Леви 24 - Пак Калам

Чирагъар патал чӀем ва Реббидин вилик жедай фу

¹ Реббиди Мусадиз лагьана:

^2-3 «Гьалтунин Алачухда авай, вичин кьулухъ Икьрардин сандух галай пердедин вилик квай чирагъар вахт акадар тийиз куькӀуьрдайвал, гъилералди гьазурнавай зейтундин михьи чӀем гъун Исраилдин рухвайриз эмир ая. Пакамлай няналди куькӀуьрнавай чирагъар Реббидин вилик хьунал Гьаруна датӀана вил алаз авурай. Им куь арада несилдилай несилдалди къвезвай къалурнавай даиман къайдаяр я.

⁴ Ада Реббидин вилик квай михьи къизилдикай раснавай чирагъгандал алай чирагърал датӀана вил алаз авурай.

⁵ Къуьлуьн гъуьр къачу ва адакай цӀикьвед лаваш чуруж; гьар садал кьве эфа гъуьр гьалтна кӀанда.

⁶ Лавашар Реббидин вилик квай михьи къизилдикай авунвай экӀягъандал, гьардал ругуд жедайвал, кьве харада эциг.

⁷ Гьар са харадин винел михьи хъсан ни галай шкьакьдикай эциг. Им гъизвай фан къурбанддин рикӀел хуьнин пай жеда – Реббидиз кудай къурбанд.

⁸ Эбеди Икьрар кьилиз акъудун патал, Исраилдин рухвайрин садакьа яз, и фу гьар Кишдиз, вахт-вахтунда Реббидин вилик эцигна кӀанда.

⁹ Фу Гьаруназ ва адан рухвайриз талукь я; абуру ам пак тир чкадал тӀуьрай. Им паквилерин паквал, Реббидиз кудай къурбандрикай даим яз Гьаруназ ва адан эвледриз къведай пай я».

Аллагьдиз аси тирдаз кьиникьалди жаза гун

^10-11 Исраилдин рухвайрин арада вичин диде исраилвийрикай, бубани мисривийрикай тир са кас авай. Адан дидедин тӀвар ШеламитӀ тир, ам Данан тайифадай тир Дивридин руш тир. Кундал Исраилдин рухвайрикай садахъ галаз къалриз акъатна, и касди, иври папан хци, Реббидин ТӀвар кьацӀуриз ва абурдай вегьиз хьана. Мусадин кьилив тухвана.

¹² Ам кьуна, Реббиди акъуддай дуван вилив хуьз хьанай.

¹³ Реббиди Мусадиз лагьана:

¹⁴ «А мердимазар кундилай алуда, адан гафар ван хьайи гьар сада адан кьилел вичин гъилер эциграй, ва вири элди ам къван гана кьирай.

¹⁵ Исраилдин рухвайризни лагь: „Ни вичин Аллагь абурдай вегьейтӀа, гьадав а гунагьдай азаб агакьда,

¹⁶ ни Реббидин ТӀвар кьацӀур авуртӀа, ам яна кьена кӀанда: вири элди адаз къван гурай. ТӀвар кьацӀурай гьам масанай атана ацукьнавайди, гьам чкадин агьали яна кьиникь лазим я.

¹⁷ Ни инсан кьейитӀа, гьамни кьиникь лазим я.

¹⁸ Ни мал кьейитӀа, ада зиян эвезун лазим я: уьмуьрдихъ уьмуьр.

¹⁹ Жувандик нукьсанвал кутурдазни гьа икӀ хъувуна кӀанда:

²⁰ хунай хун, вилихъ вил, сарахъ сас. Ада масадаз гьихьтин хасарат ганатӀа, гьахьтинди гьадазни хгана кӀанда.

²¹ Ни гьайван кьенатӀа, ада зиян эвезун герек я, амма инсан кьейиди вични рекьин лазим я.

²² Квехъ уьлкведа гьам чкадин агьали, гьамни масанай атана ацукьнавайди патал гьа сад хьтин къанун хьурай. ГьикӀ лагьайтӀа Зун Ребби, куь Аллагь я“».

²³ Мусади идан патахъай Исраилдин рухваяр хабардар авуна. Исраилдин рухвайри Реббиди Мусадиз эмир гайивал авуна. Мердимазар кундилай алудна ва къван гана кьена.