Леви 2 - Пак Калам

Фан къурбанд

¹ Са ни ятӀани Реббидиз фан къурбанд ийизватӀа, ам къуьлуьн гъуьруькай хьун лазим я. Ада гъуьрел зейтундин чӀем иличрай, хъсан ни галай шкьакь кутурай ва

² хахамрин, Гьарунан эвледрин, кьилив гъурай. Ва хахамди анай са гъапа авай чӀем квай гъуьр ва гьакӀни вири шкьакь къачурай, ва къурбангандал, къурбанддин рикӀел хуьнин пай яз, курай – имни Реббидиз кудай къурбанд, адаз хуш ни галай гум жеда.

³ Амай пай Гьаруназ ва адан эвледриз жеда: им паквилерин пак затӀ я, ам Реббидиз кудай къурбандрикай къачунвайди я.

⁴ Ви фан къурбанд хьра чранвайди ятӀа, ам къуьлуьн гъуьруькай хьунухь лазим я: зейтундин чӀем какадарнавай тӀили фу, я тушни зейтундин чӀем алтаднавай тӀили лаваш.

⁵ Ви фан къурбанд ягълавдал чранвайди ятӀа, ам зейтундин чӀем какадарнавай къуьлуьн гъуьруькай авунвай тӀили фу хьун лазим я.

⁶ Фу кукӀвара ва зейтундин чӀем илича. Им фан къурбанд я.

⁷ Ви фан къурбанд тавада гьазурнаватӀа, ам зейтундин чӀемедал къуьлуьн гъуьруькай авунвайди хьунухь лазим я.

⁸ ИкӀ гьазурнавай фан къурбанд Реббидиз гъваш ва ам хахамдив вахце, адани ам къурбангандин патав гъурай,

⁹ къурбанддин са пай къурбанддин рикӀел хуьнин пай хьиз чара авурай ва ам къурбангандал курай – им Реббидиз кудай къурбанд, Адаз хуш ни галай гум жеда.

¹⁰ Амай пай Гьарунан ва адан эвледринди я: им паквилерин пак затӀ я, ам Реббидиз кудай къурбандрикай къачунвайди я.

¹¹ Ребби патал тир куь фан къурбандар гъвар квачиз гьазурнавайбур хьун лазим я. Я гъвар квай фу, я вирт Реббидиз кудай къурбанд яз кана жедач:

¹² абур Реббидиз цӀийи бегьердилай къачунвай паяр яз гъиз жеда. Амма абур, Адаз хуш ни галай гум акъудун патал, къурбангандал кумир.

¹³ Фан вири къурбандрик кьел кваз жедайвал ая. Ви фан къурбанддик ви Аллагьдихъ галаз хьанвай икьрардин кьел квачиз виже къведач! Гьар са фан къурбанддик кьел кутур.

¹⁴ Реббидиз фан къурбанд сифте бегьердикай гъизватӀа, жегьил кьилерикай тир, цӀал чранвай къуьлуьн чӀахар гъваш.

¹⁵ Абурук зейтундин чӀемни кухтур ва винелай хъсан ни галай шкьакьни вегь. Им фан къурбанд я.

¹⁶ Ва хахамди и къурбанддин рикӀел хуьнин пай курай – Реббидиз кудай къурбанд яз чӀем квай тваррин са пай ва вири шкьакь.