Леви 20 - Пак Калам

Гунагьдай жаза гун

¹ Реббиди Мусадиз лагьана:

² «Исраилдин рухвайрив хабар агакьара: „Исраилдин рухвайрикай тир ва я абурун арада масанай атана ацукьнавайбурукай тир гьар ни вичин велед Малехдив вугайтӀа, ам ажалдин хура тун лазим я; и уьлкведин агьалийри ам къван гана кьирай.

³ Зи ибадатхана ва Зи пак тӀвар чиркин авуна, ада вичин велед Малехдив вугунай, За зи хъел ахьтин касдал элкъуьрда, ам вичин халкьдин жергейрикай хкудна гадарда.

⁴ И уьлкведин агьалийри ада вичин велед Малехдив вугунал вилер кӀев авуртӀа, ва ам ажалдин хура тун тавуртӀа,

⁵ За Зи хъел а касдал, адан вири мукьвабурал элкъуьрда, ам ва адахъ галаз санал Малехдихъ галаз явавилер авурбур чпин халкьдин жергейрикай хкудна гадарда.

⁶ Вичи кьияривай ва жавабар гудай руьгьеривай хабарар кьазвай ва абурухъ галаз явавилер ийизвайдал За зи хъел элкъуьрда, ам вичин халкьдин жергейрикай хкудна гадарда.

⁷ Пак хьухь, жуван паквал хуьх, гьикӀ лагьайтӀа Зун Ребби, куь Аллагь я.

⁸ За къалурнавай къайдаяр кьиле твах, абур кьилиз акъуд. Зун Ребби, куь паквилин чешме я.

⁹ Вичи буба ва я диде лянет авур гьар вуж хьайитӀани кьиникь лазим я. Ада буба ва я диде лянет авуртӀа, адан ивидин тахсир адал вичел ала.

¹⁰ Вуж масадан папахъ галаз къатканатӀа, абур кьведни – гьамни, гьа пабни кьиникь лазим я.

¹¹ Вуж бубадин папахъ галаз къатканатӀа, гьам бубадихъ галаз къаткана. Кьведни кьиникь лазим я. Абурун ивидин тахсир абурал чпел ала.

¹² Вуж вичин хцин сусахъ галаз къатканатӀа, кьведни кьиникь лазим я. Абуру мурдарвал авуна; абурун ивидин тахсир абурал чпел ала.

¹³ Итим папахъ галаз хьиз итимдихъ галаз къатканатӀа, абуру кьведани мурдарвал авуна. Абур кьиникь лазим я; абурун ивидин тахсир абурал чпел ала.

¹⁴ Ни паб ва адан руш вичиз къачунатӀа, им алчахвал я. Ам ва кьве пабни, куь арада алчахвилер тахьун патал, цӀай яна курай.

¹⁵ Гьайвандихъ галаз лап мукьва хьайи итим кьиникь лазим я, гьакӀ гьайванни йикь.

¹⁶ Гьайвандихъ галаз паб лап мукьва хьайитӀа, пабни йикь, гьайванни. Абур ажалдин хура тун лазим я; абурун ивидин тахсир абурал чпел ала.

¹⁷ Са касди вичин вахал, вичин бубадин ва я вичин дидедин рушал, ва вахал айиб авунатӀа, адазни гьадан айиб акунатӀа, им русвагьвал я. Абур чпин мукьва-кьилийрин вилик чпин халкьдин арадай хкудна гадаррай! А кас вахахъ галаз къаткана; ам гунагьдик акатна.

¹⁸ Са вуж ятӀани вичихъ вацран кьилер хьанвай папахъ галаз къатканатӀа ва адахъ галаз къатканатӀа ва адан кӀвахьзавай иви ачухнатӀа, адани вичин кӀвахьзавай иви ачухнатӀа, абур кьведни чпин халкьдин жергейрикай хкудна гадарда.

¹⁹ Жуван дидедин вахахъ ва бубадин вахахъ галаз къаткимир. Ни ихьтин кар авуртӀа, гьада вичин хайи як кьецӀил ийида – кьведни гунагь жеда.

²⁰ Вуж вичин халудин ва я имидин папахъ галаз къатканатӀа, гьада вичин халу ва я ими русвагьна. Абуру кьведани чпин гунагьдай жаза чӀугвада – эремекар яз рекьида.

²¹ Са касди вичин стхадин паб къахчуртӀа, им чиркинвал я: ада стха русвагьда. Абур эремекар яз амукьда“».

Михьи хьуниз эвез гун

²² Реббиди давамарна: «За къалурнавай къайдаяр ва Зи тагькимар кьиле твах, ва абур кьилиз акъуда, и чӀавуз За куьн гьана ацукьарун патал тухузвай а чили куьн гадардач.

²³ Квез чка азад авун яз За чукурзавай халкьарин адетрин геле аваз фимир. Абуру вири и кӀвалахар авуна, ва Заз чиркин хьана.

²⁴ За квез лагьана: „Куьн абурун чилин сагьибар жеда; За ам иесивал авун патал куь гъиле твада – вичикай некни вирт хкатзавай и чил“. Зун Ребби, куьн маса халкьарикай кьилди авурвай куь Аллагь я.

²⁵ Куьнени михьи гьайван гьарам гьайвандикай ва михьи къуш гьарам къушракай чара ая. За квез гьарам яз гьисабун эмир авунвай гьич са куьнални куьн чиркин ийимир: я маларалди, я лув гудай чан алай затӀаралди, я чилел гьарнихъ къвекъведай чан алай куьлуь затӀаралди.

²⁶ Зун патал пак хьухь, гьикӀ лагьайтӀа Зун, Ребби, пак я. Куьн Зибур хьун патал, За куьн маса халкьарилай виняй кьазва.

²⁷ Кьиярихъ ва жавабар гудай руьгьерихъ галаз алакъаяр хуьзвай итимарни папар ажалдив вугун лазим я. Абур къван гана кьирай; абурун ивидин тахсир гьабурал чпел ала».