Biblia Todo Logo
Bìoball air-loidhne

- Sanasan -

Леви 22 - Пак Калам


Къурбандрикай низ недай ихтияр ава

1 Реббиди Мусадиз лагьана:

2 «Гьарун ва адан рухваяр хабардар ая: „Абур Исраилдин рухвайри Заз гузвай садакьайрин патахъай, Исраилдин рухвайри Заз гъизвай затӀарин патахъай мукъаят хьурай, Зи пак тӀвар кьацӀур тавурай. Зун Ребби я“.

3 Абуруз лагь: „Квекай гьар гьим хьайитӀани, гьар гьи несилдикай хьайитӀани, вич чиркин яз, чеб Исраилдин рухвайри Реббидиз гъанвай савкьватрин мукьув атайтӀа, халкьдин арадай акъудна гадарда ва ам мад Зи вилик кумукьдач. Зун Ребби я.

4 Гьарунан эвледрикай тир, вичик жузам квай ва я хкатдай затӀар кӀвахьзавай гьич садани, чеб михьи хъжедалди, пак тир савкьватар тӀуьна жедач. Кьенвайда чиркин авунвай шейиник кягъай гьар сад, мая авадарай гьар сад,

5 вичик кягъуникди чиркин жедай чан алай куьлуь затӀарик ва я вичик хкӀуналди чиркин ийидай инсандик, адан чиркинвилин себеб гьихьтинди кӀандатӀани хьурай, кягъай гьар сад –

6 ибурукай са квек ятӀани кягъай гьар вуж хьайитӀани, няналди чиркин жеда. Адавай эхъведалди пак садакьаяр нез жедач.

7 Рагъдан хьайила, ам михьи жеда ва гьа чӀавуз пак садакьаяр недай ихтияр ава, вучиз лагьайтӀа абур адан суьрсет я.

8 Ада гиликьай ва я вагьшийри кукӀварнавай гьайвандин як тӀуьна виже къведач, тахьайтӀа ам чиркин жеда. Зун Ребби я.

9 Абуру зи къарарар кьиле тухурай, чпел гунагь къачун тавурай. ТахьайтӀа абур пак тир затӀ кьацӀурунай рекьида. Зун, Ребби, абурун паквилин чешме я.

10 Чара чилин касди пак тир садакьаяр тӀуьна жедач. Хахамдин мугьманди ва я кӀвалел пулунихъ кӀвалахзавайда абур тӀуьн лазим туш.

11 Амма хахамди маса къачунвайдаз абур недай ихтияр ава. Хахамдин кӀвале ханвайбурувай хахамди вуч незватӀани, гьадакай нез жеда.

12 Хахамдин тухумдикай тушир касдиз тухванвай хахамдин рушаз пак тир садакьаяр недай ихтияр авач.

13 Амма хахамдин руш хендеда хьанватӀа ва я чара хьанватӀа, ва адаз аялар авачтӀа, ва ада, гьа жегьил чӀавуз хьиз, мад бубадин кӀвале уьмуьр тухузватӀа, – и чӀавуз адавай гьа бубади незвайдакай тӀуьртӀа жеда. Амма чара ксарикай садазни им недай ихтияр авач.

14 Чара касди къастунай тушиз пак тир садакьа тӀуьртӀа, ада хахамдиз пак тир и садакьа, адал вадай са пайни винел эхцигна эвезун лазим я.

15 Хахамри Исраилдин рухвайри Реббидиз гъизвай пак тир садакьаяр чиркин тавурай.

16 Абур тӀуьн тавурай, чпи эвез хъувуна кӀандай тахсир чпелди къачун тавурай. ГьикӀ лагьайтӀа Зун, Ребби, абурун паквилин чешме я“».


Герек тушир къурбандар

17 Реббиди Мусадиз лагьана:

18 «Гьарун, адан рухваяр ва вири Исраилдин рухваяр хабардар ая: „Исраилдин рухвайрикай ва я абурун арада масанай атана ацукьнавайбурукай сада Реббидиз вяддин ва я гуьгьуьл кунуг ийизватӀа,

19 турус тир къурбанд жунгав, гьер, ва я кьун, рехне квачирди хьурай.

20 Рехне квай гьайванар къурбанд ийимир, вучиз лагьайтӀа ихьтин къурбанд турус жедач.

21 Сада Реббидиз карч алай ири ва я карч алай куьлуь гьайванрикай сад суварин къурбанд ийизватӀа, вяддин ва я гуьгьуьл-къурбанд, ам турус хьун патал, къурбанд ийизвай гьайван рехне квачирди хьана кӀанда; адахъ гьич са эксиквални хьана виже къведач.

22 Реббидиз буьркьуь гьайван, хайи чка квай ва я набут, экъечӀай дакӀур чка квай, алатзавай кьурай хам алай, пхьин хер квай гьайван къурбанд ийимир – ихьтин гьайванар Реббидиз кудай къурбанд яз къурбангандал эцигмир.

23 КӀвач кьецӀи жунгав ва я гьер гуьгьуьл-къурбанд патал виже къведа, амма вяддин къурбанд яз абур турус туш.

24 Реббидиз хирер алай, шупӀарнавай, ялна галуднавай ва я какаяр атӀанвай гьайванар къурбанд ийимир. ИкӀ я куь чилелни ийимир,

25 я куь Аллагьдин суьрсет яз къурбангандал эцигун патал маса халкьдикай тир касдивайни ихьтин гьайванар къачумир. Абур набут ятӀа, абурук рехне кватӀа, куь къурбанд турус жедач“».

26 Реббиди Мусадиз лагьана:

27 «Кализ, хпез ва я цӀегьрез бала хьайитӀа, ам ирид юкъуз дидедихъ галаз амукьна кӀанда, муьжуьд лагьай юкъуз ва адалай кьулухъ ам Реббидиз турус жедай цӀун къурбанд авуртӀа жеда.

28 Кал, хеб, я тушни цӀегь адан баладихъ галаз гьа са юкъуз тукӀвамир.

29 Реббидиз тарифдин къурбанд ийидай чӀавуз, ам турус жедайвал къурбанд ая.

30 Ам гьа юкъуз тӀуьна кӀанда, пакамалди гьич са затӀни тамир. Зун Ребби я.

31 Зи эмирар кьиле твах ва абур кьилиз акъуд: Зун Ребби я.

32 Зи пак тир тӀвар кьацӀурмир, гьа и чӀавуз За Зи паквал Исраилдин рухвайрин арада малумар ийида. Зун Ребби, куь паквилин чешме я;

33 Зун, куь Аллагь хьун патал, куьн Мисридай ахкъудайди я. Зун Ребби я».

© Институт перевода Библии, 2010-2024

Institute for Bible Translation, Russia
Lean sinn:



Sanasan