӀа ва абуру, жаза кьабулна, чпин тахсирдилай гъил къахчудайвал авуртӀа,

⁴² За Якьубахъ галаз хьайи Зи Икьрар рикӀел хкида. Исакьахъ галаз хьайи Зи Икьрарни ва Ибрагьимахъ галаз хьайи Зи Икьрарни, и чилни рикӀел хкида.

⁴³ Абуру и чил тур чӀавуз, ада, вич хелвет яз амукьуникди, вичин Кишдин йисар эвез хъийида – абуру чпин гунагьдилай гъил къахчудайвал ийидалди: абуру Зи тагькимар инкарна ва За къалурнавай къайдайриз нифрет авуна эхир.

⁴⁴ Амма и кардизни килиг тавуна, абур душмандин уьлкведа жедай вахтунда, За абур инкар ийидач ва абуруз нифрет ийидач; За абур тергдач; За абурухъ галаз авай Зи Икьрар къуватдай вегьидач, гьикӀ лагьайтӀа Зун, Ребби, абурун Аллагь я.

⁴⁵ Абурун Аллагь хьун патал халкьариз аквадайвал чеб Мисридай ахкъудай абурун бубайрихъ галаз авай Икьрар За рикӀел хкида. Зун Ребби я».

⁴⁶ Реббиди Синай дагъдал Мусадин мецелай Вичинни Исраилдин рухвайрин арада хьайи къайдаяр, тагькимар ва къанунар гьа ихьтинбур я.